Burma ramin Election Law & Commission Thar Tlangzarh

chinworld:Burma ram awptu sipai ho chuan March 8, 2010 khan kumin chhunga inthlanpui neih an tum thua dan-leh-hrai duan fel a nih thu an puangzar a. Party din dan, People Parliament inthlan dan, National Parliament inthlan dan te leh State/Division tana inthlanna dan thar te chu a peihfel ta.

He inthlanna dan thar an buatsaih hmang hian 1990 kuma inthlanpui result ropui tak kha thiah sak a nih dawn bakah, 1990 kum Burma ram inthlanpuia rapthlak taka hnehna changtu—NLD party hruaitu—Pi Aungsang Suu Kyii chu kumin inthlanpui lo awm turah hian in candidate chu sawi loh eng party ah mah inhnamhnawih ve lo turin an dan siam thar chuan a kharkhip a ni.

Tin, tuna hmaa party lo awmsa zawng zawng te kha he dan thar tlangzarh ni atanga ni 60 chhung a, a thara register siam leh tura tih an ni a, danin a sawi anga a thara in register lo party chu amaha inhnukdawkah ngaih a nih dawn avangin 1990 kum inthlanpuia hnehna changtu—NLD party pawh kumin inthlanpuia a tel dawn leh dawn loh thu chu danin a sawi ang a, ni 60 chhunga a inpeihfel a tul ta.

Pi Aungsan Suu Kyii chuan hetianga Burma ram General Election dan thar khurbing taka duan a ni hi a dem hle a, ama party NLD member te hnenah, 2008 kuma danbulpui thar duan kha chik taka ngaihven tha lehturin leh NLD Party-in Shwegondaing Declaration ennawn leh turin a tir. Chutihlaiin, Burma rama NLD party Office zawng zawng, 2003 kum atanga an kharsak thu nen inkungkaihin March 10 khan khuahkhirhtu Sipai ho lam chuan Yangon khawpuia NLD hotu zinga—-Dr. Than Ngein chu kovin, Burma ram chunga NLD Party Office zawng zawng chu zalen taka hawn theih a nih tawh thu an hrilh. Tunah hian Burma ram chhung a, State/Division-a NLD party office 300 zet chu hawn a nih tawh thu NLD thupuangtu Nyan Win chuan nimin khan a sawi.

March 11, 2010 chhun khan kumin 2010-a Burma rampum inthlanpui lo awm tura endiktu tur Election Commission thar din a nih tawh thu Sipai sorkar chuan a puang a, he election commission ah hian mi 17 an tel a. Chu’ng ho chu a hnuaia tarlan ang hian:

1. U Thein Soe (Chairman)
2. U In Zaw Naw (Member)
3. U Khin Maung Nu (Member)
4. U Soe Ba Hlaing (Member)
5. Dr. Ba Maung (Member)
6. U Nyunt Tin (Member)
7. U Maung Tha Hla (Member)
8. Dr. Sai Khum Hlaing (Member)
9. U Aung Myint (Member)
10. U Myint Naing (Member)
11. Dr. Tin Aung Aye (Member)
12. Dr. Daw Myint Kyi (Member)
13. Daw Khin Hla Myint (Member)
14. U Tha Oo (Member)
15. Dr. Maung Htoo (Member)
16. U THa Htay (Member)
17. U Win Kyi (Member)
A chunga tarlan Election Commission te hi Sipai General hlui— U Thein Soe-a’n a ho dawn a ni.

Tun dinhmunah hian Party 7 te chuan Election Commission hnenah a thara register siam turin an inpuahchah mek thu chu; Yangon-a awm Sorkar lamtang party nepnawi (te nau) 9 inzawmkhawm-a an hotu Kyi Win (National Political Alliance) chuan a sawi.

Kumin chhunga Burma ram inthlanpui awm tura ngaih boruak hian mipui a deng na hle na a, vawin thleng hian; eng ni leh thlaah nge inthlanpui neih tum hi buatsaih a nih ang tih erawh a la saisa hle. Kumin October thlaa inthlanpui neih hi mi mir chuan an ring.