62nd Chin National Day, Calgary-Canada

—Dika

Vawi 62-na CHIN NATIONAL DAY chu keini Calgary, Canada-a khawsate pawhin khawvel hmun hrang hranga Zofaten hlutna hunpui an hman angin Nimin Feb. 20, 2010, tlailam dar 5-10PM khan mipui 80 velin hlim takin kan hmang ve a. Kumin chu Inrinni a ni bawk a, hna chawl kan tama keimahni huangchhung atanga kim taka kan tel theih bakah thian dang Karen, Mon leh Shan ten min rawn telpui theia a hlimawm lehzual, anni hi min tiphuisui zualtu an ni, kan ti thei ang. Hetianga hnam khatin hunpui a hmanna kawnga thian dang te nena inpawhtawnna tha neih hi kawng tha tak a ni, khawvel hmun hrang hranga khawsa Zofate pawh hian thian dangten an Hnam puala hunpui an hmanna Ni a, min sawm chuan khel lova hlutpui thiam hi kan hnam zahawmna lantirtu kawng khat a ni thei ngei ang, tih hi kamkeuna angrengin ka han thai hmasa e.

Hun Vawng Dik
Zofaten hunpui kan hmanna ang chi ah hian hotute’n mipui an chah thin chu “A hun takah thlen kim i tum ang u aw” tih hi a ni tlangpui thin a. A ni, hun duanlawk anga hun hman theih hian boruak a ti zangkhai em tak a, kumin chu kan khua pawh kum dang aiin hun kan vawng dik deuh a, a lawmawm hle. Dar 5 vela tan tur tia duanlawk chu darkar chanve vel chauhvin kan tlai a, hun vawng dik kan inti khawp mai. Tichuan, Hall chhungah mipui kan zi-mur mur fel ta maw tihah, Announcers Pi Mang Doi Tial leh Pu Malsawmzauva’n hneh takin mipui min han chiauau a, boruak a zang haih ta maw tihin; ringtu kan nihna lantirtu zinga pakhat, hunpui hlanna tawngtai hmangtu tur, kan Fellowship Chairman Pu C. Liankhuma chu tawngtaina nei turin an han sawm a, tawi fel taka tawngtaina nena inhlanna kan neih hnu chuan 1st session chu tan nghal a ni.

Hun hman dan tur duanlawk angin, Pu Lallianthara’n Welcoming Speech uar taka sawina hun a hman zawh hnuah, Pu Lalmuankima’n Chin National Day chanchin tawi sawina a rawn nei lehin Nl. Cherthangpui’n Chin National Day Statement chhiarna a rawnnei chhunzawm a. Tichuan, Chin National Day nen inkungkaiha thukhunkhan sawina hun a zawh hnu chuan, announcer-te’n Pi Sungtei zai turin an sawm nghal a. Pi Sungtei chuan “Kan hnam phunni sunglawi sin sin seh….” tih hla, mawi fan nalh taka a rawn thlawh chuan mipui rilru a hneh hle a ni ang, hriau pawh tla se hriat theih khawp turin mipui chu ngawi thiapin stage lamah mit kan len a, a va hlim awm tak em!!.

Tin, Pi Sungtei a zai zawh hnuin special guest speechs neihna hun hawn leh a ni a, Mon Community Representative leh Karen Community representative hnen atangin lawmpuina thukhawchang kan ngaithla a, kut bengri a ring hle.

Tichuan, thian dang hnen atanga lawmpuina thukhawchang kan ngaihthlak hnuah announcer ten hnam lam entirna hun an rawn puang ta. Calgary val rual leh lanu ten an pheikhaiin an ban an rawn vawr siau siau dawn emaw, kan tih laiin Nu ho leh nula tlemin ZAWL KHAW SIR lam entirna an rawn nei, he lam hi mipa leh hmeichhia hian an lam tlangpui thin, hetia hmeichhe ho chauhvin an rawn lam ta hi mawi dangdai ve tak a ni. Lam khat chauh an lam lo, “Ailawng i za”) “ tih hla nen entirna kan Fellowship Chairman Pu C. Liankhuma (An khuangpu) hovin an rawn nei leh a, anmahnin hla thu an chham a, an thiamin, kut insuihkhawma an han su dial dial chu; a ko tlanga thlirtu mipui kara pa ho nauawmte pawn an fate an ti tap miah lo, Calgary nuho an tanrual zia lantirtu a ni ber e. Tichuan, hnam lam entirna neih zawh a nih hnu chuan a vawi 62-na Chin National Day Celebration Coordinatior—Pu Thang Za Hmunga’n hlim takin Vote of Thanks sawina hun a rawn hmang a, 1st session chu hun vawng dik takin kan tlingtla ta a.

Khamkhawp kan hmu
Puipun nikhuaah hian ei-leh-in hi kan nei deuh zel a, 1st session a zawh fel chuan announcer ten kawchhung lam inhnawhpuarna hun an rawn hawng a, tichuan In tin atanga ei tur kan kenkhawm (Pot-luck) chu thehin kan ei ho dar dar a. Zofaten chawhmeh kan neih ang chi, Bai, Sa-bu-ti, etc.. kim biaia kan han ei ho chu khamkhawp kan hmu vek ni hmiang, 2nd session hun nghakin kan ngawi thiap a, naupang ho thlengin stage hmaa lam hun tur chu kan nghakhlel a ni ber e.

2nd Session
Hun chhawnghnihna Announcer—Pi Siangbawii leh Pu Malsawmzava chuan mipui rawn chiau lehin music instrument kimchang tak leh tunlaia hla lar, hla mawi tak tak te nen hun hman a ni chhunzawm a, boruak a nuam haih haih a sin. Calgary khawpuiah hian kumin hi Chin National Day tum thum kan hmanna a ni ta. A tum khatnaah chuan hunserh angrengin kan hmang mai a. Mahse, nikum atang kha chuan kan khuaah hian Zofate pawh kan phung ve ta hlein, Musician Pu Malsawmzauva pawh a rawn thleng hlauh mai a, kan vannei hle. Tichuan, nikum atang khan hunserh anga CND hmang mai tawh lovin, International Song-system level ngatin hunpui kan hmang tan a, tute emaw danah kan duai lo hle, ka’n ti hial teh ang. Tichuan, zaithiam thlalak leh musician te thlalak a hnuaia kan tarlan ang hian A tum 62-na Chin National Day chu; Salai Dr. Tawna hla, “Welcome to The Chinland” nen ui tak leh kham lo taka thlahliam a ni.