BETHLEHEM ARSI (Matt 2:9-12)

By: Rev. Dr. Biakchhunga, Maryland
Khaw chhak mi fingten Lal Isua pian zan khan arsi danglam tak khaw chhak lamah an lo hmu a. Heng mi fingte hi Pathian awm pawh ring lo, milem sakhaw bia an ni nachungin an thiamna leh finna, an zir sanna hmangin Pathian a rawn inpuang hi a chhinchhiah tlak hle.

Hun laihawl kohhran hun lai khan Archbishop of Canterbury Anselm-a chuan “faith seeking understanding” tih tawngkam pawimawh tak hi a lo chher chhuak a. A awmzia chu “rinna hian hriatna (finna) a zawng,” miin rinna a lo neih chuan chu chuan hriatnaah a hruai lut a, hriatna (finna) a tipung tihna a ni.

Matthaia bung hnih thua mi fingten an hriatna/finna hmanga Pathian inpuanna an lo hmuh a, Lal Isua chibai buknaah (rinnaah) hruai luh an nih thu han en hian “understanding seeking faith,” hriatina/finna hian rinna a zawng ti pawhin a let zawngin sawi ve ta ila a dik ve thei tho awm e. Mi fingte hnena Pathian rawn inpuan dan en hian rinna leh finna hi an inaihal lova an kal tlang thei a, an inpui tawn thei bawk tih a chiang hle.

Bethlehem arsi hi Methodist tawngkamin sawi ta ila “khawngaihna hmahruai” (prevenient grace) a ni kan ti thei ang. Tunlai keini hriat thiam zawng chuan sawi dawn ta ila “Pathian min rawn ban hmasakna, Pathian rawn chet hmasakna” a ni kan ti thei ang. Chhandamnaah hian Isua chu kan va ring a, min lo chhandam a ni mai lo va, amah Pathian zawkin min rawn ban hmasa a, kan thinlungah Bethlehem arsi a rawn lantir a, chu chu kan lo chhang/zui a, Isua rinnaah (Isua chibai buknaah) min hruai lut thin zawk a ni. Methodist kohhran chuan he Pathian min rawn ban hmasak zawkna hi a ngaipawimawh hle. Hemi awm hmasa lo chuan mihringin Pathian a pawh thei lo a ti hial a ni.

Chu Pathianin min rawn ban hmasakna Bethlehem arsi chu kawng chi hrang hrangin a rawn inlar thei bawk. Berampute hnena a inlar dan chu dangdai tak a ni. Mi mawl ber tan pawha hriat loh theih loh turin Pathian ropuinain an vel chu a rawn chhun eng a, van mipui zaipawlin hla mawi ropui tak sain an rawn thawng harh a, chu chuan Isua hnen a hruai thleng tih kan hmu. Tun hnua Cardinal lo ni ta Avery Dulles (Burmaa US Foreign Secretary nihnaa 1955 kuma kal John Foster Dulles-a fapa) chu 1936 kuma Harvard University-a lehkha a zir lai chuan Pathian awm ring lo mi a ni a. Ni khat chu Charles luipui kama tih tur bik hre lova a len vel laiin thingkung pakhatah pangpang vul mai tur lo kuhmum tuar hi a hmu a. Mak ti takin a en reng a, chu chuan Pathian awmzia eng lai maha ringhlel tawh lo turin a hriattir a, a hnuah Isua Krista rinnaah a hruai lut ta nghal bawk a. A tan chuan chu pangpar kuhmum chu Pathian rawn ban hmasakna Bethlehem arsi a lo ni reng mai. Bethlehem arsi chu eng pawh hi a ni thei. Mi tam zawk tana Bethlehem arsi chu thuhriltu thuchah sawi hi a ni ti ila a sual lo vang.

Bethlehem arsi chu amah mai chuan chhandamna a ni lo va, Isua hnen min hruai thlengtu a ni. Khaw chhak mi fingte chu Bethlehem arsi chuan Isua hnen a hruai thlen hnu chuan a tih tur a zo va, mi fingten Isua chibai an buk zawh chuan arsi chuan an khaw lamah a hruai kir leh tawh lo va, mumang lamah hriattira an awm angin kawng dangah an haw ta tih kan hmu a. Chu chu thlarau hruaiin kawng dangah an haw ta te pawh ti ila a sual lo vang. Heta kawng dangah an haw tih hian awmzia a nei ril hle. Chhandam fate chu Heroda kawng—itsikna, elrelna, vervekna, chapona, huatna, tualthahna, etc. etc.—chu zawh tawh lovin thlarau puihnain ni tin khawvel bawlhhlawh leh sualna lakah inthiar fihlima thianghlimna kawng zawha van ram lam pan tur kan nihzia a tarlang chiang hle.