HONG KONG FIREWORKS

By: Lalfakmawia, Hong Kong
China mite leh China ram kal tawh chuan an hmuh chak ber te zing a mi chu ‘fireworks’ (mei eng rawng chi hrang hranga van sang a kah par) hi a ni ve tlat mai le, a taka han hmuh chuan a lo ropui reng a ni. A thawnthu tawite talin i han thli rho teh lawk ang u. Fireworks siamchhuak hmasaber chu China ram hi a ni a, kum zabi 12 khan a lo siamchhuak tawh deih a ni.

Fireworks an hmanna ber erawh chu thlarau sual (evil spirit) umbo nan a ni (an sakhuana nen a inkungkaih a ni). An kap eng a, an au vak vak a, thlarau sual chu tlan bo ta deihah an ngai a ni. Chuan nunhlimna leh malsawmna an neih theihna atan an tawngtai thin. Khawvel a changkan ang zelin a hmanrua pawh an rawn siam changkang cho ve zel a, tunah zet chuan khawvel a mi tam takte en chak ber te zing a mi nikhawpin an rawn siam chhuak thei ta a ni.

Fireworks an siam chhuah atang hian rawket(rockets) siam dan te pawh an rawn thiam chho niin an sawi. A chhan chu kum 1224-64 a sawrkar rikawt (record) buah chuan ‘rawket puak leh firework ri te chuan Lalnu a tihthaih a’ tih hi a chuang a ni awm e, zabi 14-na ah chuan raw-ket chuan hriat a hlawh tawh hle a ni, tiin Wikipedia chuan a sawi.

America pawh hian angaina hle a, khawvel ram hausa mahnise, fireworks-ah chuan China thiamna a purchawk a ngai ve tlat mai. Hun pawimawh bikah te a hmang ve thin a, tun hma American Revolution War hma atang khan a lo hmang ve tawh a ni awm e. Independence day hmasaber (1777) ah khan a lawm nan ropui tak a kahchhuah a ni a, George Washington Inauguration(1789) ah pawh khan ropui tak a hman a ni tawh bawk.

Tunlai hian, China ram chuan an sakhua ngaih dan chu la kengtel zelin hun pawimawh bikah te ropui takin a kap chhuak thin a ni. A bik takin Chinese New Yearah te, Mid-autum Moon Festivealah te nasa tak a kahchhuah a ni thin. Vawin ni thleng hian khawvel a fireworks hralh chhuak tamber chu China a ni a, a siamna khawl lian ber neitu pawh China a ni. Chuvangin China hi khawvelah hian a duai bik lo hle a ni.

January 27, 2009 khan Kum thar hmuahna fireworks chu a vawikhatna atan en ve turin thiante zingah Hong Kong Island lam pan chuan kan fehchhuak ve ta a le. Darkar khat chuang kan tlan hnuah a hmun chu zan dar 6 ah kan han thleng ta a. Ram hrang hrang atanga fireworks en tura lo kalte chu an lo zi nuai nuai a. Mihring tlingkhawm hi han inchhiar theih chu a ni lo na a, nuai hnih

atanga hnuai thum bawrvel chu kan nih hmel khawp mai. Darkar hnih zet kan nghah hnu chuan zai leh rimawi nalh danglam tak mai hian mipui an rawn chawk phur ta a, chumi atanga rei loah chuan van lamah mei eng chu an han kap tek darh ta chuai chuai mai a le, rawng chi hrang hrang leh design chi hrang hrangin a rawn eng chhuak a, a kual, a bial, a tung, a thlawk, a de sepsep,a leng kawi…..a ropui ngei mai.

Firework hun chhung hi minute 23 chhung chauh a ni, a chhan chu a senso a hau tak em em a ni. Company chi hrang hrang te inkawp a sawrkar phalna a buatsaih a ni. Kawngleh lamah chuan kangmei thuah inven a ngai hle a ni. Tuntumah hian vanduai thlak takin firework zawhrual chiah hian a hnuai a lawng pakhat chu a kang ta vut vut mai a, mahse venghimtute an tha em a, tumah inhliam lo tein reiloah chuan an thelh zo ve ta mai chu a ni kha.

Awle! an sawi fo thin fireworks chu hetah hian a nungchung ngeiin ka rawn thawn tel a, I rilru tihhlim nan han thlir ve teh. I thlarau sual umbo nan a lo tangkai ve hlauh mahna. Lal Isua pawhin kei hi khawvel eng ka ni a tih ngei kha maw, engah chuan thil sual chu chiang takin a lang thin reng a ni. He eng hi Lal Isua eng nen khan han ngaihruat la, i nihna a lo lang kuk mai ang.