Nikhat chu damdawi in pakhatah mi an buai mup mup laiin putar kum 80 mi vel hi zing dar 8:30 ah a rawn kal ve a. Kar kal ta a, a kut lehlam an operation chu a thuina phelh tir tura rawn kal a ni a. A rawn thlen ve chuan “Vala, zing dar 9:00 ah hian appointment pawimawh tak ka neih avangin ka hman hmawh hle a, min tih sak nghal thei mai em tiiin min zawt ta nghal a”. A hming leh a kum te chu lehkha buah ka ziah luh mek lai chuan “ka pu, kha tah khan lo thu la min lo nghak rih lawk rawh” ka ti ta a.

Operation tuamna phelh sak tur chuan doctor pakhat khat in an en sak zet hnua phelh sak tur a ni a, mahse doctor pakhat tal hman tur pawhin dar kar khat dawn lai a la nghah a tul dawn bawk si, Putara lah chu a hmanhmawh phili ve bawk nen a hman awm chhun ber ka nih vangin keimahin ka han en sak mai teh ang ka ti ta a. A kut tuamna chu ka han phelh sak a, a hliamte pawh chu a lo hil in leh a lo dam hle tawh avangin doctor dang pakhat hnenah chuan a thui phelhna bungrua la turin ka chah a, ka phelh sak ve ta nghal mai a. Chutia a hliam thuina ka phelh sak mek lai chuan kan ti ti tan ta nghal a….

“Ka pu, eng thil pawimawh nge ni ta, chu ti khawpa appointment pawimawh I neih tak chu le… “ti in ka zawt a… A ni chuan” A..thil pawimawh dang vak chu ni love….tar dam lo enkawnna hmunah kan nu nen zing chaw (breakfast) ei dun turin kan inthiam a, zing tin a hun dik takah kan ei tlang thin…”a ti a. Aw… a nih tak chu maw le, ka Pu, in nu chu hnathawktu nge a nih a, a mah a dam lo zawk tiin ka zawt leh a, a ni chuan “nia…thluak lam chhian lohna khirhkhan tak mai a neih vanga enkawl mek a ni….a ti leh a….keipawh chuan dil chhut takin ka han zawt zui ta zel a………

A nih chuan ka Pu, “breakfast ei tur chuan tlem in tlai ta deuh la, ka pi chu a lo thin rim viau ang em” tiin ka han zawt ve leh talh a….Putar chuan….. “E..kan nu chuan tu ka nih pawh min hre tawh hlei nem…..min hriat tawh lohna hi kum 5 lai a vei ta” a ti awlsam et mai chu ka mangang hle mai a. Aw….chutianga nangmah pawh hre tawh lotu che hnenah chuan zing tin tuk tin a hun dik takah kalin breakfast I va ei pui thian a nia maw….. I va han taima ve ……ka han ti leh kher kher pek a….…..Pu tar chuan Nui suik hian min chhang a, ka kut chu nghet takin a hum bet a…..ti hian min hrilh ta a ni…
“Ni e, tunge ka nih tih min hre tawh lo tih chu chiang hle mahse keimaha awm ka chhungrila mi hian tunge a nih tih chu englai mahin a theihnghilh ngai lo a sin” tiin min chang ta a ni.

Chu Putar chhanna chuan ka thinlung chhungrilah na sa takin min denga ….Putar hmaah chuan ka mitui a thla ang tih hlauvin ka insum na sa hle a. A ni chu muang changing tar dam lo enkawlna lam pan chuan a kal chhuak ta a. Aw…he tiang hmangaihna hi a ni ka dam chhung tana ka duh leh ka beisei, kawl ve reng a tana ka lo suangtuah thin chu tiin ka nghaituah ta vawng vawng mai a ni. “Hmangaihna dik tak chu Tisa chakna leh rilru lam chakna ti famkimtu chauh ni lovin kan hmangaih ten min hmangaih let ve emaw hmangaih let lo emaw pawh nise englai pawha kan hmangaih theihna, an lak atanga phut let engmah nei lova kan hmangaihna hi a ni” ti dawn ta ila kan pawm tlang thei ang em?

Kan nitin nun kawngah hian Hmangaihna Dik Tak tih thumal hi kan hmang fo mai a, kan sawi reng mai bawk a, nimahsela hmangaihna dik tak chu he tiang chiah hian a ni ti a hrilhfiah dante leh pawm dante pawh a la in ang lo fo zel a nih hi……..Chuvangin he thawnthu tawitea Putar in a nupui a hmangaihna ang hi hmangaihna dik tak chu a ni tiin sawi dawn ta ila pawm thei mi tam tak kan awm laiin la pawm thei chuang lo pawh kan la awm mai thei bawk……engpawh nise beisei leh phut let nei miah lo hmangihna dik tak chu kan ngaihlu theuhvin ka ring.
He thawnthu a, a changtu Putar hmangaihna hi ka ngaisangin ka zah hle a……chhiartu zawng zawngte pawhin Hmangaihna Dik Tak chu in zawn hmuh theuh theih nan …..duhsakna ka hlan a che u…..

NB: Original chu English ni awm tak a ni a, Kawl tawnga (miss green)an lehlin tawh hnu min rawn thawna khawhar hnemah Mizo tawngin ka han letling ve leh mai mai a nia. By Vanlal Zawma