Mizokhawvel: June 19, Zirtawp ni hi pi Suu Kyi kum 64 tlinna pianchham a ni a, Yangon leh khawvel hmun hrang hrangah a lamtangte chuan a huhoin “birth-day” puala thawmvang neih tum a ni. “Pi ber tello bawkin a piancham hi kan lawm leh dawn chu a ni a; chhuah thuai a nih kan beisei a, chu chu kan tawngtaina hla ber pawh a ni”, tiin senior party member Lei Lei chuan AFP a hrilh a. NLD member-te chuan nimin khan Yangon khawpuia party headquarter ah birth-day lawmnatur chu an lo ruahman sa diam a. “Kum kaltaa kan lo tih thin ang bawkin, khawvar rualin phungki ( monks ) pangate chu Suu Kyi hmingin chaw kan hlui ang a; tin, party tan hmain balloons, thuro leh parva te zalen takin kan thlawhchhuahtir bawk dawn a ni”, tiin NLD senior member May Win Myint chuan a sawi bawk.

Khawvel ram hrang hrangah pawh live music leh chi hrang hrangin Suu Kyi’s pian cham hi lawm tum a ni a. Malaysiaa Suu Kyi thlawptute chuan live music leh thusawina nen hun hman an tum laiin Ireland leh Australiaah pawh punkhawm tum a ni a; Thailandah pawh debate-na ropui taka buatsaih tum a ni bawk.

Suu Kyi kum 64 tlinna hriatreng nana websites an buatsaih “64 for Suu” ah pawh mi 10,000 dawnlaiin thuchah an ziak chhuak tawh a. Suu Kyi tana thuchah ziaktute zingah hian khawvel mi hmingthang tak tak British Prime Minister Gordon Brown, footballer David Beckham, Hollywood film stars George Clooney leh Julia Roberts te pawh an tel hial a. Tin, thawhtanni khan khawvel ram 220 atangin mipui 670,000 chuang chuan hming ziak hnan meuhin UN Secretary General Ban Ki-moon hnenah pi Suu Kyi leh Burma rama political vanga mitang zawng zawngte chu chhuah turin ngenna lehkha an theh lut a ni.