Janakpuri, Delhi : Mihringa kan pawimawhna lai ber chu kan hrawk hruite hi a ni. Thil kan ei, kan lemna kawng a ni a, a pawimawh em em a ni. Chutiang chiah chuan hnam pawh hian hrawkhrui pahnih a nei a. Chu chu kan Culture leh kan Tawng hi a ni a, “A tawng a thih chuan a hnam pawh a thi” tih hriat a ngai. Kan hnam hrawkhrui hi a chah loh nan kan venhim a ngai nasa a ni. Ni kum khan kan nupa-in khawvel kan fang a, Canada leh USA-ah hian kan Zo hnahthlakte hi mi 5,000 chuang an awm tawh a ni. 1990 kum bawr vel kha chuan mi 80 vel emaw chauh an awm a ni.

Sept 4, 06 khan ‘Mizo Day’ Marryland, USA-ah an hmanga Chief Guest-ah min sawm a, ka kal hmasak nena tehkhin chuan a let 300 velin kan Zo hnahthlakte hi an pung a ni. A tam ber chu Burma rama kan unaute an ni a. Burma rama Zo hnahthlakte hi Pathianin min hmangaih em em a, mal min sawm nasa a ni. Ram pawna miten ram chhunga awm kan mipuite khi kan tanpui tur a ni. 1946 vel khan Israel-hoin Jewish National Fund an din a, chu mi atanga pawisa pung khawm chuan an lei theih ang tawk tawkin Arab rama ram hmun an lei teuh teuh mai a. Arab-hoin an han hriatchhuah meuh chuan Israel-hovin an ram tam tak an lo lei hman der tawh a ni. Chutiang ang chuan Burma rama ram-hmunte khi in theih tawk tawkin lei tum ula, in kir leh hunah chuan ram zau tak in nei tawh mai dawn a ni.

Indo-naah chuan silai aiin thlarau, culture leh economics lama indo hi thil hlauhawm tak a ni a, hma pawh a la chakin nghet pawh a nghet zawk a ni. Ram that hunah Burma ramah inkir leh ang a, chutah chuan in nuam tawh dawh a ni. Chu mi hunah chuan kan hnam hi a dam khawchhuah zel theih nan tan inlak a ngai dawn a ni. Keini tan chuan Delhi-te hi kan Aigupta a ni a, nangni tan chuan Mandalay te, Rangoon te khi a ni a, khi’ngho khian an chimral ang che u tih a hlauhawm em em a ni. Israel te insuihkhawmna chu an Kut hman thin te hi a ni a. An Kut hman thin te khi an damna hnarpui a ni. Keini pawh heng kan Kut hman thin te hi kan hnam dam khawchhuahna tur awm chhun chu a ni. Red Ford (Delhi-a awm a ni a, hmanlai lal chenna In a ni) hi min thlahtute kan pi leh pu, Mongal-ho sak a ni a. Chuvangin, kei chu Delhi-ah hian ka inti mikhual lo reng reng a ni. Mahse, khang Mongal-ho kha chu Christian an ni lova, keini ho chu Christian, khawvel zawng zawng neitu kan ni a, kan vannei bik em em a ni. Tih theih loh engmah kan nei lo.

Bible ka letling a (Hmar Bible tur a ni), kum 4 chhungin Genesis atanga Thupuan thleng ka letling zo hman a ni. Scholar ho chuan Bible letlin hi kum tam tak chhung an buaipui thin a. Mahse, kei chu Pathian chakna ringin reilo te-ah ka zo thei mai a ni. He hi a ropui ka ti ve hle a. World record pawh a tling pha ve mai thei. Kei pawh hi tun thleng hian nitin darkar 16 chhung hna ka thawk thin a ni. Zo hnahthlakte hi tumah kan duai bil lo reng reng. Mi tih ang chu kan ti ve thei vek a ni. Kan Mongalian nihna hi zampui lovin kan hman dam chhoh zel theih nan, kan tang ho zel dawn nia.

L.T.Kima
Kut Secretary, 2007
New Delhi.
Source: Huivalenthiamyahoogroup.