Abraham Lincoln-a’n a fapa luhna school Headmaster hnena a lehkhathawn

Zirtirtu zahawm tak,
Ka fapa hian mi zawng zawng hi an insawi ang hehuin an awmin an fel famkim vek lo a ni, tih hi a hriat ka duh. Mi tenawm ho awmkhawm zingah hian mi chhuanawm tak tak an awm a, Politician tawmkailo zingah pawh hian ram hruaitu tha tak an inphum thin a ni, tih hi zirtir ang che. Hmelma te zingah pawh hian thian tha an awm a ni’ tih hi zirtir la, a hun a daih (duh? Ed.) rei deuh dawn tih chu ka hria. Mahse i theih hram chuan chengnga chhar aiin chengkhat thawhchhuah hi a hlu zawk a ni, tih zirtir ang che.

Chaklo zawka tan dan thiam tur leh hnehtu nih nawmzia hre turin zirtir la, itsikna suala a tlukluh loh nan lo chelhbet tlat ang che. Bengchheng lova nuih dan thuruk chu hrilh la, mi tihduhdah ching tak te hi mi rilru duap tak anni duh tih hrilh bawk ang che. Lehkhabu makzia hi hrilh la, vansang a thlawk thin sava te, parzu dawt khuaite leh tlangram hring dup hmuna pangparte thuruk chu a ngaihtuah chhuah theih nan hun tlem pe ang che.

Entawn aiin fail a ropui zawk zia hi zirtir la. Miten diklo tiin sawisel mahse maihni ngaihdana rinawm taka dingnghet ngam turin zirtir bawk ang che. Mi zaidam te bula zaidam a, mi luhlulte bula luhlul ve thiam turin zirtir bawk ang che. A hniak tam lam apiang zui ringawt lo turin lo zirtir hram teh. Mi thusawi apiang ngaithla tur leh chung a thu ngaihthlak te chu thlifim thiam a, a tha chauh pawm turin zirtir ang che. Lungngaihna karah pawh nuih dan zirtir la, mittui chhuah hi a mualphothlak lohzia hi zirtir bawk ang che. Mi kherkhiap te endan thiam turin fuih la, pawnlang mawina laka inveng thiam turin zirtir ang che.

A thluak leh tihrawl chu a ngam huai ber hnenah hralh mai turin hrilh la, a thinlung leh thlarau erawh a man chhiar ngailo turin hrilh ang che. Mipui sahawkah a beng hupin amahin dik nia a hriatah chuan huai taka dinga bei ngam turin zirtir hram bawk ang che. Zawldawh takin lo enkawl la, a lakah vuakna tiang lek hreh suh ang che. Fiahna meipui atang hian a ni tangkaraw tha tak tak pawh an chherchhuah thin ni. Nghakhlel leh dawhthei thiam turin huaisenna nei se la, mihring zahawmna hre turin mahni zahawmna hum ngam turin zirtir ang che.

Hei hi thupek khauh tak zawng a ni ngei mai… i theih ang tawkin hma lo la ang che. Mi tlawngtlaw tak ni mahse ka fapa a ni si a.
Source: Serchhip Times