By: Allenby Sela, Sapir Academic College, Israel
Tunlai hian Israel rama khawpui pakhatAshkelon khuaa Damdawi In hmingthang zet mai, Barzilai Hospital-ah Palestinian sipai hliam tuar engemaw zat enkawl mek an ni a.

Anni hi Palestinian sipai rau rauah Fatakh pawlte niin an unau Muslim firfiak leh an Islam sakhaw ruihchilh pawl Khamas hote sawisakna tuar lova, Israel rama nun himna beiseia rawn tlanchhiate zinga mi an ni a.

Mahni kea ding leh ngai tawh lo tur leh, mahni kea kal leh thei tawh ngai reng reng lo tura an Khamas unauten an sawisak an ni. Hmanni lawk khan Khamas sipai leh Fatakh sipaite inbei lehin, a nunrawng zawk Khamas ho chuan hnehna an chang leh ta a, Fatakh mi engemaw zat an sawisak hlum hnuah, Fatakh sipaite chuan ban phara in pekin awmzia a neih loh zia hriain Israel sipaite hnenah chhanchhuak turin an tah-awh ta tawp mai a.

Tichuan, Israel sipaite chuan an tan kawng lo hawn sakin Israel ramah an lo la lut a, hliam tuar ve lo engemaw zat Jericho lama an thawn liam laiin hliam tuar engemaw zatte chu Damdawi Ina enkawl turin an hruai ta a ni.

Heng damdawi In a enkawl zinga pakhat Fuad Khiles chuan thaw huai chungin, “Israel sipaiten ka nunna min chhanhim sak bakah, Israel Nurse ten min enkawl mek a ni a, kan hmelmate ti a kan lo sawi thin kha kan nun min chhanhim saktute an lo ni reng zawk mai!!” tiin “Gaza

City leh a chhehvela thil tlawm ber chu Nunna a ni,” a ti a. Khamas ho ten dimdawina leh lainatna nei miah lova anmahni pawl ni ve lo te an sawisak dan leh an thah dante, thinphu hlawp hlawp chungin a sawi a. “In sawisak dan style thar Iran atangin an zir chhuak a, chu chu damchhunga ke a ding leh kal leh tawh ngai reng reng lo tura khup a inkahsak te, mawngkuaa Gas pipe hnawhluha Gas thunluh sakte a ni,” a ti a, “An sawisak hlum lohva damchhuakte pawh Wheel chair a damchhung hmang tawh turin an zuah chauh thin a ni,” tiin banphara in surrender pawhin awmzia a neih loh zia a sawi.

Hliam tuar zinga pakhat Ziad abu-samek chuan a ke lehlam chu tan a ngai ngei dawn tih a hria a, an sawi sak dan a sawi danin lungtum leh an silai kawmin a khupruh an chhuttliah sak bakah a ban ruk an vuaktliah sak bawk a. Kum 35 mi lek a la nih thu te, fa 3 nei lai, a nupui pawh raipuar mek a nih thu te sawiin, Israel Nurse te enkawlna zarah a hliam chu a thihpui dawn lo tih a inhria a. Mahse, engtiangin nge a nupui fanaute a chawm tak ang tih chu a rilru tibuaitu ber a lo ni ta a. “Khamas ho chu Muslim pawh nilo, Setana pawl dik tak, Allah zahna pawh nei lo an ni,” a ti phiar phiar mai a, an thian hliam tuar dangte pawhin Damdawi In atanga chhuah an nih hunah pawh Jericho-ah emaw, Ramallah khuaah emaw awm an duh tawh thu sawiin Gaza City a let leh chu Setana pawlte hnuaia intukluhna leh satalh tur, satalhna hmun lam pan tur ang chauh annih thu an sawi.

Palestinian Political party pakhat, Khamas an tih ho hi Palestinian hnam rau rauvah an sakhaw ruichilh tawp ho annih avangin anmahni pianpui unau, Kristian sakhaw biate pawh an ngaithei bau lo va. Muslim sakhuaa inlet lehtur leh Kristianna kalsana Islam sakhua zui tura nasa taka an vau chamchi bakah nasa takin an sawisa thin a, a thahte pawh an that hial thin a ni. Gaza City a Fatakh ho laka hnehna changa Khamas hovin rorelna an chan a chinah phei kha chuan Kristiante chungah tihduhdahna a thleng nasa em em a, an Bible Socitey buildingte halsakin an suasam sak a, kumin chhung ringawt pawh hian Gaza City ah Kristian sikul tumhnih ngawt an suasam sak tawh a, an thil neih tha leh hlu tak takte ruk sakin an tihchhiat sak teuh bawk a, an Biak In te, an Thlanmual te, an Internet Café te, YMCA Library te suasamin an lehkhabu pawimawh tak takte an halsak thin a, thlaphang zek zekin an awm a ni ta ber mai!!

Tin, tumkhat phei chu an Kristian a nih vang hrim hrimin, fa 2 nei leh nupui raipuar lai nei, Kristian bookstore a Manager Rai Ayyad chu Khamas ho ten Gaza City khawpui lunlai takah rawng takin an kaphlum nghe nghe a ni. Gaza City ah hian Palestinian Islam sakhaw zui mipui 1.5 million karah Palestinian Kristian 3,000 vel an awm ve a, Rinna in an loh avanga unau leh hnamkhat karah pawh insawisak duhna leh in thah duhna hial rilru a lo piang thin hi a tha lovin a atthlak ngawt mai!! Osama Bin Laden-a pawlten Gaza City ah hian kua an hreuh thuk hle tawh a, Khamas ho nena tangdun annih avang leh an sakhaw atchilh annih avang hian Palestinian Kristian unaute chuan kutthlawn an tuar an tuar ta mai a, hei vang hian, mi pawi sawi lo, pawl pawl ti ve lo, beramno hmul mettu hmaa a ngawi reng ang maia Isua Krista ram ti zau tura inngaitlawm taka awmte chunga kutthak an thlak ta vak vak mai hi Setana hnathawh chu a ni mawlh ang!!

A pianna Bethlehemah tak ngial pawh Kristian an kiam sawt hle ta mai!!. A chhan chu Bethlehem khuaa Kristian ho In leh Ram te chu Muslim hovin an hnehchhuh zel vang a ni. Tunah hian Israel ramah Kristian Nuai khat leh singnga vel zet an awm a, chung zinga nuaikhat vel chu Arab Kristian niin an khaw thianghlim Nazaret, Bethlehem, Jerusalem leh Shfaram-ah te an cheng hnem ber a, khaw te nau te te ah te leh Gaza City, Kapernaum etc. a cheng pawh engemaw zat an awm bawk a, heng Arab Kristian ho hian mak tak maiin Arab pui Muslim ho, Islam sakhaw be mite aiin Israel Judate an ngaina zawk daih mai hi a ni.

Tukkhat chu Bethlehem khuaa Kristian chhungkaw engemaw zatte chuan an In hmun, an hriat miah lovin midang hnena hralh a ni tih an hre chhuak a, an thin a rimin an rilru a na ngawih ngawih mai. Bethlehem Governor Salah Ta’amari chuan, “Heng Kristian ho In hmun te hi a neitute hriatpuina lova hralh a ni ngei a, amaherawhchu Bethlehema In leh Ram nei si, ram pawna awm te ta anni ber,” tiin awlsam leh ngaihsam takin a zawttute a chhang an ti. Bethlehem khua chu a Pianna khua a nih avangin khawvel ram hrang hranga Kristian khualzinten an tlawh mur mur reng a, hei vang hian ram hrang hrangah hmelhriat leh thiantha siamin khawsak changkang zawk nan Bethlehem Kristiante hian ramdang an pan thin a ni ngei ang, tunah hian heng Bethlehem Arab Kristiante hi US leh Latin America-ah tam tak an awm a, an awmloh hlan hian an In hmun leh an ram chu a rukin Isua hre ve lo Muslim Arab ho ten an lo hralh sak ta thin a ni. Palestinian Kristian sumdawng pakhat chuan hetianga titute hi Palestinian Security Officer te nena tangruala a ruka inthlungru niin a ngai.

Jericho a Isua ram a zau duai duai laiin a pianna Bethlehemah erawh chuan Islam sakhaw vuantu an Palestinian unauten huaisar chhuahin an nekchep rawp rawp a ni ber mai!! Tunhma deuh, Israel sipaiten Bethlehem an awp lai kha chuan zalen takin an awm thin a, tunah, Israel sorkarin anmahni Palestiniante inenkawl tura thuneihna a lo pek tak a chinah hian Kristiante chu Bethlehem-ah meuh pawh an chep ta rap rap mai a ni.

Osama Bin Laden-a pawlte nen inzawma, an sakhaw zui ve duh lo te vau bet a, an nunna hial an laksak duh tak avang hian Khamas ho chu mi tam takin Setana pawl an ti ta tawp mai pawh hi a awm lo lem lo niin a lang tan ta. Amaherawhchu Isua seilenna Nazaret-ah erawh thung chuan Kristiante an eng a thlawl hle a, tunah hian khawvela Kross lian ber tur, hla tak atang pawh a chiang taka hmuh theih tur an din mek thung a, hei hian Setana pawlte lenna Gaza City a Palestinian Kristian unaute pawh thlamuan pha ngei tura rin a ni.