Editors’ Hla Thlan (Video clip)

Ka Hmangaih Che A Sin.
By: Puibawiha.
Hmangaihtu nei ve lova inngaihna leh mal ngawih ngawiha inhriatna hi thil tawrh hreawm tak a ni ngei ang, a chhan chu mahni hial intihhlum duhnate pawh miin an lo neih phah chawk reng hi. Tin min duh vetu leh hmangaihtu neih kan thlakhlelh zia leh a nuam zia ngaihtuah ringawt pawh hian hmangaihtu tawng lova nun chu thil hreawm tak tur chu a ni. He khawvelah tuma hmangaih tlaka inngai lo leh sual ngawih ngawiha inhriaten hmangaihtu an nei a ni tih an hriat theih nan “Lal Isuan a hmangaih che” tih hi ziakin hmuh tur tam tak a awm a ni.

A bik takin nula leh tlangval inkarah, kan tih mi takten “ka hmangaih che a sin,” tia biahthu min hlan hnap tluka hriat nuam leh thlum hi he khawvelah hian a awm awm lo ve. Vawiin niah hian khual khuaah kan awm a ni emaw, mahni in chhungah kan awm pawh ani thei e. Tin mahni hnathawhna hmunah emaw, rawngbawlna hmunah kan awm a nih pawhin www.zoin.info chuan he hla hi a hlan che a, i bula mite hnenah emaw, I ngaihzawng hnenah emaw, i pasal/nupui fanau hnenah “Ka hmangaih che a sin” tih hi i hlan ve dawn lawm ni? Chutiang bawkin i duh tak khan vawiin niah hian (khual khua atang pawhin- Pu Dika ka tihchhan a ni lo a nia) “Ka duh ber che, ka hmangaih ber che,” tiin a thinlung chuan a rawn chhanglet ve ngei ang tih i zuk hriatna mai pawh hian tuma hriatpui hauh silova lawm veng vengna leh ngaihthat hliah hliahna a pe thei hial ang che ti raw.

Ram tina leng zo hnahthlak u leh nau zawng zawngte he hmangaihna hlu hi inhlan tawnin, kut insuiha pheikhai vawrin han leng siau siau mai ila a va nuam dawn em! Chhungkua pawh inhauh leh innghirnghoa awm ai chuan inhmangaih dial diala awm chu nuam tak a ni a. Tichuan, kan awmna hmun theuhah zofate khawvel chu a lo parvul leh anga, rethei leh thawkmawh chhungten thlamuanna leh hlimna an lo chang anga, nei nung zawkte lawmna chu tihpunin a lo awm bawk dawn si. Zonunmawi chu kan thinlung chhungah lo par vul lehin hring nun khawvelah hian hnam vannei ber kan ni ngei ang.

Keizawng min hmangaihtu leh hmangaihtur pawh ka nei ve lo tiin i lo inngaihtuah buai a nih chuan khawngaih takin hei hi min lo hriat sak ang che, “I hnam (mizo/chin)-in a hmangaih che,” tih hi.

Ka Hmangaih Che A Sin
(Uluk taka i ngaihthlak chuan a mawi zia i hmu chhuak ngei ang)

•Tinkim ka han dawn changin… tawn loh kar hun tawite pawh,
Kei ka tan kum tam iangin a rei lua a sin;
Min han dawn ve thin che maw…ooh ooh wao,
Ka duh lai mampui. (x2)

Cho: Ka duh ber che, ka hmangaih ber che (lungrun),
Tia biahthu ka hlan che hi;
Min la rinhlelh sak dawn em ni?
Ka hmangaih che a sin.

• Zantiang chhawrthla eng riai hnuaiah… mahten ka han dawn thin che,
Awm har lunglen tuar a har kei ka tan tahna mai maw;
Min han dawn ve thin che maw…ooh ooh wao,
Ka duh lai mampui.

** Cho… Intro. x Cho…
~~~~~~~~~ @.X.@ ~~~~~~~~ //