LUNG RUN DI

Zara (GTI)

Naupan laia tahbelh lote chauh lawmman pek tur ti ta se, lawmman dawng pha lote zingah pakhatna ka hauh thei mai awm e. Zanriah ei kham atanga ka han malkalh tak tak chu ban zai rel lawk duh lo ih, mut hun thleng pawha ka la ngik fuk fuk avangin ka nu tihngaihna hre lo chuan: ‘Chu! Khairek a lo kal a nia, a man ang che’ tiin min tihthaih a. Chu veleh rang mangkhengin ka nu chu ka pawm a, a tangah ka bei a, ka intimuhil der nghal bawk a. ‘The hmeh ang mai, a va thawventhlak ve’ ti pahin ka nu chuan ka lu a chul a, ka bianga mittuite pawh a hru nghal bawk a.

Nikhua ka lo hriat ve chinah ka nu chu heti hian ka zawt pek a. ‘Nu..Khairek i tih fo thin kha a awm tak tak em?’ ‘Awm e..saw ta saw’ Ka nu chuan kan tap chung chu a kawk a. Rapa saum bur inkhai, ka lu tiat dawn lai chu ka chho en a. ‘Nang phiangsen hi maw ka lo hlauh che ni’ tiin ka nui ta ringawt a. Tuna hma azawnga ka lo hlauh em em thin kha tunah chuan a tel lovin ka tlei thei tawh si lo va, nuih mai loh chu tih tur ka nei lo reng a ni. Khairek chu saum bur a ni a. Tap chung, rap hnuaia inkhai kumkhua, mei khuin a ur ni tin avanga a pianpui rawng pawh pu hlei thei tawh lo, mawm, ung, bal tlingtleng, dum kheihkhuih, tle relh te hi a ni. ‘A hmelin zoh hlah, a anin ngai aw’ tih ang deuh khan, a lan danah ngaihno bei fahran lo mah se, a chhungah erawh chuan lei lem tel hlauhawm khawpa chaw ei tituitu chu a thul khung ve tlat. Mizo pa (Mizo nu kan ti zawk ang nge?) kut chhuak dik tak, ‘Saum’ kan tih ngat kha a ni chiang alawm le.

Pi pute’n saum an lo hmuh chhuah dan hi sawi dawn ila, ‘Ngaihruatin lunglen a hril che che’ tih ang lek a nih ka ring a. Lung tihlen loh em ai chuan a che che chinah tal zal ban i han tum chhin teh ang! Hmasang pi leh pute khan an lo chenna Chinlung puk chheh vela China-ho tih dan zirin sa an lo um ve a ni ang e tiin ngaihdan mawlmang tak a neih theih a. Mahse, tun laia China saum kan tih leh Zo pa saum pianhmang lah chu intu lo tak hi a ni lawi si a. Chuvang chuan China-ho tih dan zawng an zir lo viau ang tih pawhin ngaih dan a siam theih bawk a ni.

Tin, kum zabi engemaw zat kal taa Arab sumdawngte khan kawnga an in atan bawng leh kel hnute chu savun thawlah thunin an zinpui thin a. Kawnga an thang rei thin avangin, chung bawng hnute leh kel hnute an kente chu a khal zo va. Tichuan, an rin loh takin ei mi dangdai tak an hmuh chhuah phah ta hlauh a ni. Chu chu tuna ‘Cheese’ kan tih, bawng hnute khar, lak hran theih lo chhuah tan dan niin an sawi.

Chuti ang bawkin kan pi pute khan an awmna Chhinlung puk an chhuahsan a, an rawn insuan chhoh zelnaah, kal kawng chawhmeh atana an tih, vawk sa chhum chu burah an thun ang a, a chhiat mai hlauvin mei pui hnaihah an dah thin ang a, a chhunga vawk sa lah chu a lo rei chuan a insiam danglam ang a, chu chu tuemaw kam hleih awmmawhin a zu pir zauh ang a,
mei pui hneiha awm nafam chu rial thla chhar chu ang dawn hek lo, rang fahrnin a kut zungchal chu a la sawn ang a, a fawp ri chuk bawk ang a…E khai! Chil a put mai dawn. Chutichuan, saum chu an lo hmu chhuak ta a i’n ti teh mai ang. Lung zawng a tileng ve che che mah na.

Zofate chawhmeh siam dan hi a samkhaiin a hnahchawi a tam lo hle a. Chawhmeh bawlhlo atana kan hman tlangpui deuhte zingah phei chuan saum chauh hi ‘Kan rila rah, kan fa neih chhun’ tia kan koh theih chu a ni mai awm e. Engpawh ni se, bai theuh theuh saum hnawih hmui ngat chu kan tlaipui a, hmarcha pawh rawt satliah aiin saum nena bawl phul hluah chu ei manhla kan ti bik a. Tiauhmi, sarep, zawngtah, rawtuai, tumbu leh tawktete phei chu saum hneh tawka thleng tlang liam zawih
zawih khawpa bawl a nih phawt chuan eng dang kan ngai lo zawng a nih kha. Mi thenkhat, keimah anga pirpak zual tanah lah saum tho hlim, a lum lai ngat han chawm bawrh bawrh tluka dam man awm hi sawi tur kan hre hran lo a nih hi.

Tun laiah mite kan changkang tawh a. Kan khawsak duhdanin a zir a, boruak pawhin a pe bawk a. Rapa saum bur khai chu sawi loh a rapa takngial pawh kan nei tha duh vak tawh lozawng a nih hi. Mahse, saum erawh kan la nghei lo va, kan ei ngaia duh hun huna ei tur kan la nei hi rem hre remhriatna zawng a ni ngei mai le. Tahan bazarah khian han kal la, va hawi vel mah teh. Sarang ip var te reuh te, a hmawr lazaia tawn phui, thleng dara an lo dah thluah, pitar tuemawte’n khawi maw lai laia an lo thutpui chu i hmu ngei ang. Chu chu saum tharlam leh tuihnai, vawi khat hman tawka fun, cheng sawmhnih leka an zawrh, ‘Lung run Di’ tia duat taka ka koh te roh kha a ni e.

( A bik takin Canada-a ka pu Tharan lo chhiar ngei se ka ti a ni.)