HNATHAWH HI

HNATHAWH HI (A biblical study)

By Revd Lalfakmawia

THUHMAHRUAI :  ‘Hnathawh’ han tih chuan a huam zau hle mai. Office leh thingtlang hlo thlawh thlengin, ei leh bar zawnna atana kan thawh zawng zawng a huam vek a ni. Mizo (zofate) nu leh pa thenkhat chuan an fate zilh nan ‘lehkha i thiam loh chuan rim takin hna i thawk dawn asin’ an ti thin. A bik takin ‘kut hnathawh’ phei chu phur rit leh anchhia ang hial a ngaiin lehkha thiam lo leh mi mawl zawkte tih turah an lo ngai thin a nih hmel hle. Mihring finna lo thang zel chuan ‘hnathawh’ hlutnate a lo tawng pawp ta zel a. Hnam fing apiangin hna an thawk nasa a, hnam mawl apiangin hna an thawk tlem ta mai a nih hi. Zofate hi Pathian thua harhna avangin ‘hnam mawl’ tia sawi tur kan ni tawh lovang chu. Chuvangin hnathawh chungchang kan zirho hi a pawimawh hle a ni.

ENGVANGIN NGE HNA KAN T HAWH ANG?

Hnam thil ni lovin, Pathian thu atanga hna kan thawh chhan tur hi zau takin a sawi theih a nga. Mahse kawng li chauhvin han tar lang ila:

1. Hna thawk tura siam kan ni:  Genesis 1:26 kan en chuan heti ang hian a sawi “Kan anpuiin mihring siam ila anni chu tuifiriat sangha chungahte……..zawng zawng chungah te thu i neihtir ang u” tih thu kan hmu. He ta ‘thu i neihtir ang u’ tih lai hi kan la sual thin a, thuneihna (licencse) ah kan ngai thin. A hrilhfiahna dik tak chu Gen.2:15 thu hi a ni; ‘enkawla veng turin’. Pathian thu ang zel a enkawltu mawhphurhna pek thu  ani  zawk ang. Enkawltuhna chu ‘hna thawk’ tihna a ni. Hna thawk tura siam kan nih avangin kan thawh loh hian siamtu kan dodal a ni ang.

2. Pathian mizia a ni: Lal Isua ngei khan “ Ka Pain tun thleng pawhin hna a thawk reng a ni; kei pawhin ka thawk ve a ni” (John.5:17) a ti. Kan Pathian chu hnathawk thin, Pathian taima a nih avangin Amah ringtu nih leh hnathawh loh / thatchhiat a in hmeh lo.

3. A malsawm kan dawn theih nan: Pathianin A hausak zar kan zo theih nan leh A malsawm tinreng kan dawn theih nan hna thawh min tuk a ni. Exodus 34:21 min zirtir dan chuan ‘Ni ruk chhung hna kan thawk tur a ni ang’. Dr. Luka chuan “…….hnathawktu chu hlawh hmu tlak a ni” (Luka 10:7) a lo ti ve bawka, a thlamuan thlak hle mai.

4. Hrisel nan: T.Paula’n Timotheia hnenah a taksa hrisel nan leh rinna tih chak nan taksa insawizawina nei  thin turin a fuih. Hnathawh chu taksa insawizawina tha ber a ni. Taksa bung hrang hrang a ti che a, chu chuan taksa leh rilru (thlarau ) a ti hrisel thin. Methodist Kohhran hruaitu sinior tak Pu Sanghleibila chuan “ Tun hma kha chuan, kan fate hian ral atang hian ‘ka nu ka pa hna lo thawk tawh suh u’ min rawn ti thin a. Tun hnu, ram changkang zawkte an han thlen hnu hian ‘ka nu ka pa hna kha inphaktawkin lo thawk reng rawh u aw’ an rawn ti leh ta a ni” a ti. Kan taksa mil tawka hna kan thawh hi Pathian thilthlawnpek damdawi tha ber a lo ni e.

KRISTIAN SAKHAW THLIRNA ATANGIN

Kristiante Pathian chu hnathawk thin Pathian a nih angin Amah ringtute chuan hnathawhin a rawng an bawl thin. Rinna a kan pa, Noa te, Abrahama te, Mosia te, Davida te leh mi dang te pawh rim taka hna thawk thin an ni. Lal Isua khan mitiri hna a thawk thin a, Luka khan Doctor hna a thawk a, T.Paula khan puan in a zuar thin. T.Paula phei chuan hnathawh a sawi uar hle a, “ Tupawhin hna a thawh duh loh chuan ei pawh ei suh se” (2Thess. 3:6,8,10) a ti hlawl mai a nih kha. A ruh langa sawi chuan mihring hi ei leh in lo chuan rei a dam thei lo. Chuvangin he thu hi ‘thi rawh se’ tih tluk a ni e.

Kohhran hmasate pawh khan hnathawh hi an ngaipawimawh khawp mai. Siamthatna hunlaia Kohhran pa Martin Luther-a kha nitina hnathawh chawisang em emtu a ni a, kut hnathawktute chu puithiam rawngbawltu tluk hialin a chawisang a ni. Kristianna leh nitin hnathawh hi a pawimawh dan thliar hran a tum ngai lo. Martin Luther-a aimahin John Calvin-a khan kut hnathawh a chawisang zawk a, “ hnathawh hi Pathian biakna a ni” a ti hial a nih kha. Pathian thuthiam hmingthang William Barclay-a pawh khan “Lal Isua kha kum 30 hma lamah kha chuan a nu leh pa leh a unaute buaipuiin hun a hmang hmasa ang” tiin a lo ring hial a ni. Chu vangin hna hi Pathian thilpek a ni a, hnathawh theihna pawh hi Pathian thilpek tho a ni. Hna kan thawh hian Pathian mizia kan nunah nemkaiin a awm a, rinawm leh taima taka kan thawh hian Pathian pawlna thuk tak a ni.

PATHIAN THU LAK FUH LOH A PAWI

Zofate hi Pathian thu duh tak kan nih angin thlarau thil kan uar hle a, ‘Thlaraumite Insuihkhawm’ thlengin din a ni tawh hial a. A rau lam kan uar lutuk aleiah atak ram hmuh tur awm si lovin a rauah bawk kan tawp leh thin. Pathian thu leh economic thil kan thlunzawm thiam lova, Krista hausakpui tum takaruanga retheihpui tum lui tlat kan tam hle mai. Kohhrana tih tur hnih khat bawhbelh a hnathawh leh sumdawnna phei chu Krista khenbehna hial a sawi duh kan awm thin. Pathian rawngbawltute lek phei chu retheihna nen hian inhmeh riau a hriatna kan nei. Rev. Dr. Kawlnia chuan “ kan rawngbawltute hi rethei sela, keini hian lo tanpui ila kan ti niin alang” a ti hial a ni. Rev.Dr. J.Ngunhleia, T.I.T. Principal chuan (2011 course, Tuingo a sawi) “kan sikul atang hian Pastor taima hrinchhuah kan tum a ni” a ti a, a muanawm hle mai.  Sakhaw rawngbawltute chungah kutphuar tih tawngkam kan len viau te hi siam that a hun lo maw? 

Mi thiam tak Prof. M. Douglas Meeks-a chuan, “Ei leh bar dinhmun tha lovin thlarau nun a hnuk hniam a, Pathian thu pawm dan fuh tawk lovin ei leh bar dinhmun a tisang thei lo,” tia a sawi hi Zofate tan a tha lehzual. Siamthatna hna thawk rim tak John Calvin-a zirtir dan phei chuan ringtute hi thlarau khawvela intlakral ringawt tur kan ni lo va; leilung hausakna haichhuak a, Pathian ropuina leilung hausakna hmanga hre zual zel tur kan nihna a uar hle bawk kha. Thuhriltu then kha chuan “Hausakna nge i duh Lal Isua” ti tein an au vak vak thin. Hengte hi zawhna a hman chi a ni lo, a pahnih hian neih mai tur chi a ni.

ENG HNA NGE KAN THAWH ANG?

Tunlaiin Mizoram a Mizo tlangvalte’n “hna a awm lo” an tih laiin vai ho chuan Mizoramah  thawhsen loh hna an hmu. Hna a awm lo kan tihna chhan chu hnathawh zah leh peih loh kan neih thin vang ani. Pathian thilsiam leilungah hian thawhsen loh hna a awm, khawi hmunah pawh bung ila, a peih tan chuan hawp khawp hmuh theihna vek a ni. Chu chu Pathian hausakna thuruk a ni reng a.

Bible chuan hna zawng zawng hi a zahin a dah pawimawh vek a ni; Davida kha beram vengtu a ni a, mahse Lal atana thlan a ni. Daniela chu sorkar hna thawk a ni, mahse Lalpa chhiahhlawh rinawm a ni. Lal Isua chu thing mitiri a ni, mahse Pathian fapa khawvel chhandamtu a ni. Luka chu Doctor a ni a, chanchin tha chhiahhlawh a ni. Lydia kha sumdawng a ni, mahse rawngbawlna lama mi thawhhlawk a ni. T.Paula kha puan in zuar ani, mahse  chanchin tha bawi a ni. Heng mite hi hna sang tak an thawk hlawm kher lo, mahse an hna an zahpui lo mai ni lovin an chhuang zawk a ni.

Eng hna pawh hi a thawktuin zahtlak a athawh chuan a zahawm a ni. T.Paula pawhin mahni hna theuh nghet taka nei tlat turin min fuih (1 Thes.4:11). Eng hna pawh hna a tling a, nghet takin kan thawk mai tur a ni.

KHAWVEL THLIRNA ATANGIN

Chinese Dictionary-ah chuan ‘peih lo’ tih hi a awm lo an ti thin. Chuti ang vang chu a ni a nge khawvela hnam fing leh hausa, thil tithei an rawn ni chho mek. Kawl ram a company lian te leh dawr lian tam zawk hi chinese kuta awm a ni zu han ti a maw le!

Hna la na tak ram chu ram changkang kan tih te hi an rawn ni chho zel a ni. Kawl ramin ni khatah darkar 5 hna a thawh laiin Israel ram chuan ni khatah darkar 8 a thawk a. Chutih laiin Hong Kong ram chuan ni khatah darkar 10 atangin 12 a thawk thung a. An hausakna pawh a inthlau mawi tawk bawk e.

Human rights lam thlirna atang chuan; ‘mihring dam hrisel pangai hian ni khatah darkar khat tal hna a thawh loh chuan mihring zahawmna a ti bo a ni’ an ti. Pu Lalena chuan (kum 2010 Letpanchaung consultation-a a sawi) “ni khatah darkar 8 hna ka thawh tlin loh chuan ka ei pangai aiin chaw ka ei tlem deuh thin”  a tih hian Zofate min cho nasa hle mai.

HNATHAWKTUTE CHUNGA PATHIAN MAWHPHURHNA

Hna thawk tura min siamtu Pathian hian siam an nih chhan ang taka hna thawktute chuangah hian mahphurhna a nei a ni.

1. Hnathawh thiamna (skill) a pe: Jakoba’n “ …tupawhin finna a tlakchham chuan mi zawng zawng hnena hau lo leh ui lova pe thintu Pathian chu dil rawh se” (Jakoba 1:5) a lo tih angin finna, remhriatna, themthiamna leh hlawhtlinna te hi Lalpa ta a ni. A mamawhte  mai ni lovin pek tlaka a ngaihte hnenah a pe thin. Thuthlung hlui hun a Biak buk chu Pathianin thiamna a pek bik te’n an sak thu kan hmu. “Bezalela leh Oholiaba mi leh themthiam tupawh Lalpan thu a pek ang zela hmun thianghlima rawngbawlna hna tinreng thawk thei tura finna leh hriat thiamna a pek apiangte chuan an bei tur a ni,” a ti a.” (Exodus 36:1). Kan nitin hnaah hian themthiamna kan mamawh a, chu chu Lalpa kut a awm a ni.

2. Pathianin hlawhtlinna a pe: Josefa nunah entawn tur tluantling kan hmu. “Tin, Lalpa chu Josefa hnenah a awm a, tichuan ani chu mi vannei tak a ni a; tin, a pu Aigupta mi inah chuan a awm a.” (Genesis 39:2-3). Remruat leh hnathawh hi mihring chan a ni a, a hlawhtlinna chu Lalpa chan a ni.

3. Pathianin promotion a control: Hna thawh bik leh thiam zawng te kan nei theuh a, mipuiin kan hna atanga chawisanna kawngah min control lo. Pathianin hlawhtlinna min pe a, kan hna kaisanna lama control-tu pawh a ni. Sam ziaktu hian a hre chiang hle mai, “Tihsanna chu chhak lam ata a ni hek lo, thlang lam ata a ni hek lo, chhim lam ata lah a ni hek lo. Pathian chu roeltu a ni zawk: Ani chuan pakhat a tilawm a, pakhat a tisang thin.” (Sam 75:6-7).

HNATHAWH A MIHRINGTE MAWHPHURHNA

Nitin a hna kan thawhna chungchanga Pathianin mawhphurhna pawimawh tak a nei angin mihring lam pawhin mawhphurhna pawimawh tak kan nei a ni.

1. Lal Isua tan kan thawk tur a ni: Bible sawi dan chuan, hna kan thawh hian Lalpa rawng kan bawl a ni, “A rulhna roluah tur chu Lalpa hnen ata in hmu dawn tih hriain, in tih apiang chu mihring tan anga ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi.” (Kolosa 3:23). I hnaah chuan i rilru pe la, Lal Isua chu i boss anga i hmuh chuan, i hnaah chuan rinawm tum ta che? Nitin kan hnathawhna a zawhna pawimawh tak mai chu ‘tu tan nge i thawh? A chhanna chu Lal Isua tan kan thawk!

2. Taima taka thawk tur kan ni: Taimak leh thatchhiat hi chi inthlahna atang lo kal a nih hmel loh hle. Heti ang hian han sawi tai la; 1) taimak hi zir theih a ni 2) tihthan atangin kan taimain kan thatchhe thin 3) rilru tuizawngah chuan mi an taima mai thin, tuizawng nei tura inzirtir a ngai 4) hmathlir tha tak nei mi chu a beiseinain a ti taima thin. Chu vangin pianpui a nil ova, pian hnuah neih thil a ni.

Thuhriltu 9:10 chuan heti hian a sawi “I kutin tih tur a hmuh apiang chu theihtawpin ti rawh; thlan i kalna turah chuan thil tih tur emaw, remruat tur emaw, hriatna emaw, finna emaw a awm si lo va.” Thufingte 12:27 pawhin inthlahrung hauh lovin heti ang hian a lo sawi ve bawk, “ Mi thatchhia chuan ramvaka a kah rawh tur a nei lo. Mihring sum hlu chu taihmak a ni.” Bible in mi thatchhia a dem laiin mi taimate a fak bawk a ni. Thufingte 18:9 chuan heti hian a ti, “A hnathawha mi dawngdah pawh tiboraltua unaupa a ni.” T.Paula nunah taimak hlut zia kan hmu, 2 Thess.3:8-9 “ Tu kut ata mah athlawnin in chhang kan ei ngai hek lo, in zingah tumah kan tihhautak lohna tur che uin achhun azana hah tak leh rim taka thawk chungin kan ei zawk a ni;”

I hnathawhah miin Pathian chu mi thatchhe tak anga an khaikhin lohna turin i taima reng tur a ni. Nangmahah Pathian mizia an thlir reng tih hria ang che.

3. Mi fel leh taimate chuan heng te hi an hlawh ang: Hnianghnarna : “Nang,thatchhepa, fanghmir tih dan te chhut la, fing rawh; Anni chuan lal te, hotute, roreltute nei lovin nipuiah chaw an chhek khawm a, a seng hunin an ei turte an seng khawm thin.” (Thufingte 6:6-8).

Sum leh pai leh ro thil: “Kut dawngdah chuan retheihna a thlen thin a, mi taima kut erawh chuan hausakna a thlen thin.” (Thufingte 10:4). Keini’n hausak kan duh a, Pathianin kan hausak a duh bawk a, enge daltu awm?

Rorelna leh thuneihna: Israel te’n Pathian thu an awi loh avangin hnam dangte rah behin an awm. Zofate pawhin chutiang chu kan tawk thei a, kan tawk mek zawk em le? “Mi taima kut chuan rorelna a keng anga, mi thatchhia erawh chu hna rim tak thawk tura tih a ni ang.” (Thufingte 12:24). M.W.O. hruaitu pakhat chuan “Kawl ram chuan inthlanna a han buatsaih a, zofate zingah MP candidate tura tling tawk, ram sorkar lam hmelhriat tak kan lo tlem khawp mai” a ti. Rorelna leh thuneihna chu kan la chang pha lo deuh a ang e.

4. Mi thatchhiate chuan hengte hi an hlawh ang:

Retheihna :Hrisel pangai thatchiat avanga retheihna hi chu Pathian anchhia a ni, “Mi dawngdah chuan retheihna a thlen thin a ” (Thufingte 10:4).

Harsatna : Thil tha eng pawh hi hria ila kan tih/thawh peih tlat loh chuan kan kawng chu hling hnawk ang mai a ni reng ang. “Mi thatchhe kawng chu hling pa ang a ni a ” (Thufingte 15:19, 18:9).

Thihna : Thatchhiatna chuan retheihna a thlen a, retheihna chuan mahni inthah duhna hial a thlen thei. “Mi dawngdah duhthusam chuan amah a tihlum thin, a kutin hnathawh a duh loh avangin.” (Thufingte 21:25).

5. A hleihluak a hnathawh tur a ni lo: Lehkhabu thianghlim chuan engkim hi a tawk chauh zela ti turin min zirtir a ni. Lal Isua patla kan hman a, a buk tawk kan thiam a pawimawh hle. Hna thawh lutuk avanga Lal Isua nen a kan inlaichinna a chhiat theihna a awm, entirnan: 1) sakhuana kalh zawnga hna kan thawh chuan 2) sorkar duh loh zawnga hna kan thawh chuan 3) thilsiamte hnungchhat zawng a hna kan thawh chuan 4) kan mihringpuite tan a chimawm taka hna kan thawh chuan, chu chu sual a ni.      “ Ni ruk chhungin hna i thawk tur a ni a, a ni sarih ni erawh chuan i chawl tur a ni” (Exodus 34:21) tih ziak ang khan. Hnathawh chuan Pathian tan leh thilsiam tan rah tha a chhuah tur a ni.

6. Kan chunga mite (kan pute) kan zahthiam tur a ni: Zofate kan hnathawhna kawng hrang hrangah hnam dangte aia promotion kan kai chak lohna chhan chu kan chung amite zahthiam dan kan thiam loh vang ani. Ringtu chuan a chunga thuneitute chu Pathian ruatah ngaiin a zahthiam thin tur a ni. “Chhiahhlawhte u, ti dek hlirin in hotute thu thuin awm rawh u; mi tha leh mi nunnemte lakah chauh ni loving, mi nungrawngte lakah pawh.” (I Petera 2:18).

7. Kan hnathawhpuite kan rel tur a ni lo: Inrel vak vak hi hnam mawl mizia a ni a. Mahse Zofate hi kan christiannain kum 100 hmel a hmuhna rei tawh ngaihtuah chuan inrel kan la hmang fu mai, kan fak berah pawh mahse kan tileh hram thin. Evan. ho tih dan takin, kan hmuite hi rel station a ni ringawt alawm! mak tak a ni. Pastor te rel phei chu zing thingpui in angin ngaiah kan nei tawh a nih hi. Thufing chuan “Chhiahhlawh chu a pu hnenah rel suh, anchhia a lawh ang chea, thiam loh i  hlawh dah ang e ” (Thufing 30:10) a ti. A hun tak ang zel a thu dik tan ngam chu a tha a, mi chhiatna thlen tura mi rel erawh chu chhiatna min thlen theitu a ni.

TLIPNA

Pathianin mihringte min hmangaih em em a, A thilsiamte enkawlhna mawhphurhna sang leh duhawm tak min pe bawk. Kawngfai laka kan pen loh nan kawng dik min zirtir a, a bik takin hnathawh leh sum hman dan dik min zirtir tam hle, a chhan chu a hlawkna telin kan hausak a duh vang a ni. Engkim hi ata a ni a, engkim min pe bawk. Hna min pe a, hnathawhtheihna min pe a, taimakna leh rinawmna hmangin a hausakna thuruk haichhuak turin min duh. ‘Taimak hi vanneihna nu chu a ni’ an tih laiin ‘dawngdahna leh thatchhiatna chu Setana bu khuarna a ni’ thung. Pathian rawngbawlna ropui tak chu nitina rinawm tak leh taima taka hna kan thawh hi a ni.

Lehkhabu rawnte:

Lalfakzuala, Rev., Zoram Quavadis?: Lois Bet, Chanmari, Aizawl, 2009.

                  ‘God’s Financial Principles’ Lecture Notes (nd).

Vanlalzara, Revd, ‘Thalaite leh Kuthnathawh’ Lecture Notes (nd).

Holy Bibleсондажигеоложки проучвания