By Zothangliana (Samsona pa)
Zawlnei tahbelh an tih mai thin, Jeremian, “Tihborala ka awm lo hi Lalpa zahngaihna a lo ni, a lainatnate chu a kang ngai loh avangin. A thar zel thin tuk tinin, i rinawmna a ropui e,” (Tah Hla 3:22,23) a tih angin, Lalpa zahngaihna avangin kum duhawm tak, 2011 chu kan lo hmang zo leh ta der mai a, kum thar min hruai thlenga, kum hlui tluana min venghim thintu Lalpa chu fakin awm hmasa rawh se.
Lalpa zahngaihna avangin kum 2011 chu kan paltlangin kan kalsan tan leh ta. Kha kum hlui kal ta chhunga kan awm dan leh chezia, thiltihte chu a tha emaw, a chhia emaw pawh lo ni se, siam that theih a ni tawh lo va, a nih ang angin rorelna niah tihlana awm turin khekkhawlin a awm ta a ni. Lal Isuan, “Miten thu lawi lo an sawi apiang, chu thu chu rorelna niah chuan an sawifiah a la tul ang,” (Matt. 12:36) a ti miau si a. Hei hian thu sawi leh thiltih a huam a: Hun liam tawh kan ko kir leh thei tawh lo angin, thu sawi tawh leh thiltih tawh a siam that theih tawh bawk hek lo. Chuvangin, tun hun leh, hun lo la thleng tur thilah kan fimkhur a va han ngai dawn tak em!
Mihring tungchhova piang/kal tawh phawt chuan, dam chhung ni chhiar tur kan nei theuh a, kan dam rei leh chhiar tur kan ngah a, kan dam rei loh erawh chuan chhiar tur kan nei tlem a. Dam chhung ni chhiar kan tih hian Saihlum chhiara chhiar a, pakhat, pahnih, pathum, za, zanga, sang tih lam a ni lo va, kan ni tin hun hman that dan emaw, hman khawloh dan emaw kha a ni zawk.
Tun lai, hun hnuhnung, sualna leh hun khirh tak a lo pun tual tualna hnuaiah hian, pawisawi lo naupangte pawh natna hri bakah, mi suaksualte kutah an thi chamchi ta mai zawng a nih hi! Naupangte hun tawn hi a rapthlakin a tihbaiawm em em a, Sodom khawpui sualna rapthlak-ah kha chuan, nau tih thlak leh kum tlinglo pawngsualte pawh kha a awm lo a ni chek ang chu: ziah lan chhiar tur a awm miau si lo – kan tun hunah zet chuan nausente pawhin an lo tuar ta a nih hi! Thlan ngai lo nausen thi an tam ta hle mai. Heng avangte hian naupangten dam chhung ni an chhiar thiam theih nan: 1 Samuela 3:10-a, “Lalpa thu sawi rawh, i chhiahhlawhin a ngaithla e,” tia inziak hi, mahni tan ngeia seng lutin, dam chhung nite an chhiar thiam theih nan, nu leh pa ten tan kan lak a va mamawh tawh tak em!
Thufing chuan, “Naupang thlahthlam chuan a nu zahna a thlen thin,” ati a, tin, “Naupang thinlungah chuan atna a bet tlat a, mahse thununna tiangin hla takah a hnawt kiang ang,” a lo ti bawk nen, chutiang zelin, “I fapa chu thunun fel la, chawlhna a pe ang che,” tihte hi a taka hmangtu nih a va hun tawh tak em! Kan Bible-in, “Tiang hmang duh lo chuan a fa a hua a ni,” a ti hlawt mai si a, kan tu leh kan fate la hi kan hmangaih angin miten min lo hmangaihpui ve thei si lo va, kan dawh theih angin miten min dawhsakpui thei lo tih hriain, mi dang tana ninawm leh hnawksak lutuk lo tura enkawl hi a tul hrim hrim. Kan fate an kalna awm kawngah hruai i tum theuh ang u, sualna tipungtu mai mai ni lo turin.
Finna leh changkanna, hmasawnnain kil tin a fang zel a, kan fate pawh an lo changkang ve det det a, duhzawng leh tha tihzawng a dang thuai thuai a, kum 10 an han pelh tawh chuan an nung ta em em mai a. Dam chhung ni an chhiar thiam lo han ti rawk dawn ila, anmahni ngaihah chuan “thing” tak, khawvel thangchho leh changkanna ei phak ve tawh lo dinhmuna din hi kan chan tawk a lo ni zawk der mai lo zuk nia! Mahse, “THI RENG SI A, NUNG HMING PU,” an tih anga, dam chhung ni chhiar tlak nei miah lo kan ngah lutuk ang tih a va hlauhawm em!
Mite sawi thawm hriat tur a tam ta hle! “Kan tun lai hunah, hman lai ang mai maia Pathian biak hi a thing tawh, thalaite hipna atan phei chuan, changkang deuh, rimawi chi tinreng, eng engemaw ri bur bur tur a awm loh chuan an hip theih tawh loh,” an ti thin! Khawvel thang chho, mahni duhzawng leh chakzawng ringawt hmatheha kal chho hut hut tan chuan a inhmeh hle leh lawi si. Mahse, Thlarau hipna ni lo, khawvel changkanna zurzui rimawi hipna mai mai a lo ni reng palh ang tih zawng a hlauhawm hlel lo thei lo a ni! Lal Isuan, “Chakna ni lovin, thiltihtheihna ni hek lovin, Ka Thlarau zawkin le,” a ti tlat si a.
Sam 73:27 chuan, “Ngai teh, nangmah hlata awmte chu an boral dawn si a,” a ti a. “Hlat” tih hian: Pathian nena inzawmna nei lo tih lam a kawk deuh ber awm e! Tun hun, kan khawvelah hian kawng dik lo lama min hruai bo turin leh, kan hriat loh laiin, Pathian hlat taka kan awm beiseiin, Setana hian khawvel finna leh changkanna tam tak hmangin mi
a bei mek a ni. Chu chu mahni duhzawng leh ngaih dan kawnga rawngbawlna lam a ni a, khawvel nena inmila rawngbawlna rah lo awm a ni! Khawvelah hian Setana pawhin, Pathian malsawmna bak hi a mite hnenah, Pathian hming chhal ve tho si hian a pe ve thei reng a ni tih hriain, rawngbawlna satliah, changkang takte kan itna lakahte hian i fimkhur ang u. changkan leh ropui hi a tha a ni, mihringte lawmzawng leh duhzawng tak pawh a ni, mahse, Lalpa hnung zui hi nuamsa leh changkang taka zui kan tum phawt chuan, tluksan Kohhran lo la awm tur, Pathian luak tichhuaktu hma hruai lek hi kan lo ni palh dah ang e!
Changkanna thlarauin a kaihruai a, an hlimin an phur ve em em thin a, Lalpa chu a thain a ropui a ni, tiin Pathian hming zawng an lam ri ve thin. Mahse, Pathian Thlarau kaihhruaina lam a nih loh avangin, an tawpna chu chapona maia a lo zo leh lawi mai si thin hi, a pawi chauh pawh ni lovin, a pawi lutuk piah lam a ni. A vang chu, Marthi anga Lalpa hnaih taka awm emaw kan in tih laiin, mahni inti buai reng rengin kan lo hlatin, mite kan lo hlatpui teuh hi a lo ni reng mai si thin. A chunga kan Bible chang hmuhah khian, “Hlat chu boralna a ni,” tih a ni a. Heta “Boral” a tih hi taksa thih hnu piah lamah,
thawhlehna taksain thih hnihna a tawn lehna leh, thlarau, rilru chatuana hremna chu a ni tih hi hriat tur a ni a. “Thi reng sia nung,” tih ang zia zangin, Lalpa ngaiha dam chhung ni chhiar tur pawh neih ve phak lohna a ni.
Chuvangin, “eng tin nge kan dam chhung nite chhiar dan kan thiam ve theih ang?” tiin lo inzawt ta ila, a chhanna chu, “A (Lalpa) thu ang zela awm dan veng thain,” tih leh “Kei atan erawh zawng Pathian hnaih hi a tha a ni,” tih hi dam chhung ni chhiar nan a tha ber mai awm e. Chutiang deuh bawkin, “Thalaite u inthat lai chen ula,” tih thu chauhah hian tawp mai lo ila, a dawt leh thu, “in chungah ro a la rel dawn.” tih hi ngaipawimawh ta zawk ila, chu tak chu “dam chhung ni chhiar” nana thutak innghahna chu a ni mai lo ang maw? A thutaka kan innghah tlat chuan hum sual pawh kan dai lo ngei ang!
Thulakna: zounungroupmail
