BUAITHLAK I TI VE EM?

By: Zalianthanga, Tahan
A ni khawp mai, kan hisap ang leh duh dan anga thil a awm loh chuan tukkhum sam hiat thur bumin, “a va buaithlak tak thin em?” tia chek tlawk tlawk chan a awm fo thin. Ni e,  Kohhran leh khawtlang rorelnaa kan duh zawng anga boruak a awm loh hi chuan sawisel tur leh chhuanlam tur siamin thawhduhlohna hial a awm thin a, buaithlak an ti fo thin. Heng thilah hian fimkhur a tul hle mai. A enga pawh chu lo ni se, kan duh emaw, duh lo emaw pawh nise, vote tlukna lam lam kha kan zui a tul zawk a ni. Chuti ang boruak neuh neuh chu khawrhchhuah kan tum ang a, ziak loh dan chenin kan hrut tel dawn nia.

1. Bawlhhlawh:
Veng lal thuchhuak palzut duh vang pawh ni lovin kawm kar,  In hnuai leh kawmchar vela bawlhhlawh tenghneng a inchhek hnur hi chu thaw a ti-ipik thei hle mai. Hei hian kan chhehvel boruak a tih rimchhiat bakah tho a tipung a, natna tichhuak thei rannung chawm seilenna a nih avangin a hlauhawm a ni. Chuvang chuan in chhung leh compound-ah bawlhhlawh bawm neih a pawimawh a, lam hla deuhah emaw paih ila, a nih loh pawhin phum thin ta ila a tha hle ang. Kan khawtlang titawptu hi en ta ila, thil ho ang reng deuhte a ni thin. heng ar ek, vawk ek, bawng ek, ran thi, inbualna leh bungbel silna tui thli, sarang leh thil funna atangtea bawlhhlawh leh rimchhia lo piang a ni a, tanruala thenfai theih, a hmun taka paih leh dah theih a ni bawk. A awmna tura a awm loh chuan bawlhhlawh tenawmmah a chang thin a ni.

2. Ruai leh ei neuh neuh:
Mitthi an awm palh a, tlawmngai falte tana ei in buatsaih hi hawih-hawmna chi khat chu a ni nain chhiat tawkte tan ko a rit duh hle a ni. Dinhmunin a zir loh phei chuan kuang man, thlan man, ei in man nen phei chuan senso a hautak em em a. Hengah hian a senso tlem zawng mawihnai ve tho si, kawng zawn a tha hle mai. Chhiat tawkte tan leiba nasa tak kan siam thei a ni tih hriain hruaitute hian kawng thar zawn a tha hle mai. Khual khua leh veng hla deuha mite hian chaw ei sain kal ila, thenawm tlawmngaite phei hi chuan mitthi ina chaw ei tum kher hi thil tha a ni ber lo mai thei.

Khawhar in riahpui pawh hi mitthi chhungte harsatna kan siam tawh zawk em le? Zan reh duh hun hunah kan hawng a, titi bengchheng nen rei tak tak thleng kan meng thin a nih chuan khawhar chhungte hnem ahnekin harsatna kan siam zawk thei a ni. Kawng lehlama thlir chuan tlawmngaihna a ni lawi si a, khawlh ve tak zawng a ni. Kan neihin a tlin chuan lungphuna ruai siam hi thaah ngai phawt ila, kokanin a zir tehchiam loh phei chuan ruai siam kher hi tum lo ila. Kan senso ai hian mitthi puala hriatrengna eng emaw siam a, kohhran leh khawtlanga pek hi a hluin kan chhawr rei zawkin a rinawm.

3. Bengchheng ngeiawm:
Hunpui leh ni bik thilah chuan huau huau leh titi, Tape play-te hi chu ngaih thiam chin a la awm mahna. Heng ni ni lo, thianzaho leh phuahchawp intihhlim leh penglengpung vanga thenawmte ngaihtuah lek lova rak vak vak leh Tape ring taka play hi harsatna lian tak siamtu a ni thin. Bible day alo hnai leh ta a; zan khawtlaivara aurinna hmanga Bible chhiar pawh hi a that rual rualin bengchheng a ni thei a ni. Nileng, zankhuaa varnaw te, meikhawl ri te, zu rui tawngte hi mite ngei zawng leh bengchheng uchuak a ni thei bawk. Thil tha nia kan ngaih hi thenkhatte tan chuan thluak a tibuai thei a, nuamsam lo tan phei chuan rilru chiaina hial a thlen thei a ni.

Hmawrbawkna:
Heng a chunga kan tarlan bakah hian thil buaithlak a awm hnur ta ve ang. Khawtlang leh kohhran hi kan inhawrkhawmna hmunpui ber a nih avangin a thu chhuak zah thiam hi a pawimawh a, a khap thil reng reng a tha emaw tha lo emaw kan zawm theih hram a tha ang. Eng emmaw nihna changchawia palzut duhte pawh kan awm thei. heng hi Society chhiatna a ni fo thin. Chuvang chuan kan chhehvel boruak vawng dai zawnga tanrual leh siam that hi kan koa innghat a ni a, a rah pawh nang leh keia seng tur tho a ni e.