Chibai-bukna

By: Lalchhandama, Singapore
A hmasain chhiartu zawng zawng Krismas chibai ka buk a che u. Krstiante hunpui Lal pianchampha chu kan lo thleng leh dawn ta reng mai. He hun a lo thlen hian mi tin mai hian chhungkaw kima hman kan chak a. A chhan chi hrang hrang avanga hmun hlaa awmte leh khualzin miten mahni chhungkaw awmna kan pan hram hram thin. Chhungkaw kima thlamuang tak leh hlim taka hman kan duh vang a ni.

Krista khawvela a lo kal chhan chu khawvelah remna a lo awm theihna atan a ni a. Isua a lo pian khan vantirhkohte Pathian fakna hla chu “Lei chunga a lawm em em mihringte hnenah rem thu leng rawh se,” (Lk. 2:14) tih hi a ni. Hei hian Isua khawvela a lo pian chhan chu remna a lo awm nan a ni tih chiang takin a lantir a ni. Remna awm a tul a nih chuan buaina a awm hmasa tihna a ni a. Buaina tawk ngai lo tan chuan remna pawh chuan awmzia a nei lem lo mai thei a.

Amaherawhchu, khawvela mihringte reng reng hi buaina tawk lo kan awm lo va. Khawvel chu buaina khawvel a ni tlat mai si a. Inhnial bur bur leh indo bur bur awm kher lo mahse, thinlunga buaina a chhan chi hrang hrang avangin kan nei theuh a ni. Khawvela buaina tam tak hi khawvel thil hmanga rem theih a awm ngei mai. Amaherawhchu, buaina tam tak hi chu khawvel thil eng pawh hmang ila, rem theih miah lo a awm. Chutiangah chuan thlarau lam thil a tul thin a ni. Isua Krista hi eng ang buaina atan pawh remna siam thei awm chhun a ni. Khawvela tharum thawhna avanga buaina eng ang pawh Isuaa rinna nghat te chuan an rem thei vek a. Thinlung lama buaina neite pawhin Isuaah chuan remna leh muanna an nei thei a ni. Midangte nena kan inkara buaina a awm fona chhan chu kan tlawm duh loh thin vang a ni a. Ran in tlawm tak maia lo piang Isua Krista anga tlawmna neite hnenah chuan remna a awm thin a ni. He hun lawmawm leh ropui Krista piancham kan lo thlen hian kan hnenah remna a awm theih nan, tlawmna thinlung nen kan thinlung kawngkharte hawngin Bethlehem lam i hawi ang u, tih hi ka thuchah a ni a. He hun kan lo thlen hian in zavai hnenah remna awm rawh se, tih hi ka duhsakna che u a ni e.