Hmawrhmuhna Video Clip (2009 ZOIN AWARD DVD)

Huivalenthiam: Hei le, a chhuah dawn thu kan puan on on tawh leh tlumtea thlira kan thlir ron huai huai; 2009 ZOIN Award semna hunpui DVD(live) chu, tlawmngaia zuartu atana an ruat, a hnuai lama kan tarlan hming leh khuaah te khuan a lei theih ta e. Hmun hrang hranga khawsa Zofaten mahni awmna hmuna DVD zuartute hnenah, tlawmngaia min leisak tur cheuvin inkhawngaihna kan ngen mawlh mawlh a. Tin, Per DVD ah hian $5.00 aia hniam lova hralh inbeisei a ni.

Sawilang tho ila. Vanduai thlak takin, Rangoon atanga Singapore kan thawn tumah, DVD 200 zet mai, airport ah mi an man sak a, a pawi kan tiin kan ui hle a ni. Hetianga vanduaina kan thawh avang hian khawpui thenkhata DVD tlawmngaia zuartu’n kan dinhmunte sawizauvin per DVD $10.00 ten a hralh ta nual a, tlawmngaia lo chansaktute chungah leh a zuartu chungah a lawmawm tak zet a ni.

Khai le, ZOIN DVD hi zawrh theiha peihfel a nih hnuah pawh a thawnchhuah dan turah tum angin a chet zung zung theih loh chu thuhran ni se la, tunah pawh hian kan tumna hmun leh ramah kan la inthawn thleng hlei thei hrilh lo a, a pawi em em a ni. Hei hi, mawhphurtute kan tlinlohna pakhat a ni ngei mai, thawn thlen hrih lohna rama Huivalenthiamten khawngaih taka min in hriathtiam kan beisei tak zet a ni e.

Awle, 2009 ZOIN Award hunpui, ropui taka buatsaihna chu khawvel hmun hrang hranga khawsaten DVD kaltlang tala an thlir ve theih loh an hlauh avanga an hun chep tak kara rawn buaipuitu, ramchhung lama kan thawnpui zing a, ZOIN Project Director—Dr. Suirengliana leh T. Melody Thanthawnga chungah lawmthu kan sawi mawlh mawlh a. Tin, he function a hlawhtlintheihna tura chanvo pawimawh tak tak chelhtu sub-committeee te chungah te, hlutpuitu Tahan leh a chhehvela mipuite chungah te, leh ram hrang hrang atanga sum lehpai thawhtute chungah lawmthu kan sawinawn leh a ni.

DVD lei theihna hmun
1. USA (Maryland) – Pu Lalendika leh Pu Vana Chawnghlut
2. USA (Indianapolis) – Pu Lalnunmawia
3. USA (Iowa) – Pu Lalrinsanga
4. Norway – Pu Lalrinpuia Chengkual
5. Austrilia – Pu Valtea & Pu Ela Khiangte
6. Germany – Pu Vanlawmsanga
7. Japan – Pu Lalrinenga
8. Denmark— Pi Lalrochawii
NB: A chunga tarlan loh ram dang thawnna tur chu a hrana tarlan lehtur a ni.

Sawilan hmaih hauh loh tur pakhat erawh, tun maia ZOIN DVD la dawng lo te tana thlir theih tur, hmawrhmuhna video clip, a hun chep tak kara youtube kaltlanga rawn buatsaihtu, Tv. Zoramchhana of Singapore chungah; kan lawmzia hi sawilan kher a tul awm lo ve, tiin 2009 ZOIN Award DVD chuan khawvel a fan mek thu kan han puang a ni. Eds.

REPORT KIMCHANG TARLANTAWHNA TIHNAWNLEH A NI E.

By: Vanlal Zawma, Secretary, Huivalenthiam-2009
Pathian kaihhruaina azarah 2009 Zoin Award Hlanna Hunpui chu December 30, 2009 Zan (7:00- 10:30 PM) khan EFCM Hall, Tahan ah ropui tak leh hlawhtling taka buatsaih a ni a. EFCM (Evangelical Free Church of Myanmar) Hall hi Burma ram chhunga Zofaten Hall kan neih len ber nimahsela program tan hma hauh atangin mipui an leng lo nghal tih theih khawpin hlut a hlawh a, hei hi Zoin Award hunpui hlawhtlinna pakhat a ni, kan ti lo thei lovang.

T-Melody band te chu a khaipa berah tangin thangthar music thiam tak takte leh zaithiam tak takte nen stage an mawi hle a, a bik takin TCYF ICON te an rawn che thla hle bawk. Tin, thangthar lam te pawh thalaiten entirna neiin Tahan Nazarene Kohhran Thalaiten Cheraw an kan heih heih bawk a, hunpui a tichangtlung em em a ni. Sawihmiah miah loh tur pakhat chu Tahan leh a chhehvela Zo lanu (Zo hnathlak chi hrang hrang zing a mi) ti tuai nalh tak tak ten Zo thuam dik takte nena an rawn inlan meuh chuan an mawizia thu maia sawi sen a ni lo, “Tawn mang si lo, Van angel ianga hmel tha” tih hla sak mai min phut a ni ber. Stage/platform an cheibawl thiam dante en hian Sub-committee ten creative idea an neih thrat zia, a ti lang chiang hle bawk a ni.

2009 ZOIN Award buatsaittu HuivalenthiamGroup hian a thupui ber chu; “Zofate Insuihkhawm Zai I Rel Ang U” tih hi a ni a, he hunpui boruak avang hian Tahan leh a chhehvela Zofate thinlung pawh insuihkhawmna kawngah a hneh phah hlea hriat a ni a, hei hi a lawmawm lehzualna a ni. Awle, Rev. Lalsawichhunga, PCM Assembly Moderator-i’n hunpui hlanna tawngtai a neih hnuah zalen taka hun hman tan a ni a, a hnuaia kan tarlan ang hian hun hman dan kimchang lo takin kan han tarlang e.

—Chawimawina Lawmman chi hrang hrang buatsaih a ni, hetiang hian:-
1. Zaithiam ber
2. Thuziak tha ber
3. Hlaphuah thiam ber
4. Guitar thiam ber
5. Rimawi tihmasawntu ber
6. VDC/CD Album Produce tam ber
7. Hnam lam chi hrang hrang humhalhtu tha ber
8. Music Band thiam ber leh
8. ZOIN Website tana thu thawh tam ber te, tiin.

PS: Music Band Chawimawina Lawmman hian Ks. 150,000.00 leh Certificate a kengtelin, mimal Chawimawina hian Chertificate leh Ks. 50,000 a kengtel a, ZOIN tana thu thawh tam ber chawimawina lawmman hian Ks. 25,000 a kengtel bawk a ni. Eds.

—Thuziak tha ber, thlannaa endiktute
1. Pu Zonunmawia (Convener), USA
2. Pu Ela Khiangte, Australia
3. Tv. Lalliankunga, USA
4. Pu Rikhuma, USA
5. Pu Vana Chawnghlut, USA

— Zaithiam thlannaa vote endiktute
1. Pu Vanlawmsanga—(Convener), Germany
2. Rev. Pu Rodawla—USA
3. Rev. Pu Lalnuntluanga—Philippine
4. Pu Vanlaltluanga—-Germany
5. Pu Liankhuma— Canada
6. Pu Lalrinenga—Japan
7. Pi Lalthianghlimi—Norway te an ni.

—Chawimawina lawmman dawngtute:
1. Zaithiam Lawmman Dawngtu: Tv. Lalnunsanga-T. Melody, Tahan

2009 ZOIN Award dawng tur a, zaithiam ber hi nominee atanga thlanchhuah mai a harsat avangin memberte hnenah vote thlak tura ngen a ni a, vote hmu tam berin Award a dawng ta a ni.

Zaithiam ber Award dawngtu Lalnunsanga T. Melody a ni a. Ani hi chu Zoram khawvelah chuan thrangtharten kan mi hriatlar pawl tak a nih ka ring. Zai a thiam mai ni lovin, Zofate inpumkhatna tura theih tawp chhuah mi a ni a, a zaithiamnate chu sum hmuhna atan chauhva hmang lovin, Zofate inpumkhat theihna tura hmanruaah hmangin mi tam tak thinlung a hneh em em thin a ni.

Tv. Lalnunsanga hi a zaithiamna leh a hun hlu takte hmanga khawchhak zofate hmel ti mawitu a nihna pawh hian Zoin Award hi a phu hrim hrimin ka hria.

2. Thuziak tha ber Award dawngtu Rev. Dr. Laithuama, PCM Tahan
Award pek a nih chhan hi thuziak tha thlakhawm endiktu zinga Convener–Pu Zonunmawia report atang hian a fiah viau vin ka hria. “Thuziak tha ber 2009 ZOIN AWARD dawng tu tur atana nominate zawng zawng thuziak 13 te chu nungthluk taka endikna neih a ni. Heng thuziak 13 te hi an tha hlawm hle. Thuziak endiktute mi 5 ruat kan ni a. Kan selection process tlem tarlan kan duh. Heng thuziak 13 te zing atang hian thuziak tha zual 6 thlanchhuahna kan nei hmasa a. Chumi zawhah chu’ng thuziak thazual 6 zing atang chuan thuziak tha lehzual 3 kan thlang chhuak leh a. Tichuan, chung thuziak tha lehzual 3 atang chuan 2009 ZOIN AWARD dawngtu tur kan thlangchhuak ta a ni. Thuziak nominate zawng zawngte hi an that dan a inang tlang hle a, selection process tan tirh atangin endiktuten a thazual 6 thlan chhuah bik tur hriat harsa an ti hle. Chutiang zelin thuziak tha lehzual 3 thlanchhuah pawh harsa an ti khawp mai. Mahse, an hna chu 2009 ZOIN AWARD dawng tur thlanchhuah anih miau avangin harsa ti tak chungin an mawhphurhna chu an hlen ta a ni.

Rev. Dr. Laithuama ziak, THALAITE LEH TUNLAI KHAWVEL hian; tunlai khawvel hmasawn zelah Zofate hun tawn mek a phawk fuh hlein a lang. A zirtir tum ber nia lang chu tunlai khawvel thang danglam zel hian thalaite nunah nun dan thar a rawn pianchhuah pui thin. Chung nun dan thar reng reng chu kum upa lamten an hrethiam lo va, pawm harsa an ti thin. Mahse, a thar hi kan hriatthiama kan pawm thiam chuan Kohhranah leh pawlhoah hlawhtlinna leh malsawmna kan dawng ang” tiin thalaite nun dan thar pawm thei lo tute hmin tumin kawng chi hrang hrangin thiam takin a bei nasa hle. A ziaktu hian a zirtir tum hi a sawifiah tawkin, a zirtir tum huang chhungah a seng lut fuh hle bawk a ni. Chuvangin, THALAITE LEH TUNLAI KHAWVEL tih ziak hi endiktuten lungrual takin thuziak tha ber—2009 ZOIN AWARD dawngtu atan kan thlang ta a ni.” a thuziak chhiar duh tan: http://www.zoin. info/thalai- te-leh-tunlai- khawvel/# more-6956

3. Hlaphuah thiam ber lawmman dawngtu:

Pu Marvin Lalhrilliana MA (Theo.), TahanPu Marvin Lalhrilliana hi mi danglam tak mai a ni a. A tleirawl lai atangin a piangthar a, Pathianin a hmang em em mai a ni. Hla tam tak a phuah mai ni lovin, zai hi a thiam em em bawk a ni. Cassette Album pawh a siam tawh nghe nghe.

Pu Marvin Lalhrilliana hi vawiin thleng hian Thalai zaipawl hruaitu tha a la ni fan a, a hlaphuahte chu tunlaia hla sak hlawh tak an ni. Pu Hrila hian hla (160) tha zet a phuah tawh a, chungzingah chuan solo a sak chi hla (80), Zaipawl hla (34), Inneih hla (3), Krismas hla (17), Ram awih hla (1), Sap hla (14), Kawl hla (2), Love song (3), Mi hla thluk siam sak (8) te an ni a. Heng a hla phuah tawh zinga hla (67) te chu cassette album a siam chhuah leh record vek tawh an ni. Pu Hrila hla cassette labum siama record tute 1.P.BK Liankhuma 2. Lalneihthanga 3. Rany Zaitea, 4. Lalruatfela, 5. Ma Tlana 6. Ma Chhingi 7. Lalenkawli (Ma Eni), 8. Pa Chhunga (Khiangte) leh Choir hla satute 1. Lunglei choir (UPC), 2. T.N.T Naupang ho 3. N.W.Y zaipawl Vol (1), Vol (2), 4. Inner Light (Kristmas hla) 5. L.W.Y Vengpui, Tahan 6. Krista thuhretute Vol (1), Vol (2) te an ni. Pu Hrila hi khawchhak zofate tan chuan kan hla kungpui ber a ni.

4. Tingtang thiam ber: Pu Thanthawnga—T. Melody, Tahan
A tum khatna atan chuan ani lo chu pek tur an awm lo tih tur hial a, mi hriat hlawh leh khawchhak Zofate hming ti mawitu—Thanthawnga of T-Melody hnenah hlan a ni. Pu Thanthawnga hi music a thiam mai nilovin a tlawmngai em em mai a, mi dangte hmasawn ve thei tura zirtir a peih em em mai bawk. Amah hi music thiam tih mai ni lovin, zai leh hlaphuah pawh a thiam em em mai a, kan naute ho thiam taka an zai theihna pawh hi {u Thanthawnga zirtir vek an ni. An aw nena inchawih tur hlathlan sak te hi a thiam hle bawk a, hla an sakin a mawitawka a part lo pek a thiamin leh an aw-lawite pawh lang lo turin music hmangin a lo thup bo vek thin hian a thiam zia a tilang chiang em em a ni.

Zofate inpumkhatna lamhawia thiltihhonaah chuan mawng zang takin a penchhuak thin a, a thiamna te chu kan hnam tan ui lo takin a hmang thin hi {u Thanthawnga Zofate tana a hlut lehzualna a ni bawk. Khawchhak Zofate zingah Thanthawnga anga nun pumpui music khawvela hmang ngam leh inpe zo an vang hle chauh nilovin, a music thiam zia leh a kutchhuak mawi ziate chuan Zoram khawvel a fan chhuak mek a ni.

5. Rimawi tihmasawntu ber: Pu Hmingliana (Vulmawi), Tahan
Zoram khawvela band lar tak lo ni thin, Vulmawi Band member zianga Pu Hmingliana (Vulmawi) hi kan hretheuh vin ka ring a. Upa tawngkam takin, kan naupan lai atanga stage chunga zai pah a, tingtang perh chunga mipui lo awi thintu a ni a. Thang thum liam dawn zat atawng tawh a, Zofate rimawi khawvel a thanduanna tura mi inhmang leh tuimi a ni a. Vawin thlengin music leh zaia inpawlhona lamah hotu chanchanga kaihruaitu lar leh tha a la ni fan hi a chhuanawmna lai tak a ni a. Ani kum ang rual tan phei chuan ani anga music lama inpek hi thilawl lo tak tur a nih laiin music lamah chuan a thekthawi hi a la zang em em reng mai hi a fak awm hle a ni. Chu mai ni lovin, zaithiam tam tak ten cassette album an siam chhuah theihna tura kawngkawh hmuhtu leh kaihruaitu a nihna te, vawin thlenga thalai rual ten hlamawi tha tak tak an sak chhuah theihna tur leh zaipawl album an tih chhuah theihna tura a la huaihawt tang tang thinte hi a hlutna leh mi tam tak aia, zofate music khawlvela a chungchuanna leh a danglamna a nih avangin he chawimawina hi hlan a ni.

6. VDC/CD Album Produce tam ber: Pu Ni Lian Sang(Tit Sar Oo), Tahan
Pu Ni Lian Sanga(Thit Sar Oo) thahnemngaihna leh tlawmngaih chhuahna azarah Tahan leh a chehvela cheng Zofaten Music Video (VCD/DVD) chi hrang hrang kan lo tihchhuah ve theih phah mai bakah cheng tam tak senga Album siam tura khawpui pan tul thinte kha; cheng tlemte chauh sengin awlsam taka a lo tih sak thin avangin mi tam takin Music Album an siam chhuah phah thei hi a hluin a ropui hle a ni. Pu Ni Lian Sanga zarah Tahan kutchhuak music video chi hrang hrang zoramkhawvelah a en theih avangin khawchhak zofate tan chuan mi chhuanawm, mi bik a ni lo tih rual a ni lo. Zofate inlungrualna lamah pawh a thawh hlawk em em mai hi a hlut lehzualna a nih avangin VCD/CD album prodeuder tam ber chawimawina lawmman hi hlan a ni. Chuchauh nilovin, he, 2009 ZOIN Award a hlawhtlinna atanah hian sum tam tak min puklawk tirtu a ni a, a chungah hian lawmthu kan sawi duh bawk a ni.

7. Hnam lam chi hrang hrang humhalhtu tha ber: Pu Zarlawma, Tahan B
Zofate hnam lam zing a, lam chi hrang hrang humhimtu—Award dawngtu hi Pu Zarlawma, Tahan “B” group a ni a. Ani hian kan hnam lam chi hrang hrangte chu dik takin a thiam mai ni lovin, a vawngtha em em mai a. Amah chauhva vawngtha nilovin thrangtharte’n kan mamawh hun apiangah mawngzang taka lam zirtir tura fehchhuakin, a zirtir thin a ni.

Tahan leh a chhehvela thalaite’n kan hnam lam kan thiam choh zel theihna tura a hun zawng zawng sen huam a, a thiamna hmang thintu a ni. Pu Zarlawma zarah thrangtharten kan hnam lam chi hrang hrangte kan lo thiam phah zel mai hi a vanneih thlak em em mai a, kan hnam rohlu kawlthatu zinga mi a nih avangin Zoin Award hi hlan a ni hi a phu hle a ni.

8. Music Band thiam ber: T. Melody Band
Music Band thiam ber Award: Hei hi chu sawi ngai lovin kan hresa vek awm e a, khawchhak mai ni lovin Zoram khawvelah tunlaia an sawi lar berte an ni a, a ber ni pawh a tih theih hialin ka ring. Khingtu nei miah lovin 100% vote hmuin T-MELODY hnenah Music Band tha/thiam ber award hla a ni. T. Melody band tia kan hriat, Tahan Melody Band hi band hming puala kawmna hi chiang takin kan la nei lo a, htiang khawpa Zoram khawvel an han dengchhuak te hi an fakawmna lai ni mah ze la, Zofate insuihkhawmna hawia hmalatu zinga mi an nihna tak hi ngaihsan an phuna kawng khat a ni. 2008 summer India state hrang hranga tour an neih pawh khan MZP Lunglei ten Zofate insuihkhawmna kawnga hma an lakna chu thupbo chi ah ngai lovin chawimawina chertificate ropui tak pawh an hlan a ni. Keini thangah hetiang band tha, Zofate insuihkhawmna hawia rilru pa tlat, T. Melody Music band kan nei hi a lawmawmin, a ropui tak zet a ni. Hun lo la kal lehzel turah pawh an band hian zofate insuihkhawmna lam tluang hi rawn sial zel turin duhsakna kan hlan a ni.

9. ZOIN Website tana thu thawh tam ber te: Pu J. Khuma leh Tv. Zalianthanga

Zoin website tan a, thu thawh tam kawnga thahnemngai zual bik–Tv. Zalianthanga leh Pu J.Khuma te hnenah chawimawina lawmman hlan a ni. Anni hi zoin website tana article ziak tam ber leh thuziak (anmahni ziak ni kher lo pawh) thawh tam ber an ni a, an thahnemngaihna avangin zoin website ah thuziak tha tak takte chhiar tur kan neih phah a ni. Tin, 2009 ZOIN Award semnaah pawh hian Tv. Zalianthanga hian a hun hlu tak sengin, hmalatu zinga a lungthu pawimawh tak pakhat a niin leh Pu J. Khuma pawh hi he hunpui buatsaihna a, a lungthu pawimawh ber zinga mi niin Sub. Committee Secretary a ni. Anni pahnih leh ZOIN Awards semnaa an thawhpui zawng zawngte hnenah Huivalenthiamten kan lawmthu kan hlan a ni.

Awle, 2009 ZOIN Award semna hunpui a hlawhtlintheihna atan hian Pathian hnenah hlawtlinna dilin tawngtaimiten nasa takin tawngtaina an nei a, buaina leh harsatna awm miah lova kan hlawhtlin avangin Pathian hnenah kan lawmthu awm se la.

Tin, kan hunpui a hlawhtlinna atan hian ram chhung lama thawhpuite chauh ni lo, huivalentiam member awmna ram tinah chanvo te te insiam diah diahin, chu kan chanvo theuh chu thahnemngai tak leh lungrual taka hmalakhona kan neih avanga hlawhtling kan ni, tih hi ZOIN inlengte leh huivelenthiam member zawng zawng te hnenah kan lawmthute nen kan sawilang duh a. Hun lo la kal lehzel turah pawh tun tuma kan thawhho dial dial ang hian thawhho dan thiam zel ila, tichuan Huivalenthiamin Zoram khawvel tana a hmakhawhna hian khuavel a la chhing zel ang, tia sawmna nen 2009 ZOIN Award Hlanna chungchanga kan dinhmun inhriattirna nen report bei tham takin ka rawn nei a.

Tin, Zo International Network  Award 2009 hian a thil tum leh a beiseite chu a hnuaia tarlan ang hian a ni.
1) Zo hnathlak hnamthuam chi hrang hrangte pho chhuah a, a mawizia leh a ropuizia hria a thrangthar ten an lo ngainat deuh deuh theih nan
2) Ziak leh chhiar lamah hma kan sawn zel theihna tura ziak mite chawimawi
3) Music leh zai lama tui mite chawhphura literature tih hmasawn zel te leh chawimawi phute chawimawi
4) Thangtharte zingah kan hnam lam leh kalphung vawng nung reng tura zirtir leh
5) Zo hnam chi peng hrang hrang ten inpumkhatna tha zawk kan neihtheihna tura thawh ho.

He’ng kan thiltihhona atanga Zo hnahthlak zinga chi peng hrang hrang ten inneltawnna tha zawk kan lo neih a, inpumkhatna tha tak kan neih theih beiseiin “Zofate Insuihkhawm Zai I Rel Ang U” tih hi kan thupui ber a ni.

Hei le, a hnuiah hian thlalak hrang hrang kan dawn te chu kan han vawrhchhuak nghal bawk a, duh aiiin a fiah lo deuh mai thei a, kan inhriatthiam tlan kan beixsei tak zet a ni. Beisei anga a kal theih chuan VCD pawa siamchhuah tum a ni a, tlawmngaiin inlei sak kan dum dial dial a ni ang chu.