By: Ela Khiangte, Australia
2008 Christmas 
chu a ni telin kan hnaih ta hle mai a, mitin te thinlungah Christmas lam a hawi leh ta. Eng tak ang maw..rilrua khat liam chu ka rawn thai chhuak ve ngawt dawn a ni. Tuntumah hian, Christmas boruakin ringtute mai nilovin, Khawvel pum a nghawng dan leh eng ang takin nge Christmas hi mitinten kan lo chhawm nun tak zel tih chu History lam thlirlet pahin, a tlangpui tarlan kan tum dawn a.
History : Sap tawnga Christmas tih tawngkam hi, ” Christ’s mass”, tih thuhlawm hnih belhkhawm atanga lo chhuak a ni a, “Krista vanga puipun ni”, tih te pawhin a sawi theih awm e. Greek Thuthlung tharah Christ tih hming hmasabera hawrawp hi, X tia ziah a nih avangin tunlai thleng hian tamtak chuan Christmas lamtawi nan Xmas tih te pawhin an ziak mai thin a. Krista pian hun diktak hi tumahin sawi chiang fak theilo mahse, Modern historian ho chuan 7 – 2BC vel kha niin an sawi a ni.
A Hun leh Ni :
Isua pian ni leh hun diktak hi Bible-ah pawh ziah a ni lo ang bawkin mifingte leh chhuimite pawhin fel faka sawi theih an nei lo. Mahse, kum zabi engemaw zat atang tawh khan December 25 hi Isua piancham lawmna ni atan Khawvel hian a lo hmang thin a. Kum zabi 18-na tantirh lam atang khan a hun thuhlaah ngaihdan chi hrang hrang a lo piang chhuak a. Sir Isaac Newton-a khan, “Thlasik kut denchhenin Christmas ni hi hman mai a ni e”, tiin a hun thuhlaah ngaihdan a lo sawichhuak tawh a.
Tin, 1783 khan German Protestant Paul Ernst Jablonski chuan, “December 25 hi Rom sawrkarin, Ni (Sun ) puala kut an hmanna ni a ni a, chumi hnung zui mai chuan hemi ni hi hmang kan nih avangin; Kohhran tan thil tha a ni lo”, tiin a lo sawi ve bawk a. 1889 khan Louis Duchesne-a chuan, “Christmas chu March 25 atanga chhiarin thla 9 na a ni e”, tiin a sawi ve bawk. March 25 chu Rom Calendar-ah Nipui Vanglai, Chhun leh Zan a inchen chiah ni a ni a; “Vantirhkohin Mari Chibai a buk a, Nau I pai ang tia a hrilh ni kha a ni e” tiin mi tamtak chuan tunlai thlengin March 25 ah hian “Annunciation” kut an hmang thin.
Ringlotuten Bar thla an hman dan :
Thlasik kut hi khawvela hnam chi hrang hrang karah kut pawimawh tak a ni tlangpui a. A chhan chu kut hnathawkmi, lo hna thawkmite tan pawltlak hun a nih vang a ni. Chuvangin, hmanlai atang tawh khan khawvela hnam tamtak chuan December thla nawi lam leh January thla tantirh lam inkar hian Kut, Intihhlimna (Mizo ten Pawltlak kan lawm thin ang hi) hunpui an lo hmang thin a. Thilpek chi hrang hrang an inpe a, In neitu leh Inluahtu ( Tenant & Landlord ), chungkua leh thian hnaivai te..etc. Tin, an in leh khawlai te pawh mei eng chi hrang2 nena cheimawiin, an eiin an inho thin. Isua pianna hre ngailo pawhin chutiangin Bar thla hi an lo hlut a, hlimna ni atan an lo hmang thin reng a. Chutiang chuan modern Christmas hmangtu, ringlotu tamtak pawh hian an la hmang chhunzawm zel a ni.
Mediaval Hun Laia Christmas an lo hman dan :
800 kum, Christmas ni ah 
Charlemagne kha Emperor lukhum an hlan a, chuta tang chuan Christmas hapta hi a rawn lar chho ta zel a. Tin, King Edmund pawh kha kum 855, Christmas ni ah lal ni turin hriak thih a ni bawk a. 1066 kum, Christmas ni ah King William I pawh England lallukhum hlan a ni bawk.
1377 khan King Richard II chuan Christmas lawmnan bawngpa 28 leh beram 300 thlawt mai a lo talh a. Hetih lai atang tawh hian Christmas Carol hi an lo hmang tawh bawk a. Tin, Mediaval hunlai atang tawh hian mawilo takin Christmas hi an lo hmang thin a, chintawk nei lova rui lutuk te, pawisa chawia inkhelhna (gambling) chi hrang2 te nen hun an lo hmang a ni. Thilpek erawh kumtharah an inpe thung a. An in leh kawtchhuahte chu hnim buk mawi tak tak leh ban leh ban inkara hnim zam chi, chi hrang hrang leh hnim hring mawi taktak nen an chei thin.
Reformation Leh Christmas :
Kum zabi 19na lai a Kohhran siamthatna hunlai khan Protestant hruaitu thenkhatte chuan an Christmas hman dan chu sawiselin, Ran tamtak nunna hloh leh sum tam tak senga thil inpek chiam hi Christmas hmandan tur a ni lo”, tih thu an dinpui a. 
Roman Kohhran chuan ursun lehzual zawkin, sakhuana lam hawiin Christmas chu an hman phah nghe nghe a. “Chutih lai chuan England ah Civil indona a chhuak a, King Charles I chuan hnehna a chang a. Ani hi sakhuana a mi duhtuimi a nih bawka 1647 khan Christmas public a hman chu a khap ta ngawt a ni. Chu khapna dan a chhuah atang chuan England khawpui tamtakah buaina a chhuak a, mi tamtak chuan an hman dan thin pangai angin, an in leh kawt zawlte cheiin an hmang lui a, Christmas avangin Mediaval sapho chu an buai nuai nuai mai a ni.
Chutianga sawrkar danin tawkfang Christmas hman a lo khap hnu, 1660 kumah King CharlesII chuan zalen taka Christmas hman theih tiin a puang leh ta a. Tun thleng hian sakhua rawngbawltu thenkhat chuan Christmas hman hi an la lungkim lo cheu nghe nghe a. Chutih hunlai chuan America khawmualah pawh Christmas hman duh leh duh lo states tinah an awm nuk a.
America khawmualah Revolution beihpui an thlak lai vel khan, Christmas hi English ho custom-a an ngaih avangin an ngaipawimawh lo hle a. 
President George Washington-a khan 1777, Christmas ni denchhen ngatin Hessian sipaiho kha a do a ni. Chu indona chu Trenton war tiin an ko. Chutih hunlai chuan America aiin German ramah Christmas chu a lar zawk nghe nghe a. Christmas boruak chu America khawmualah ah a reh hlen hlauhthawnna avangin 1820 bawr chho khan British ziak mite an rawn che chhuak ta a.
William Winstanly te, Charles Dicken te, Washington Irving te leh Clement Clearke Moore te hmangin Christmas chanchin rilru khawih tak tak ziah chhuah a rawn ni ta a. Ziaktu tamzawk ten Christmas hman hi chhungkaw intawhkhawmna leh
hlimtlanna ni pawimawh a nihna te, Carol hlimawm zia leh Christmas thawnthu bul intandan lam te an thlurbing laiin, Harriet Beecher chuan a lehkhabu, ” The First Christmas in New England” tih thupui hmanga a ziah ah chuan, “Christmas awmzia taktak hi Shopping na ah kan theihnghilh zo tawh”, tih te a ziak tel a. Chutiang Christmas lamhawi lehkhabu tha tak tak atang te chuan America mipui te chuan Christmas hi an rawn hlut chho leh ta a. 1870 kum khan President Ulyses-a chuan Christmas chu United States Federal holiday atan a puang nghe nghe a. Tunah phei chuan American 96% chuan zalen tak leh hlim takin Christmas hi an hmang a ni.
Tin, tunlai Australia ah ngat phei chuan Guiness World Record break turin Christmas Parade an buatsaih a, mipui nuai thum chuang lai kan tlingkhawm hmur mai a. Chu lo pawh, Kumtin vawikhat an buatsaih thin, “Candle Light Night” tia an koh chu, Masi hmuah nan buatsaih a ni bawk a. Chhungkaw tinten Bombati ( Mombati ) keng fur ( chi eng fur )chungin mualzawl pakhatah kan chhuak khawm a, Christmas hla te a huhoa sain rampum huapa zaithiam ten Christmas hla mawi tak tak hmangin min awi a ni.
Santa Claus : ( Masi Putar or Father Christmas )
Tunlai khawvelah naupang pawhin..khi. . khi.. khi Christmas putar tia an koh theih khawpa mitin ten kan hmel hriat Santa Clause 
Image hi German-American cartoonist Thomas Nast-a chuan 1863 khan a lo siam chhuak a. A siam tantirh atang hian kumtin design a thlak thin a, 1880 kum atangin tuna mitin ten kan hmelhriat Masi putar design hi a lo siam chhuak a, 1920 bawr cho atang khan khawvel hriatin a rawn lar chho a.
Latin America leh Khawvel ram tamtakah chuan Santa hian thilpek a phur khawma, naupang ho a pe thin a, chu chuan nausen Isua hnena thilpek hlanna a entir a ni.
Christmas Thingkung leh Cheimawina: (Decoration)
1835 khan Christmas tree tih tawngkam hi Saptawnga khung luh a ni a, mi tamtakin Christmas thingkung hi ringlotute tihdan, thingkung be ho tihdan zirna mai a ni tia ngai pawh an awm.
Tunlaia Christmas
thingkung kan hman lar em em tak ang chi hi kum zabi 18th na laibawr khan German ram atanga lo intan niin an sawi a. Hnialtu tamtak awm mahse chhuimi te tamzawk chuan kumzabi 16 atang tawh khan Matin Luthera’n he Christmas thingkung hi a lo tihhmuh tawh niin an sawi. German atang, he thingkung hi England lal George III nupui, lalnu Charlotte hnenah sawimawiin ( introduce ) a awm a.
Tin, Victoria hunlai khan Prince Albert-a chuan a theh lar lehzual a. Chutih hun vel tho chuan German Immigration ho chuan Christmas thingkung chu America ah an rawn sawimawi bawk a.
Christmas thingkung chu mei eng leh thilmawi tinrengin an cheimawi thin. Australia te, North leh South America leh Europe khawmual puiah te chuan an inchhung mai ni lovin kawtchhuah te lamin mei ( light ) mawi taktak leh cheimawina chi hrang hrng hmangin an chei thin a, kawngpui dungah te Christmas puanzar (banners ) an tar a, mipui punkhawmna hmun laili ah te Masi thingkung lian tak tak an dah thin.
Christmas leh Sumzawnna:
Ram tamtakah chuan Christmas boruak hi an sum lakluhna hunpui ber a ni miau mai. Mitin ten cheimawina chihrang hrang leh thilpek tur te an lei chur chur a. America ah phei chuan October thla a tangin Christmast lamhawi thil te hi zawrh tan a ni thin. Chu mai a ni lo, movies siamtu lam pawhin Christmas lam hawi videos tamtak an siam chhuak chur chur a, mi tamtak tan chuan Christmas chu Shopping Season a ni ber e. America ah ngawt pawh 2001 khan Christmas boruakah $4 billion lai mai hman ral a ni miau mai. Chutiang chuan sumzawngmite tan hlei hlei hian Bar thla hian awmzia thui tak a lo nei ve a ni.
Thu Khaikhawmna
Christmas thu tlangpui kan han tarlan tak te en khian, a hun leh ni thuah te, a hman dan thuah te leh kawng chi hrang hrang atanga thlirin Kristmas in kan khawvel a nghawr dan te, ringlo mite thlengin Isua pianna hian thil a tih theih zia te chu kan hre thei mai awm e.
Vawikhat chu ka nu nen phone in kan inbia a, “Ka fanu birthday a thleng dawn a, in lamah pawh in lo lawm ve dawn a nia”, ka ti a. Chutah ka nu chuan, ” E khai, fa panga ka nei che u a, tumah in birthday pawh kan lawm ngai hlei nem”, tiin awlsam et hian min chhang a. Chutah ka chhan letna chu, ” Ka nu, Birthday lawm tih lemah, Kohhran unaute sawmin kan fanu tan lawmthu sawina lo nei ula hlim takin chawhlui te lo kilho rawh u ka ti mai a nia”, tiin ka chhang let a.
Aw le, hring fate khawsak dan tur thil engkim hrelawktu kan Lalpa thung chuan, ” A birthday hi a lo lawm ngai lo tak a, tin, a zirtirte hnenah pawh a pianna hi rawn lawm turin a chahna Bible ah kan hmu hek lo. Bible a birthday lawmna kan hmuh thung chu Heroda piancham lawmna a ni a, Johanan’ a lu a hloh phah thung a ni. Engtin nge ni ta ang?
Mahse ka tan zawng, “lenrualte nen Masi hlamawi sa a, intin fanga rawngbawlna neih te, nu le pa, pi leh pu te nena :
‘U…Amah i lo fak ang..3 U Krista kan Lal’ tia, a pian ni leh thla a buai lo leh, sum leh pai hlawkna ngaihtuah lo va, hlimhlawp leh nawmsak bawlna hnuchhawn in, kan sual te kalpuitu Bethlehema nausen piang lawma fakna hla sak mawlh kha ka ning thei mawlh lo”.
Unau duhtakte u, engtinnge Isua pianna hi kan lawm ve thin a, eng ang takin nge kan hnam hian kan lawm ve zel dawn tih erawh a thara kan inchhut a va pawimawh tak em! Kan chenna khawvel nghawrchhuak a, Birthday azawnga hlimawm ber leh ngaihhlutawm ber Lal Isua pianna champha lo thleng turah hian Zofate hian kan awmna ramtin atangin Isua ropui nan, “Kan nihna ang angin a lam hawi ila; kan awrawl leh theihna zawng zawng phal takin i hlan ang u”. Khawvel hmuntina cheng Zofate hian, Isua zara mi vannei ber hnam kan nihna nun ruk hi, 2008 Bar thla atan pawh hian kan lanchhuahtir ngam/phal dawn lawm ni? Khawvel kil tawp ber pawh thleng mah ila, Zofate tan hlimna kawl a eng zel dawn! Chhiartu Zawng Zawng te Lalpan Malsawm Mawlh Che U Rawh Se!
+++++++++++++++++++++++++++++++++++++++++++++++++++++++++++++++++++++++++++
“Malaysia rama a khawsak lai atanga Khawtlang leh Kohhran rawngbawlna huang hrang hrangah a lungthu sawhnghettu zinga mi ni thin, Pu Ela Khiangte, Australia rama a nupui fanaute (fa 2 nen) nen khawsa chunga zirna run bel mek hi; thu leh hlaa tuimi leh ziakmi a ni a. 2007 kum khan Khawvel huap pawha lehkhabu lar tling pha hial, “Heaven Is So Real”, Pi Choo Thomas-i (Korean American) ziak chu amah–Pu Ela Khiangte hian Mizo Tawnga letin a khawrpum a. Tichuan, Dr. C. Nunthara hmangin Lengchhawn press te chuan copies 7000 zet an lo chhuah sak a, Mizoramah pawh a lehkhabu lehlin hian mipui a al hneh hle a, hriat a ni.
Tin, he lehkhabu ziaktu pi Choo Thomas, Korean American, hi Washington DC a cheng mek a ni a, Lal Isuan tum 17 zet, a thlarau taksa chu hruaichhuakin Vanram ropui khi a fanpui a. Isua thupek leh duhdan angin a hmuh leh hriatte chu lehkhabua ziahchhuahin a lo awm ta a, Pathianin he lehkhabu hmang hian mi tamtak thlarau chu chhandamna zemah a senglut mek bawk a ni tih hi sawilan loh rual nilova hriatna a awm avangin ka han tuihnih ta chiam a ni, tiin a hun chep tak karah hriatzauna leh thu chhenfakawm tak tak rawn thawh thintu—Pu Ela Khiangte chungah hian lawmthu kan sawi a, a zirlaiah pawh Pathianin hlawhtlinna pein kaihruai zel rawh se tiin duhsakna kan hlan bawk a ni. Ed”
@Ela, bei ropui hle mai, heng ziak tur hian hun hlu senga research neih hi thil hau tak a ni. A bengvar thlak e.
Christmas Card hi Sir Henry Cole-a’n John Calcott Horsley-a siam turin a tir a. Tichuan, 1853 kum Masi dawnah siam chhuakin, Masi Card siam hmatsat ber chu USA ah zawrchhuah tan a lo ni reng mai tih hi ka han sawilan ve pahin, X-mas chanchin leh a behbawm zau taka han hriat hi a manhla a ni. Pu Ela i ti lawmawm tak zet e.
