Chawke, Amen

By: Zara (G.T.I)
A hram dan kha a hming a ni tawp mai. Thenkhatin ‘Awke’ an ti a, inti vai tingtangte erawh chuan ‘Chawke’ kan ti duh deuh kher. Engpawh ni se, chuti anga hram thin pui roh chu kan biak in thlang, kawng lehlam
kila bungpui kungah a lo mal tal hrut hrut niin. Tichuan, a aipuan apiangin emaw, a lunglen changin emaw, a nih loh leh a khawhar tih tur a hriat loh hunahte hian chhun zan pawh thlu lovin a hram bul bul thin a.

Pathianni tuk a ni a. Hnam ni lawka nupui sun, pathlawi thar lam Pu Lengkawia zing tawngtai bang haw lam chu bungpui phenah zun ram a thiar a. Chutih lai tak chuan changtu pa chu a rawn hram lauh lauh va, Pu Lengkawia pawn ama hriat tawk lekin a chhawn ve nghal a.
Chawke
Nula
Chawke
Nuthlawi
Chawke
Nula……..

Vanneiha siam nge, chawke tih luih tih pawh hriat a ni lo, nulaah a tawp ta tlat si a. Pu Lengkawia lawm lutuk chu David Beckham-a ball thun lut ang khan a kut a tum a, phur fahranin ‘Yes’ a han ti mai pek a. A inhriat chhuah chinah meng phawk hruin a hawi vual vual, a hawi vual vual a, tumah a hmuh tak si lohvah chuan thin thi takin a khi haw ta vur vur a.

Chumi hnu rei vak lovah chuan kan veng nula, pat-ek kai fe tawh-i chu a faitham khawnpuite nghakin bungpui hnuaiah a ding a. Chu veleh changtu pa bawk kha a rawn che chhuak leh a. Kan nula-i pawh a duai
bik lo.

Chawke
Tlangval
Chawke
Pathlawi
Chawke
Tlangval……

Chawke tihluih nge, vanneiha siam tih pawh hriat a ni leh ta lo. Tlangvalah a tawp leh tlat. Pat-eki…….sorry…..nula chu a lawm thlulul a ni ang. A nui tet tet, a nui tet tet a, a thiante pawh nghak tawh lovin a haw ta nal nal a.

Tukthuan ei kham, phawi rang deuhte biak in pan rualin Mapuia’n a bawng ven tur a kai chhuak a. Hmeithai fapa, rethei tak leh harsa taka lehkha zir a ni tih a inhriat chian em avangin bawng veng paha chhiar tur a zirlai bute a ak bawk a. Bungpui hnuai a thlen chuan…’Changtu pa a che leh ang a, Mapuia’n a chhawn dawn’ tih i hriat reng kha. Ziak tawh lo mai ang.

Chawke
Doctor
Chawke
Doctor
Chawke
Doctor………

Vanneiha siam leh chawke tihluih pawh ngai lovin Doctor-ah a tawp ta hrim hrim a. Mapuiate thlir zuia chawke mit khap fuk fuk khan eng tak ngaihtuah ang maw! He mi ni atanga kar hnih thum a vei hnuah chuan kan vengah thil mak pathum a thleng niin nuho bazar kai hawte chuan an sawi hal hluam hlawm a. Chung thil mak pathumte chu:

Kan veng nula hmel tha leh fel bera sawi chu Pu Lengkawian a keipui sa hauh tlut avanga tlangvalho lungawi loh thu, tin, kan nula Pat-ekite tualah tleirawlhovin ‘Len lai a rual lo hi a sawi rem theih’ tih hla sain an tlaivar lek lek thin tih leh, veng mawng hmeithai in atanga lehkha chhiar ri leh bati eng chu zan lai pelhah pawh hriat leh hmuh theih a ni tihte a ni.

Ka naupang thu hriat ‘Chawke hram tawp ruala kan sawi kha a thleng dik thin’ tih kha rilrua vawngin bungpui hnuaiah ka thu a. Pu Lengkawia, nula Pat-eki leh Mapuiate tana duhsakna hlanin maimit kan han chhing a. Changtupa a che leh ta.

Chawke
Amen
Chawke
Amen
Chawke
Amen.