HMAN NI CHU (II)

By Valtea, Melbourne

Hman ni chu, Zoram khaw chhak tlangdung ka han fang tak tak a, hmana ka bialnu hluite chhangchhe taka ka tawn leh nual hnuah tun hma a, ka bialnu bialpa pawh ka hmu ve ta nawlh mai!  Tun hma ang khan kan karah thikthu chhiatna thu reng awm ta hek lo, thiantha tak ang maiin, hlim takin kan inkawm bawrh bawrh mai a, “Jerusalem tharah chuan Sakeibaknei nen pawh,” tih ang deuh kha a ni awm e.   Kan inti chhung em em vel ta mai mai.

Pawltlak thla, Ni 20. Kan nau Zaia’n a Bolero a en fel hnu chuan muangchangin Champhai lam kan pan chho a.  Selingah Zopa tana chawhmeh tui ber, vawksa rep, a kawchhung chhum nen kan han ei tak tak chu, ei man pek belh ka chak rum rum mai.  Ka pu ni bawk, ka nau ni bawk, Ela a tel a, Champhai Mami Varte kan tih mai chu a tel ve bawk a. Champhaiah ka tan liau liau a, Grape tui, duhsak taka an lo um chu kan lam chho a.   Rihkhawdar leh Khawbung lam pan tur kan ni.  Zotlang zan vawt tak maiah kan riak chho a, thlen in ten min thleng zo ngang mai. Tum lawk pawh awm miah lovin, YZTP model, nula ria nalh zet, Korea film star ang ve tak chu kan zinna apianga tel ve turin kan thlen inah chuan a rawn lut ve tawp mai kha, a tu ber tawngtai chhanna nge ni ta ang?  A mah zawk kha a ni thei ang em?

Ni 21. A tuk chuan Tiau ral chu Champhai SP remruatnain Official takin kan kai a.  Rih pasaltha Pu Rohngaka ka ral hnu chuan, hun rei tak ka hmuh tawh loh pi leh pute pialral kaina Rihlipui chu ka fang leh ta.  Tleitir chhingmit ianga meng pawl thin, Rihlipui chuan tlang karah nuih zai a rel thei ta lo.  Rih dil chuan danglamna vak nei lo mah se, a kam vel erawh chu awm nuam lo khawpin a danglam ta thung a.  Lung pawh a leng hlei thei lo.  Haw lamah Tiauah kan chawl a, hman ni lawka min boralsan, ka thianpa Zonunsanga ka ral zawh chuan chakkhai te dapin kan haw leh ta a.  Khawbunga riak phei tur kan ni.

Mizo hla khun tak tak ngaithla pah chuan Zoram tlang mawi lutuk chu ka thlir ning thei mawlh lo. Lasi nula, Chawnglinleri lenna ni a mawi, khamrang chhengchhe takte chu tlai tla eng chuan a chhun paw riai a, han tlan pelh theih mai an ni lo.  Lungchim takin kan thlir ngawih ngawih mai a ni. Titi thiam leh fiamthu thiam tak tak pahnih leh nula pakhat chauh ka zinpui na a, kan ri nak nak hlawm a.  Khawbungah chuan Nghalpui sa, Mizo chhum dik tak chuan min lo hmuak a, kan inchhuang hle.  Tui kan ti ngang a ni ang, a tukah pawh min chhum sak leh ringawt.

Ni 22. Sik ni eng mawi tak chuan Khawbung tlang dung chu a rawn en mawi hle a.  Thingpui kan in zawh chuan Hlakungpui Mual pan chuan kan chho ta sang sang a.  Thlan ropui ka fan tawh zingah chuan a la tak ber awm  e.  A kimtlang leh mawina te, a ropuina te ai mah chuan a takna chuan mi a hip na zawk a.  Tiau chhum zing paw chiai chungah chuan Thu leh Hlaa mi rilte hriatrengna mual chu a cham phei diai a.   A hmasaber atang chuan uluk takin chibai ka buk phei zel a, an thlanlung chu an chanchin ziak nan a lian tawk lo ka ti hle.  Chu hmun atang chuan chhim lam ka han hawi phei a, Mizoram tlang sang ber Phawngpui (Phulpui tihna) tlang a lang paw chiai a.  Ka’n hawi thla leh a, Selesih sang sarih, Mizote thlang an tlak(1750-60) laia hmun hlui chu a lo lang iar a.

Lung tileng zualtu atan kan Grape um chu kan thli deuh reng a.  Dung tlang in sangsarih lal fanu hmeltha, Lianchhiari lunglen tlang kan pan hngal a.  Kan model hruai chu Lianchhiari lunglenna lungpui pohchhuak takah chuan a thu larh a, hman a, chan tawka lungawi zo lo, Lianchhiari’n ngai em em a, a thlir nin theih loh, hnam chawm fa, Chawngfianga te khua chu a thlir ve vang vang a, suangtuahnain Lianchhiari khawvel kan fanpui a ni ber e.  Palai rinawm loh pawi zia hi zofate zirlai a tling hial awm e.

Lasi zawl pha, thangtharte nun nin vanga fam ta, Thasiama se no neihna, hringfate tan pawha thlen har, kham chhawrdawh chu kan pan leh vang vang a.  A kal ngai vak awm ta lo chu, kalna pangaia kal ta lo chuan kham ang titih chhawr dawh tak takah chuan kan ban kual chho vel a, a nuam dang dai ve tho mai.  Hun chep tak karah chuan, Tan kham hnuaia lo hnam chhuak, fahrah tui chang ve thei lo, Fiara tui an tih hmun pawh chu kan va tlawh leh a.  A chung tlang ngaw chuan a khuh hneh vang emaw ni, rin loh takin vur a lo tla var sang a, kan khawih laih laih a.  Fiara tui khur thuhruk han thal a, han in khiah khiah bik chu nuam ve tak a ni.  Fiara tuiin hmai I phih ve tawh em?

Ril tam tawka chaw kan fak hnu chuan Khawbung pasaltha Pu Sawma leh Ela nen Sanghal pel turin kan inkhalh chhuak leh a.  Chul rama thlamah chuan ro kan han  rel a, kan thlanga ngaw chu enin sa channa tur kan insem thliah thliah a.  A pawi ber mai chu, Torch Light ka ahchhuah theihhngilh tlat mai a nih chu! Thimtham deuhvah chuan thiante pawh kan hmu sakhi mai ang tih pawh a hlauhawm hle.  Sanghal pawh lo chhuak se, ai-mit-thlawn chung chuan cho rual a ni dawn si lo tiin chul rama thlam chu bawkvak titih chuan ka pan chhova, vawi hnih khat chu awipangah ka lum hnge hnge.

Tapchhak meilumah chuan Khawbung pasalthate nen thingpui senhang in pahin zan tlai thleng kan inkawm ta hlawm a.  Khawvel changkannain rawn hrut chhuak ve tawh tak mahse, Zopa taka tapchhak zawla tuibur hmuam paha han inkawm chu a lo nuam bik hle.  Zofate luah ram zawng zawnga laili ber, Khawbung chuan lung min len a, a ram ngaw dum dur mai chuan mutmu pawh tuah thei lovin mi thlem reng mai a.  Va fang leh ila, Chawngtinleri’n zah ngai tak ang maw?