Pu Lalnunzama Hlate!!!

Eden Huan Iang Buannel Ram:
A tlang phul mawi nen inkungkaih leh inchawih mawi taka hla phuah thiam Pu Lalnunzama te ang Zofaten kan nei hi a vanneih thlak thin e. A hla thu hi a khunin, a thluk pawh a mawi a, a satu Tahan Nl. Zaithiam Lalsangpuii lah hian a sa lungrunin a sa kul thiam. Tin, rimawi tumtute lah hian a chawihmawi tawk tur an hria. Tute nge rimawi tumtute tiin min zawt maw? E.. le, an sawi T. Melody Thanthawnga te kha maw le!!!

Hui ha, han ngaihthla ve mah teh, a Buannelna tak a hailang chiang teh a sin. Pu Nunzama hian hetiang ang chi hla mawi hi a phuah nuala hriat a ni. He thu ziah lai hian a hla phuah ril tak tak te kan hre kim thei hrih lova pawi kan ti hle mai.

Tin, He hla mawi tak hi Mizoram zaithiam hming thang Pu C. Vansanga pawhin thawk khat lai khan a lo Buannelpui chem chem tawh a. A hunlai kha chuan Mizo hla lar ber ber pawl a tling awm e.

Kum 2006, Tahan Chapchar Kut kutnaa Pu Lalnunzama hla ril tak tak hailan a ni hi a ropui tak zet a. Hetia, Zaithiam Sangpuii’n “Eden Huan Iang Buannel” lungrun taka a’n sa hian hranghluite lunghlui a tuai thar hle, an ti. Nuthlawi pakhat phei chuan “He hla ka ngaihthlak tawh hi chuan “Maurua ianga tuai thar leh thin hi ka va nuam em!!” tiin a kurpui duah duah thin an tih pawh hi mawh lo tak a sin.

Khuanu ruat loh Di
Tin, Mizoram zaithian pi Zosangliani’n(?) a larpui em emna hla “Khuanu ruat loh Di” pawh hi amah Pu Lalnunzawma irawm chhuak tho a lo ni reng mai. Ti hian Tahan zaithiam Nl. Annie Lalthankimi’n Chapchar Kutna atan—Khuanu ruat loh Di tawn a har zia chu thu leh hlaa kurpuiin mipui a awi hlerh hlerh a ni e.

Mizoram Zaithiam C. Vansanga hming hi a hunlai na na na chuan Zoram khawvelah a mikhual lo hle tih hi thu dik a ni a. Tin, C. Vansanga larna hla hi eng hla ber nge tiin inzawt ta ni ila, “Buannel Ramdai” tia kan sawi hmasat ber loh pawhin “Chi-buia” tih hi a ni ngei ang. Chu hla ngei chu a lo’m a hnuaia Tahan Nula Zaithiam Estheri’n mipui awia a thlawh veng veng chu.

Chi-Buia

Tin, Hla phuah a thiam avanga Mizoram Chanchinbu lar tak buatsaih “Lelte Award” pawh 1994 kuma lo dawng tawh, amah Pu Lalnunzama hi Rih lipui chhak lawma awm—Phunte khaw chhuak niin Tahan-Pyinkhone-a an pem a. Tichuan, Pyinkhone khua atang chuan Mizoram lamah a inbengbel leh ta a. Hla hi thahnem tawk a phuah tih thawm erawh kan hria a. Mahse, a hlaphuah zinga hla lar tak tak (Ama phuah tih) kan la hriat hrih loh pawh a la awm chiangbal ang.

Hetia, Chapchar Kut kutpuinaa a hla lar zinga hla li (hla khat hi youtubea dah a la ni lo a) zet mai Tahan Nula Zaithiam, Nl. Lalsangpuii (Buannel), Nl Esthari (Chibuia), Nl. Annie Lalthankimi (Khuanu ruat loh Di) leh Nl. Vanlalchhuangi’n (Rawllai Ka Di)-ten an han kutpui hi kut nen a inchawih mawi tak zet a ni e. Hengte avang hian Pu Lalnunzama hi chawimawi a phu hliah hlaih a, ZOIN chuan uang taka tlangaupuiin amah chawimawina atan a hla te kan rawn phochhuak a ni.

Han tuihnih zel ila. Pu Lalnunzama te khua Tahan-PinkhoneLay hi 1929 kuma Pu Lalbuaia khawsah a niin Khawlphai phai duaia Zofate khuaa khawpui 3 zinga chhiar tel leh khaw upa ber ber nihna hautu khaw thum zingah chhiar tel a ni. Awle, Pyinkhone khua hian talent tha tak tak nei a thawhhlawk hle a. Chu’ng talent neitha zinga kan hriatlar ber tura chu Zoram khawvelin Musician lar kan neih zinga mi, Pu Darthuama (EsEs Recording, Aizawl) a ni tih hi ka han zep tel zeuh a ni e.

Tin, tunah hian Pyinkhone khua in 300 vel dinna khawpui a ni e. Tahan atang khian KM 2 vel hlaa awm a ni tiin Hla phuah thiam Pu Lalnunzama chanchin bei tham takin ka han thailang a ni.