HRINGNUN KHAWVEL

Lalchhawnzova, Tahan

Tumah mahni duhthusam anga awm tak tak theih lohna, mahni duhthusam ang lo theuh-va nun hona, mahni chan tawka lungawi taka lang, mahse tumah lungawi theih lohna, mahni dinhmun hriatthiam lohna leh lungrual ang taka kan khawsak tlanna thin, lemchanna hmun ropui hringnun khawvel tak hi chu aw………! Hmuh tur a tam poh leh ngaihtuah tur a tam ting a ni mai si a, ngaihtuah tur a tam poh leh thawh tur a tam bawk si a nih hi!

Hringnun khawvelah hian pianhmang inang lo, khawsak dan thuhmun lo, rilru put hmang inchen lo leh ngaihdan inpersan tak tak hian mahni thlirna durbin atang theuh hian kan thlir kawi a. Thlir dan zau a awm angin thlir dan zim a awm bawk thin. Kan thlek dan leh kan hmuh thiam dan tak ngial pawh a inthuhmun thei thin lo. Chuvangin, mahni thlirna durbin atang theuhvin hringnun khawvel hi a zau-vin, a zim hlei dawn niin a lang. ‘Tha’ kan tih leh ‘ho’ kan tih hi sawi awlsam tak, ho ang reng a ni a, mahse a hnu leh chu inkar hla tak a ni leh lawi si a. Chhia leh tha intihrie em em si hian engvang nge a tha lam aia a chhe lam zawka kan ngaihtuahna khawlpui hi a her chak zawk tlat le! Dikna intingaina em em si hian dik lo lamah kan ke chheh a chak zawk tlat. Hringnun khawvel hi chu chhui zau pauh leh a li a thuk ting mai a ni.

Hringnun khawvelah hian mahni pawh inthunun thei si lo hian mi dangte va thunun a, kan ngaihdan chu dik ber leh tha berah kan ngai tlat a, keimahni fel intihna atangin tehna chi hrang hrang kan siam chawp thin. Kan ngaih dan leh duh dan chu dik ber leh tha berah kan ngai tlat a keimahni fel intihna atangvekin tehna chi hrang hrang kan siam chawp thin. Kan ngaihdan leh duh dan anga a awm loh chuan kan dem a, kan sawisel nghal a. Mi dangte dinhmun thlir thiam kan tum lova mahni lam ringawt kan inen tawh thin a ni. Massingera pawhin ‘Mi dang chunga rorel tur chuan amah ro a inrel hmasa tur a ni’ a ti hial a. Mite va thunun tum ringawt aiin mahni inthunun theihna hi a ropuiin a hlu zawk ngei ang tih chu hringnun khawvelah hian a inlar fiah em em a ni.

Ti hian ka ngaihtuah fo thin a. Kan mizia, kan rilru put hmang ang tak hian T.V-ah rawn lang iar dawn ta se tunge en ngam ang aw! “Hei chu kei ka ni lo, kawm chhak pa, kawm thlang nu a ni zawk” kan ti mai lovang maw? Kan mizia ang takin hringnun khawvelah hian han inlar chhuak teh reng ila, a ropuiin a hmuhnawm phianin ka ring. Kan Biak inte hi eng angah ngai hlawm tak ang i maw….! A nasa apiangin lal an hrawt dawn a ni mai si a. Mi dangte chunga kan rilru put hmang ang hian miin min rawn en ve ta se. Biak inah tak ngial pawh kan thu tlang thei dawn em ni le? Mihring mahni nihna inhre miah lo, fel leh thaa inngai tlat-te hi an hnawksak a, an bula khawsak a hah thlak, mi hriat thiam leh ngaih damna a tlachham a, anmahni pawh an hah a, nguai hun an nei thin.

Min thunun tumtute kianga awm hrehawm kan tih teh lul nen, mite chunga len kan tum theuh si. Kan lem chanpui te rel tur leh sawisel tur kan ngaihtuah laiin min rela min sawiseltute chu engnge a nih bik tiin an-chhia kan lawh leh bawrh bawrh thung a. Hringnun khawvelah hian mihring rilru ang tluka hlu leh thianghlim a awm lo angin mihring rilru ang bawka sual leh tenawm a awm chuang lo.
A mak ka ti, kan fate chu an thiante zingah huai se kan duh laiin a tiduhdahtu leh cheksawlh thintu chu an ina luh khung tak kan nap a. Kan faten mi tha lo deuh nia kan hriat chu kawm lo se kan ti a, lehlam chuan mi tha chauh kawm turin an lo infuih ve mek bawk a. A ni taka lungpui pawh lung tein a kamki loh chuan hringnun khawvelah a awm thei lo a nih tak kha!

Thilkawm ber paw’n mite chu a chunga thilphal theuh turin a phut ru ve tho. Thinchhia mi tak paw’n zaidam bula khawsak hi nuam a ti ve asin. Mi rel ching tak paw’n mi dang mi rel hmangte chu zu hmusit ve tlat a! Hringnun khawvelah hian lem chang thiam apiang an vannei mai niin a lang. Lem chang thiam lo leh zei lo deuhte tan chuan lungngaihna leh tahna chirhdupah an chantir ve thung a. A ni retheihna hi kutdawh nun a ni a, hausakna nun erawh chu chapona a ni thung si a.

Hringnun khawvela kan nun ho dante hi mak ang reng tak chu a ni. Mo fel leh zaidam, taima kan duhin makpa atan pawh zu-in lo, taima tak, mi hausa fa emaw degree nei pha chin emaw kan duh theuh va, mahse mahni fate chu zirtir kan tum hlei lova. Kan fanuten pasal an neihin min chu-kha tha turin an pasalte thunun thei ngei se kan ti a. Kan mote erawh chuan an chhungte an chu-kha that deuh leh kan thikthu a chhe hman a, an pasalte an thunun theih lek phei chuan mo sualah kan chan leh bawk si. A mak mang tak e hringnun khawvel indona ram tak hi chu aw……..!

Kan moten an chhungte an tanpui lahin kan hmu thei bawk si lo. kan fanuten inhrang an chan atanga min rawn tanpui fo chuan fanu fel, chhungte hmangaihtu kan tileh lawi si a nih hi. Kan makpaten min duat thiamin min chhawm dawl thei reng se emaw, thilphal em em tura kan beisei laiin kan fapaten an Pu-zawnte chunga fel an tumin emaw, an tawiawm deuh fo chuan “an nu chhung lam ringawt a tanpui, keini lam chu engah min ngai lo, chu ti, kha ti” kan tileh bawk si a, aw……. hringnun tak hi chu…. ngaihtuah thiam a harin ngaihna thiam a va har tak em! Nu hrawn tawh phawt chu sual hle turah kan ruat sa nge ni, sawisel tur hlir kan zawng a. Fahrawn pawh chu ti tho. Lehlamin “i nu hrawn hi a chu ti” an tih mek laiin, lehlam paw’n “i fa hrawn hi chu tia i tih loh chuan” an lo ti.