Washington : US Mipuite Chawk Zangkhai Nan $ 790 billion Hmang Dawn
White house leh 
Congress te chuan America mipuite dinhmun siamthat leh nan $ 790 billion hman chhuah an remti tlang thei ta. A rei hmain president Obama chuan nemnghehnan hming a ziah hnan ang a, an hmang tan hem hem mai dawn a ni.
He sum hmang hian hna million 3 chuang lai siam turin project siam a ni a, a zatve dawn lai chu hnathawktute chhiah chawi chhawk zangkhai nan hman tum a ni bawk. Hetianga White House leh Congress inkarah thutlukna a awm thei ta mai hi president Obama chuan lawmawm a ti in,” he sum hmang hian kan ram hliam tuar hi kan tidam ngei ang tia sawi pahin, an thuchhuak lawmna (celebration) 3.5million hman a tum thu a sawi ri zeuh bawk.
US : President Chunga Thilthalo Thlen Tumtu Man
Thawhleh ni khan 
Alfred Brock, 46, chu US president in bulah president chunga thil thalo thlen tum nia an hriat a vangin police ten an man thu Senate thupuangtu chuan a sawi a. Alfred-a hian a mawtawrah rifle phur chungin president Obama chu thilpektur nei angin a insawi a, capitol kawtzawlah chuan rinhleh vangin an lo man a, tawkfang an dawp hnuah chauh silai a ken thu hi a inpuang a ni. Tuntum hi US president thah tumtu an man tumlina a ni ta.
Australia : Kangmei Vanga Thi te Pualin Ram Pumin Sunna Hunserh Hmang Dawn
Australia kangmei vanga mithi zat, Feb 12, nilaithawhtan ni thlenga an chhiar theih zat chu 181 a ni a, mithi zat hi 300 lai an tlin an hlauhthawn thu thuneitute chuan an sawi a. Prime Minister Kevin Rudd pawhin kangmei vanga thi te puala rampumin sunna hunserh hman a nih tur thu vawiin khan a puang a, a ni leh hun tur pawh puan a nih tur thu a sawi bawk. 
Australia sawrkar laipui chuan Council of Chhurches te nen he hunserh hmanna tur thuhlaah hian hma an la kawp dawn a, “ram pumin he sunna hun hi kan ngaihpawimawh tak zet a tul a ni”, tiin Prime Minister hian a sawi a ni.
February 7, Inrinni atanga kangmei chhuak tawh kha a ni a, mei sipai te hian hmun tamtak chu an thelh rem tawh a, mahse vawin nilaithawhtan ni thleng hian Victoria velah hmun 35 ngawt a la kang hluah hluah bawk a. Nilai ni thleng khan mi 500 chuang chuan kangmei vang hian hliam an tuar a, in 1,000 vel a kang ral tawh bakah, sang tamtakin an in leh lo an tlansan a, ram leilung 365,000 hectares ( 901,935 acres ) hial a kang tawh bawk tiin Australia Associated Press te chuan an puang a ni.
Thulakna : Associated Press via MizoKhawvel
