EDITORAIL: Mi
hringten kan mamawh leh kan zawn ber chu zalenna a ni, ti ila, a sual tam viau lo ang. Kan Pipute’n phaizawl hmun nuam tlansana tlangram chhengchhe tak, khamrang leh romei zamvelna hmuna thlang an tlakna chhan kha zalenna an zawn vang a ni, kan ti lo thei lo. Zalenna hi a man a tam a, awlsam taka neih mai theih a ni lo. Thi leh thau tam tak senga zawn chhuah a ngai a, hotea hloh leh theih a ni.
Zalenna hmuh nan nunna tam tak sen a ngai a, beidawng lova beih a ngai thin. Sual chhuah a har a, vawnghim turin mipuite tanrual a ngai lehzual. Mipuiten dan leh zalenna inkungkaih dan leh inphuar tawn dan kan hriat loh va, inbuk tawn taka dan leh zalenna kan hman thiam loh chuan inrelbawlna leh ruahmanna danglam kan hmuh leh kan tawn avang ngawtin zalenna rah thlum kan lo thei chuang lo vang.
Mimal dikna humhalh a nih a, dan palzam lova mite leh miliante chunga angkhat a kenkawh a nih a, mite tana hnawksak lo tura mahni inthunun theihna kan neih a, dan vawnghim tura mipui kan tanrual thiam hunah zalenna rahbi kan rap tawh ang. Tunlai thangthar te hian duh duh tihtheihna hi zalennaah kan ngai niin alang. Serh leh sang tel lo zalenna a awm thei lo. Zalenna dik tak chu mi tinten kan tih tur chanpual theuh rinawm leh taima taka hlenchhuah hi a ni. Kan zalenna chu mi dangte tana phurrit a nih chuan zalenna zik bul a ni ang a, kan beisei leh nghahfak a ni ngai lo ang.
Mahni hamthat nana dan kan palzamna hmunah zalenna a thi thin a, dikna leh inzahtawnna hmanga dan zawm a nih hunah zalenna kan hmu ang. Duh duh tihtheihna hi zalenna a nilo, tih kan varpawh a hun ta.
