Hna I Thawk Ang U!!!

By: Vanlal Zawma, U.A.E
Hna kan tih hi mahni inchawm theihna leh ei kan hmuh theihna apiangte hi hna chu a ni mai a, hnaah hian a sang leh a hniam a awm hran lo bawk. University-a kan zirlai (kan tlurbing deuh bik) subject ang kher khera hna thawh kan tum a nih chuan khawihmunah pawh hna a vang viauin a rin awm. Pu Vanlawma’n groupmail-a sawihona lamah “Germany ah pawh an subject lakna zawn kher khera hna thawh an tum chuan hna hmu lo leh hna nei lo tam tak an awm” tiin a rawn sawi chiang viau mai a. Keini ram (Burma)-ah lek phei chuan ngaihtuah chi pawh a ni lo, hna a awm lo tawp a ni.

B.A or M.A degree meuh sual chhuak tawh chuan lehkha pawh tam tawk a chhiar beisei a ni a, general knowledge pawh tam tawk tak a hriat beisei a ni. Professional lam deuh bik medical doctor, engineering leh etc… zirte tan lo chuan kan subject lakna zawnah khan hna thawh tur a awm lo tih chu kan hriat sa vek a rin awm bawk. Matric kan pass chiah hian University/Colleage ah eng subject nge kan zir dawn tih hi mahni thlan vek a ni a, he tah hian nu leh pate thurawn leh mi dangte hnena thurawn lak thiam a pawi mawh hle. Tun tuma BA., M.A., … hna hmu zo lo, mahni pawh inchawm thei lo kan tihte hi Tumna or Goal engmah nei lova chhungte pawisa ringa lehkha zir ve mai mai te an ni. An zir zova engmah ruahman lawkna an neih loh vangin hna thawh tur an hre lo a ni ber. An zir mi subject ang han thawk turin kan ramah eng tik laimahin chutiang hna chu a awm ngai lova a awm hun tur pawh hriat phak a la ni lo bawk.

3rd year ka zirpui pakhat chu kawng sira kuhva zuar a ni a, a hnaah khan a tui em em a, eng tin nge ka kuhva hi mi dang aiin a tui bik ang tih ringawt mai a ngaihtuah thin a, pawngpaw zawrha zuar ve mai mai ho ai khan B.A pa kuhva chu a tui bik a, a mahpawh biak a nuamin a mawng a zang em em mai bawk a. Tunah chuan Yangon, N.Okkalapah ah dawr lian deuh mai a nei tawh nghe nghe.

B.A., M.A.,… kan zir zova kan degree te chu inchei nan kan hmang a, keimahni kan inngaisang hlura hna hniam deuh atanga thawh tan kan zak/duh lo vel a, a hlawh a tlem em mai te kan ti a, kan zirna subject angah hna a awm lo tihte chu kan chhuan lam a ni a. Kan zir hma daih khan kan Subject lakna zawnah hian hna a awm lo tihte chu kan hriat sa vek a ni bawk si. Eng tin nge zofate hian hnam dang kan tluk theih teh lul ang? Degree ah kan lungawi tawka hna thawh kan hlau tlat a lawm.

Tumkhat chu kan office-ah Kawl nula pakhat hian hna a rawn zawng a, hna ruak a awm loh thu kan lo hrilh a. A application form rawn ken chu kan lo la ve tho bawk a. A hmel a duhawm mai bakah biak a nuam em em mai a, chu ta a thusawi chu “kum 23 ka ni tawh a, kumin ah B.Sc final exam ka chhang tawh bawk a, tun thlengin hna nghet ka la nei lova ka kum a upa mai dawn, school lah ka zo tawh bawk si. Hmun dangah pawh nise hna ruak in hriat chuan min hrilh dawn nia” tiin hawihhawm takin a contact adress te min pe nghal a. A hmel kha ka hmu tha leh zual sauh mai a, ka va han ngaisangin ka va ngai zawng em ve kha nula te reuh kha. Mizo nula leh tlangvalte hian khatiang ngaihtuahna/fimna/thiamna te nei ve tur khawpin lehkha kan zirin an chhiar ve lo em ni tih chu ka ngaihtuahna ti buaitu ber pakhat a ni.

Hna i thawh peih/duh tak tak chuan Driver turin pawl 10 fail aiin B.A an duh zawk a, waiter/waitress thawk tur pawhin B.A nge nge chu an duh zawk ngei ang. Duty Free leh supermarket ah pawh degree nei nge nge chu an duh zawk hrim hrim, i thawh peih chuan thawh tur a tam mai, ni tin chanchinbu hrang hrangah hna ruak 100 tel tak meuh an pho chhuak thin a, han thawk ve phawt mai teh. House Keeping pawh thawk mai rawh, kum 2-3 ah chuan i kai sang ngei ngei ang. Pumpelh kawng ringawt ngaihtuah in leh chhuan lam chi hrang hrang siamin i tei kual mai mai lo teh ang u. Zofate u miin min hmuhsih mai loh nan leh mi kan an ve theih nan kan hmaa lo chhuak thawhtur awm a piang mai hi huaisen takin I Thawk Ang U.