2012 Republican Presidential Candidate, Mitt Romney (Chhunzawmna)

By Thangkima, Maryland-USA

“To understand my faith, people should look at me and my home and how we live. What my church teaches is evidenced bywhat I have become, and what my family has become”(Ka rinna in hriatchian duh chuan keimah leh ka in leh kan nun dan min rawn en mai rawh u. Kan sakhuanain min zirtirna chu eng ang mi nge ka nih tih leh; eng ang chhungkua nge kan nih—tih hian a ti chiang a ni). —Mitt Romney

1971 ah Harvard University ah Master of Business Administration leh Jurist Doctor (Law Degree) a lak kawp a, kum 4 chhung a zir a, a zir zawh hnu chuan degree pahnih a la ta a ni. Hna han zawn buai vak ngai lovin hna in a lo hmuak sa reng mai a. Chu chu Boston Consulting Group-ah a ni a, management consultant in a thawk ta a ni. Chumi hnu 1977 ah chuan Bain & Company ah a thawk leh a. A hna thawhah, a hlawh tling hle a ni. Ama sawi dan takin ka rin phak bak aiin ka hlawhtling” a ti a ni.

Tin, 1984 ah chuan Bain & Company hi a chhuahsan a. Midangte nen Bain Capital chu 1984 kum vek hian an din ta a.

He an company (investment company) din hi an hlawhtling hle a. Entirna pakhat chu, Staples Inc. (Staples Store, US a awmte chuan kan hria ang) hi an company hnathawh rah chhuah chu a ni a. Staples store hi state tinah a awm a, mi tam takin hna tha tak tak an hmuhphahna a ni.

1994 Senate seat inchuh:

Tunhma atang tawhin, Mitt Romney hi a hnathawhnaah leh a nungchang hrim hrimah a invawng tha em em a. Engvang nge tih chuan politic lama luh a, public office chelh a tum avangin, hming chhiat theihna ang chi reng rengah chuan a inveng fimkhur hle a ni. Zu leh sa-ah a fihlim hle a, chutiang bawkin, hmeichhe lamah a fihlim hle bawk. Kohhranah a inhmang em em a, Sunday school zirtirtu a ni a, Kohhran upa pawh a ni bawk a (mahse, tunah chuan a chawlhsan hrih a ni, politic lama a tlan avangin). (US President nih tum ranin a hringnun a rawn hmang cho te pawh a ang khawp mai).

George W. Bush ve thung kha chuan,“President ka la ni ang tih te chu hrelawk ila, ka tlangval lai nun te kha ka lo uluk ve deuh tur hi a nia” a ti a. Bush-a pawh kha a tlangval lai chuan Texas mi tih takah a che cow-boy ve thei hlei a ni awm e. Rui chungin motor a khalh a, an thenawmte bawlhhlawh bawm an su darh chuai a, chutah, chak tawkin a tlan a, police in an han pullover a. Driving Under Influence in an man der…2000 kuma president tura a campaign lai khan journalist pakhatin i DUI (Driving Under Influence) kha engtin nge…? a rawn ti a; “ka lum pup mai a, nia, kha mi tum khan police in min pullover ngei a, zu ka in thu ka hrilh a, sum chawi tur ang zat ka chawi bawk a, chu chu a ni mai” a ti a ni).

Tuk khat chu Mitt Romney te nupa chuan Edward M. Kennedy (Ted Kennedy) chungchang an sawi a. Tha an tih loh thu leh liberal lutuk mi a nih thu te chu an sawi a. Mitt Romney chuan na kum Senate inthlan leh hunah chuan tu emaw chuan an thlak a ngai a ni, a ti a.

Ted Kennedy hi 1962 atang tawhin Massachusetts senator a ni tawh a. 1994 senate seat chu a term rukna atan chuh leh a tum a. Chuvangin, experience a nei tha em em a, tumahin an khing hneh ngai tak tak lo a ni. Vanduai thlak takin a ni hi hmingchhiatna lian tak a nei a. Chu chu Chappaquiddick incident an tih lar em em chu a ni. July 18, 1969 kum chuan Chappaquiddick Island-ah chuan nula tam tak nen party an nei a. Chu tah chuan nula pakhat, Mary Jo Kopechne nen chuan an hawng lawmah car in an accident a, luiah an tla thla a. Ted Kennedy chu a thi lo va, a nula phurh chu luiah chuan a len bo ta a. A tuk zingah mi dangin a ruang chu an lo chhar a. Accident thu hi police hnenah a report nghal lova, a tuk zing khawvarah a report a. Chuvangin, thiam loh an chan tir a, thla hnih chhung jail a tang a ni. Amah erawh chu, politician chhungkhua tih takah rei lote ah chuan Massachusetts state sorkar chuan senator hna chu an chelh tir leh a. Mahse, he a chetsualna avang hian US president chu a ni thei ta lo a ni. 1980 kum chuan presidential nomination a chuh ve a, mahse, president ni tur chuan mipuiin an duh lo a ni. He hmingchhiatna hi chu nei lo se chuan a unaupa John F. Kennedy angin president a ni ve mai tur a nia.

Mitt Romney te chhungkua chu malsawmna tam tak dawngin business lamah a hlawhtling em em a. Fa nau malsawmna pawh an dawng nasa bawk a. Nu ber chuan, “paa thil dang i ngaihtuah a hun tawh a ni. I pa hnung i zui pawh a hun tawh hle in ka hria?”tiin a han chawk phur a. Romney pawh kum 46 lai a ni tawh a, thil dang tih hun tawh niin a hria a. Tichuan, October 1993 kum chuan Senate seat chhuh ve tur chuan a inbuatsaih ve ta a. Ted Kennedy khing tur chuan an nupa in an rilru an siam fel a. Chaw nghei tawngtaina te an nei a. Senate a chuh tur thu official-a a puang hnu chuan, nasa takin campaign an bei tan a. Politic kal phung chu a pa (Govr. George Romney) hnuaiah experience a nei tawh a. Tin, a nu hian 1970 khan senate seat chu hlawh tling lo takin a lo chuh ve tawh bawk a. Chung te atang chuan politic in lum let dan chu a hre ve viau tawh a ni.

Ted Kennedy campaign team te chuan Romney-a Mormon nihna leh an sakhuana kal dan tha lo tam tak hmangin an rawn bei ta char char mai a. (Mormon hian mi dum (black) ho khan 1978 hma khan chuan rawngbawltu atan hman an khap a ni. Pathian an chhe dawng an ni an tia lawm).

September 26, 1994 chuan Ted Kennedy nen chuan debate an nei ta a. Chutah chuan Kennedy chuan an sakhuana chungchang chu a rawn sawi chho a, zawhna tam tak a rawn phawrh bawk a. “In sakhuanaah intluktlanna in hmang lova, chu chu eng nge I ngaihdan?” “Nangma rin dan leh i tanna lam min han hrilh teh?” a rawn ti chho ta a. Romney chuan han sawi fiah vak ngaihna hre lovin, “I unau pa John F. Kennedy pawh kha in sakhuanaah a chiang lo va, “I do not speak for my church on public matters, and the church does not speak for me” a ti a nih kha, tiin a chhang let a. Kha mi kuma i unaupa hlawhtlinna kha Roman Catholics mi, maktaduai 40 tan chauh a ni lova, American zawng zawng tan a nih kha. I unua pa hlawhtlinna lak bo i tum chu a pawi ka tih pui khawp mai che, a ti a. Sakhuana lama an inhnial chho ta chu a pa, George Romney chuan tha a ti lova, a lo in sum zo ta ngang lova, reporter ho zingah chuan a rawn inrawlh lut a,“Sakhuana chungchang thu sawi vak chu thil dik lo tak niin ka hria” a rawn tita a. A pa hian tun hmalamin he tiang buaina chungchang hi a lo tawng hnem tawh hle a. Chuvangin, thil awmze nei lo a ni, a tia ni.

George Romney chu a fapa Mitt Romney hian a chhun leh chhun loh an zawt a. Kei aiin ka fapa hian thil a tithei deih zawk a ni. Pakhatnaah chuan, kei aiin lehkha a zirsang zawk. Pahnihnaah chuan, keiin company pakhat chauh ka tih changkang laiin a ni chuan company za chuan a tichangkang a ni. Pathumnaah chuan, kei aiin pawisa a siam chhuak hnem zawk. A ti a ni.

Tichuan election hma kar hnihah chuan televise debate pawimawh tak mai chu Faneuil Hall ah chuan an nei a. Chutah chuan senior leh junior danglamna chu a rawn lang ta a ni. Kennedy chuan, “Romney engnge i health care plan tha ber?” tiin a zawt a. Romney chuan a sawi a. “A nih leh chumi atan chuan sum engzat nge ngai ang?” A han ti leh a. Romney chuan health care plan budget chu a lo nei der lo mai a. “Ah…ka hre chiang chiah lo” a ti a. Kennedy chuan nuihsawh deuh tak mai hian “You don’t have a cost?” a han ti a. Romney chu a buai titih leh ta tlat mai a. Chumai bakah thupui dang dangah an debate naah hian a hneh chiah lo va, hei hian a ti chak lo ta a ni.

November 8, 1994 zing dar 8:45 ah chuan Romney te chu an chhungin vote thlak turin an kal ta a. Vote an thlak zawh chuan in lamah hawng lehin, thin phu deuh det det chuan ni lengin election result chu an nghak a. Result a rawn chhuak ta a, Romney chu Ted Kennedy lakah point 58 to 41 in a chak ta lo a ni. A nu leh pa leh a nupui Ann-i te chuan amah aimahin an tuarna zawk a. Ann-i phei chu camera-a a lang phak tawh lohna chinah a tap chhuak hawm mai a. Politic khawvelah chuan engtikah mah kan lut leh tawh lo vang a ti nghe nghe a. Mahse, a hnuah chuan hetiang hian a sawi leh a, “nu nau nei hlim hi nau i nei leh duh em? tiin han zawt ula tumahin ka duh an ti lovang” tiin. Tichuan, Mitt Romeny chu an company lamah chuan a kir leh ta a ni. He senate seat inchuhnaah hian a mimal sum $3 million a seng a ni.

Salt Lake City Winter Olympics games 2002:
Salt Lake City, Utah hian Olympics games hi thlen tumin tum 4 lai an bei tawh a. Mahse, an hlawh tling ngai lova. 1995 kum chuan an han dil ve leh a, 2002 Winter Olympics games tur chu an chang thei ta hram a ni. He mi chungchangah hian buaina nasa tak a awm a, International Olympics Committee members then khat ten Salt Lake Organizing Committee hnen atang hian thamna sum tam tak an lo dawng a (chu vanga thleng thei te pawh an ni mai thei). International Olympics Committee members te zingah chuan buaina a chhuak a. A then an ban tir a, a then an mah niin an inhnukdawk a.

Chutiang chuan 2002 Winter Olympics games thleng turin Salt Lake Organizing Committee te chu an buai chho map map a. Thamna sum an vawrh chhuah hnem avangin, budget lamah harsatna lian tak an tawk chho ta a. Chuvangin, Organizing committee chuan Executive tha tak an mamawh ta a. Tunge tha ang tiin an zawng ta char char a. Hming tam tak an rawn nominate hnuah chuan Mitt Romney chu an mi duh zawng chi tak; Businessman ni bawk politician ni bawk chu lungrual takin an thlang ta a ni.

Romney chu February 11, 1999 chuan Organizing committee CEO atan an la lut ta a. A then chuan Mormon mite leh sate a tanpui duh vang a niang te an ti a. A thian pakhat D’Alessandro phei chuan “The best way I can describe what he faced is trying to rebuild an airplane while it’s flying”(tuna a hmachhawn mek han sawi fiah dan tha ber chu, thlawhna thlawk lai siam that tum ang vel a ni) tiin a sawi a. Romney chuan, “If this doesn’t work, I can come back to private life, but I won’t be anything anymore in public life” (he thila ka hlawhtling lo a nih chuan ka mimal nunah ka kir leh ang a, engtikah mah vantlang thilah ka tel tawh lovang) tiin a chhang let a ni.

Tichuan, nasa takin tan an han la chho a. An expenditure te chu an cut nasa hle a, free lunch te, refreshment budget zawng zawng chu an cut vek a. Volunteer ho tak ngial pawhin an eiin man an pek a tul ta a ni. Mi tam takin an sawisel nasa hle a. Volunteer in kan rawn thawk a, pizza slice khat ringawt pawh a thlawnin kan dawng lo a nia, an ti a. February 8, 2002 chuan Olympics games chu ropui takin an hmang ta a. Ram 77 atangin infiam mite 2,400 vel an rawn kal thei a. USA chuan medal 34 lai a la bawk a ni. Mitt Romney kaihhruaina hnuaiah chuan an budget buai zawng zawng chu a fel ta vek a, $100 million lai sum chuang an nei thei phah bawk a ni.

He Olympics games hlawhtling taka a kaihhruai avang hian 1994 kuma senate seat in chuha a chak lohna, mipui rilrua cham reng te pawh a siam tha leh a. Tichuan, a hmakhua chu vangtlang hmaah a eng leh tan ta hle a ni. Eng nge a tih leh ang?

Massachusetts Governor:

“I know you’re really busy now with the Olympics, but when you’re finished, please come back and save Massachusetts.” —Barbara Anderson

Politic lama a thian tha ten Massachusetts governor atan in candidate turin thu an rawn a. Olympics games avangin a hming a chher hriam hle bawk si a. Chuvangin, mipuiin a chungah rinna nasa tak an nei thar leh a. Chuvangin, governor atan a in candidate ve ta a ni. Party leh lam (Democratic) Shannon P. O’Brien nen chuan governorship chu an in chuh ta a. An han campaign ta char char a. Election hnaih lam tawhah debate an nei a, chu tah chuan Pi. O’Brein-i hian nula tleirawl kum 16 miin nu leh pate thu lovin abortion (nau tih tlak) an tih theih tur thu a sawi chuan mipui ngaihdan a siam danglam ta vek a. A hmaa amah lo vote tumtu tam tak te chuan Romney chu an duh ta zawk a. Hei hian Romney-a kawng a hawn sak ta a ni. Amah Romney-a sawi dan takin “Kan debate hnuhnung ber khan ka kawng mi hawn sak ta a ni” a ti a ni. Tichuan, November 5, 2002 election ni a rawn thleng a, O’Brien-i chu Romney lakah vote 45-50 in a chak ta lo a ni. Tichuan, Mitt Romney chu Massachusetts Governor 70th na atan an thlangtling ta a ni. Boston Park Plaza Hotel-a hnehna no an dawm lai mek chuan President George W. Bush chuan “Hello, Mitt, congratulation” a rawn ti a.

Governor a nih laia a thiltih hlawhtlin ropui tak chu Massachusetts Healthcare law (Romney-care) a ni a. An State mi zawng zawngin an neih theih tur Healthcare law chu ni 12 April 2006 khan Faneuil Hall-ah a Sign a ni. Faneuil Hall hi 1994 kuma Ted Kennedy nena an inchapcharna hmun kha a ni a. Romney chuan, “Titanic lawngin vur tlang su leh tura a zin kawng ngai bawk a zawh leh ang maia ka’n inngaih tlat chu le” a ti a ni.

Bain Capital-a a hnathawhpui Thomas Stemberg chuan “Mitt, Massachusetts mipuite tan rawng i bawl duh tak tak a nih chuan, health care law tha tak i siam sak a ngai a ni”, “You can find a way” a rawn ti a. Thil pawimawh leh a tih tur dik tak niin a hre ta a. Chuvangin, a hlawhtling theih ngeina turin a bei ta ngar ngar a. A thawhpui then khatte chuan, “Dukakis II” tiin an koh phah hial a. Governor Michael S. Dukakis khan 1988 khan tuna health care ang hi lo tih a tum tawh a, mahse, a hlawhchham a. Chuvangin, a ni pawh hian a hlawhtling an rinpui lo a ni. Mahse, ngawrh taka an beih hnu chuan an hlawhtling thei ta a ni. In tithei takin, The Wall Street Journal-ah chuan“Health Care for Everyone? We Found A Way” tiin an chhuah a. He a thil tih avang hian a hming a lar phah hle a ni. Chuvangin, governor term hnihna chu chuh a tum tawh lova, Oval Office, White House lama thut a rilruk tan ta zawk a ni.

2008 Republican Presidential nomination race

“I am not running as a Mormon, and I get a little tired of coming on a show like yours and having it all about Mormon”. – Mitt Romney

2008 Presidential candidate-a lut ve tur chuan a rilru a in puahchah tan ta a. Thawm a han nei tan dek dek a. Los Angeles Times survey poll (enthlithlai chinna) in a tar lan dan chuan 37% chuan Mormon mi chu president a tan an vote dawn loh thu a tarlang a. Chumai bakah America chu Mormon mi president atan a la in ready lo an tia ni.

Chuvangin, a Mormon nihna chungchangah Romney chuan evangelical leader tha tak tanpuina a mamawh hle ta a ni. Ni khat chu Romney-a campaign puitu pakhat chuan phone call a dawng a. Chu chu Atlanta public relation agent, Christian organization-a an hruaitu Mark DeMoss a ni a. Mark DeMoss nen chuan September 11, 2006 chuan an in hmu ta a. Mark DeMoss chuan Christian evangelical leader dangte nen inhmu turin leh a rinna chungchangte an hnena sawi fiah turin thu a rawn a. Romney chuan a pawm ta a. Kar ruk a liam hnu chuan Romeny chuan evangelical leader te chu an duh duh, thu zawt turin a inah, a sawm khawm hlawm ta a. Chung mite zingah chuan, Billy Graham-a fapa, Reverend Franklin Graham te leh Reverend Jerry Falwell te chu an tel a.

Tichuan, thu tam tak an zawh hnuin Dr. Richard Land (Southern Baptist Convention’s Ethics and Liberty Commission) chuan “Thomas Jefferson-a sawi dan angin, sorkar leh kohhran chu an inchawhpawlh tur a ni lo” (a wall of separation, between church and state) a rawn ti a. An zinga pakhat chuan, “Governor, Mormonism hi America mipui tam tak ten Christian nawlpuite thu-rin dan angin an pawm lo tih i hria ti raw?” a rawn ti a. Romney chuan hre teh reng mai, “Politic lama ka thutlukna siam chungchangah ka Mormon rinna hi ka dah tha ang” tiin a intiam a.

Tichuan, Dr. Richard Land chuan, 1960 kuma John F. Kennedy-a’n America mipuite hnena a thusawi, “Politic lama thutlukna a siamnaah a Catholic rinna a tel loh tur thu” a sawina copy chu Romney a pe a. (John F. Kennedy khan, “I am not running as a candidate of Catholic Church, I am running as a candidate of Democratic Party, a ti a ni). Chutiang ang chuan mipuite hnena sawi ve turin a ti bawk a. Tichuan, Romney chuan December 6, 2007 chuan Iowa-a a campaign thusawinaah a puang ta a ni. A thusawi tawp dawn lamah chuan hetiang hian a sawi a, “1774 kum khan Continental Congress chuan Philadelphia ah meeting an nei a, chutah chuan thu-rin hrang hrang vuan an nih avangin, tawngtaina neih tur nge neih loh tur, chungchangah an in hnial a, Samuel Adams-a chuan, mi nun tluangtlam leh mi dik an nih a, ram leh hnam hmangaihtu an nih bawk chuan tu hnen atang pawhin tawngtaina a dawn duh thu a sawi a. Tichuan, an tawngtai rual ta hlawm a, ral an do tlang a, Pathian khawngngaihna zarah he ram ropui tak hi an rawn din chhuak ta a ni” tiin.

February 13, 2007 chuan Mitt Romney chuan official takin 2008 Republican presidential nomination a tan a in candidate thu chu, Henry Ford Museum, Dearborn, Michigan ah chuan a puang a. A hmachhawn tur lar zual deuh te chu, senator John McCain leh New York mayor Rudy Giuliani te an ni a. Rudy Giuliani hi 9/11 a huaisen taka a chet avangin America mayor tia hriat a ni a. Chuvangin, a tan chuan an huphurh awm hle a ni. Tichuan, campaign chu an han bei ta char char a. A campaign team te chuan “Yes, we can” tih chuan an hlachang thunawn (catchphrase) a tan, hman tumin an duang a. Mahse, mak tak maiin, Obama campaign team te pawhin an lo duang ve a, Obama hian a rawn hmang hmasa ta zawk a. Chuvangin, “Yes, we can” tih chu an chang ta lo a ni.

Romney leh McCain chu nomination inchuh chuan an inbei ta a. Romney-a’n a chakna lam business leh economic lamin a bei a. McCain chuan Romney-a chak lohna lam national security lamin a’n bei ve leh thung a. Tichuan, Romney chuan McCain chu 31-36 in January 29, Florida primary ah chuan a hneh ta lo a ni.

Romney chuan vice president nih beisei in, a nupui nen, Arizona lam pan in, an Ford Mustang car nalh tak nen chuan an tlan ta char char a. McCain-a in chu an va thleng ta a. Inkawm falna te nei in, thu tam tak an titi a, zan riah te an ei ho a. McCain chu a hmin titih der mai a. McCain chuan Romney chu a thulrualpui (running-mate) a tan a duh rilru deuh a. Mahse, a campaign team ten an han thlir chiang a, “a ni hi chu a chi loh ang, abortion chungchangah ngaihdan mumal a nei lo tlat (flip-flop-man), a hmain pro-choice a in tia, tunah chuan a duh leh tawh lo va. Chuvangin, a ni hi chu a tih chi loh vang” an ti a. Tichuan, Alaska governor Sarah Palin (pro-choice) chu an thlang ta zawk a ni.

Romney hian he campaign naah hian a mimal sum $45 millions a seng a ni. Tichuan,thereng vuakthlak ang maiin a reh ta vang vang a. June 2, 2011 a rawn thleng meuh chuan, “Obama fails our country” tiin a rawn let leh ta a ni.

(Thil rawn thleng tur tumahin kan hriat lawk bik loh avangin, eng nge rawn thleng ang tih chu i lo thlir tlang teh mai ang u).

Thubelh: Tuk khat chu Mormon missionary pahnih hian kan doorbell an rawn hmet ri a, kawng ka va hawn a. An Mormon rinna chu min hrilh duh thu an sawi a. Kei lah inhnial ka lo phur hle si a, rawn lut rawh u, ka ti a. Tichuan, an sakhuana rawn zawrh chu an han sawi ta char char a. An duh tawk an sawi zawh chuan, ka sawi ve thei tawh ang em? Ka ti a. Teh reng mai ang ti a. Tichuan, in pu, Joseph Smith kha treasure hunter (ro phum ruk zawngtu) a ni a, tiin ka han tan a. In pu khan Mormoni hnen atang khan enlightenment (var pawh tharna) dawng angin a in sawi a. Chutiang bawk chuan Prophet Mohammad pawh khan a insawi bawk a.

Tin, Buddha pawh khan chutiang bawk chuan a in sawi bawk a. Chumai bakah Hinduism pawh a la tel. A nih leh Buddhism or Islamism or Hinduism hi in ring em? Ka ti a. Ring lo an ti a. A nih chuan an ni pawhin in Mormonism hi an ring bik lo tih in hria ang chu ka ti a. Hria e, an ti a. Nia, chutiang bawk chuan, in rinna hi ka ring bik lo a ni, ka ti a. Thil awmzia an hrethiam a niang chu, “Mr. Kima, thank you very much for your time”, an ti a, kan in goodbye ta a ni.

—July 2001, The Salt Lake Tribune, labeled Mitt Romney – “pro-choice” ‘I do not wish to be labeled pro-choice” Mitt Romney wrote in letter to editor.

“I respect and will fully protect a woman’s right to choose. That choice is a deeply personal one, and the women of our state should make it based on their beliefs, not mine and not the government’s.” – Mitt Romney

“…in a certain point, I just concluded that, for me, personally, it is important for me, to go ahead and affirm that, I think same-sex couples should be able to get marry”. —President Barack Obama

http://www.huffingtonpost.com/2012/05/09/obama-gay-marriage_n_1503245.htm

—Main reference book: “The Real Romney”, By – Michael Kranish & Scott Helman, HarperCollins Publishers, New York, 2012