2012 Republican Presidential Candidate Mitt Romney – I hrechiang duh em?

By Thangkima, Maryland-USA

“Some believe that such a confession of my faith will sink my candidacy. If they are right, so be it.”—Mitt Romney

A thalbe atangin governor pahnih ngawt an la rawn chawr chhuak ang tih pawh suangtuah chhin ngai miah lovin, Miles Archibald Romney chu Lower Penwortham, England atangin a nupui Elizabeth nen chuan kum 1841 khan Nauvoo, Illinois, United States-ah chuan an rawn pem lut ve ta rawih mai a. An rawn pemluhna chhan hi eng dang vang ni lovin; Mormon sakhua rinna thar vangin a ni. Mormon missionary te chu 1837 vel khan England ah va kalin an sakhaw thar chu an va zuar a.

Mahse, mite chuan an lo lei duh lo hle a. Chutia kawngsira an aupui lauh lauh lai chuan Romney te nupa chuan an va ngaithla a. Tha an ti ta hle mai a, chuta tang chuan Mormon rinnna thar chu an pawm ve ta a. England rama Mormon ringthar hmasa ber an lo ni ta a ni. USA an rawn pemluh hian an lo lawm hle a. Carpenter (mistery) thiam tak a ni tih an hriat hnu lehlek phei chuan an lawm lehzual a ni.

Engvangnge tih chuan Mormon temple tur chu sak mek a ni a, chu mi atan chuan mi tangkai tak a nih theih dawn vang a ni. An Mormon thian te beisei ang ngei chuam Miles Romeny chu an temple saknaah chuan a hruaitu ber a ni ta a. A then phei chuan “Master of mechanic” tiin an ko hial a ni.

Buai tak leh phur taka hringnun an hman chhoh lai mek chuan Miles Park Romeny chu August 18, 1843 ah rawn piang ve ta a. Kum sarih a nihin an chhungkuain Mormon hmunpui ber ni ta, Salt Lake City, Utah ah chuan an pem leh ta a. He tih hun lai hian Mormon ho hian US sorkar atangin tihduhdahna an tawk nasa hle a ni. Engvang nge tih chuan, Mormon ho hian polygamy (nupui pakhat ai tam neihna) kha an sakhuanaah a thiang a. Chuvangin, nupui pasal an inneih pawlh nasa a. Chhungkhat hnaivai tak tak te pawh an inneih pawlh hial a ni. (Hei vang hian mi tam tak chuan tun thleng hian Mormon sakhua hi sakhua pangngaiah an la pawm theih loh phah a ni).

Miles Park Romney pawh chu carpenter thiam tak a rawn ni chho a. A ni pawh hi an sakhuanaa mi rinawm leh mi pawimawh tak a rawn ni chho a ni. Kum 18 a rawn tlin chuan Brigham Young (Mormon church president – an founder Joseph Smith awhtu) chuam Miles chu nupui nei turin a ti a. Tichuan, May 10, 1862 chuan Mormon biak inah Hannah nen chuan an innei ta a. Hannah hian fa sawm lai a hrin sak a ni. An inneih thla hnih hnu, July 8, 1862 chuan President Abraham Lincoln chuan Morrill Anti-bigamy Act (nupui pakhat aia tam neih khapna dan) chu a signed a. Abraham Lincoln chuan Mormon president Brigham Young a hnenah chuan he tiang hian thu a thawn a: “Min tibuai lo a nih chuan ka tibuai bik lo vang che” tiin. Amah erawh chu, Mormon ho hian he dan hi an zawm chuang lo a ni.

Miles P Romney te nupa chuan fanu pahnih neiin hlim taka an awm lai chuan Brigham Young chuan Miles chu a ko leh ta a. Nupui dang nei leh turin ka duh che a ni, a ti a. Miles chuan an lal ber thu chu hnial ngam lovin, nupui dang Caroline Lambourne, kum 20 mi hmel tha tak chu a nei leh ta a. Hannah hian tuar thiam lovin na a ti hle a ni. Mahse, an sakhua kal phung a ni miau a, a tawrh thiam dan a zawng ta zawk a ni. Mahse, Caroline zawk hian pasal intawm hi a thiam vak lova, chuvangin, fa pahnih a hrinsak hnuin a chhungte hnenah Brigham Young-a phalna la in a kir leh ta a ni.

An nupa chauha an awm leh lai hian fapa an nei leh a; Gaskell Samuel Romney chu 1871 kum chuan a rawn piang ve leh a (a ni hi politic lam tui mi a ni). Chutia harsa taka an khawsak chhoh lai mek chuan an pu ber Miles A Romney chuan May 3, 1877 (5:30pm) chuan a boral san ta a ni. Miles P Romney hian nupui dang a nei leh a, Catherine Cottam-i nen chuan September 15, 1873 ah an innei a ni. Catherine chu mi tha tak, sakhua mi tak a ni a, chhungkua nu ber Hannah nen pawh hian an inmil hle a ni. A hnuah chuan Miles hian nupui dang a nei leh a, chu chu school teacher, Annie Maria Woodbury a ni. Chutia an cheng za ho lai chuan Mormon rorelna thu chhuak chuan Mormon mi leh sate chu hmun hrang hranga pem darh a, Mormon community din an tum ta a. Chuti chuan Miles Romney te chhung chu St. Johns, Arizona state lama pem turin an ti ta a. An rorel dan ang chuan an chhungkua chu Arizona lam pan chuan an pem ta a.

Mahse, an va pemna hmunah chuan Mormon mi chu an lo welcome lo khawp mai a. Nupui pakhat aia tam nei ngat phei chu an duh lo leh zual a ni. Sorkar lam nen buaina nasa tak an tawk ta a. Miles chu dan bawh chhia tiin man an tum a. Mahse, vanneiha siamin a tlan bo hman hram a. Chutia, US ram chhunga an him loh avangin, Mexico ram lamah pem turin an ti leh ta a. Tichuan, an chhungkua chuan Mexico ah chuan an pem ta a ni.

Mexico ah chuan zalen takin an va awm thei ta a. Leipui (farm) zau tak an siam a, ran tam tak an vulh bawk a. An vaawmna hmun chu Colonia Jaures tia hriat a lo a ni ta ni. Miles hian nupui dang a nei leh a, hmeithai hausa tak, Emily Henrietta Eyring Snow nen hian kum 1897 ah an innei a ni. Nupui pali a nei a(hawng ta nen panga), fa 30 vel a nei bawk a ni. Din hmun nghet an khuar zawh hnu chuan, zan khat chu Miles chu a chau hle a, a nupui te leh a fate zawng a koh khawm tir a, Hannah chuan a kut vuanin a thawk hnuhnung ber chu na taka lain a thi ta a ni.

Gaskell Romney chu Salt Lake City ah lehkha a zir a, a zir zawh hnuin Mexico ah chuan a hawng leh a. A pa a boral tawh avangin, mawhphurhna zawng zawng chu a koah a tla ta a. An ran vulh te leh an leipui (farm) siam te chu an hlawhtling chho zel a. Tichuan, an lo hausa ta em em a, in lian tak chhawng hnih an sa a. An awmna community ah chuan chhungkua hausa ber an lo ni ta a ni. Kum 1895 ah Gaskell Romney chuan Anna Amelia Pratt chu nupuiah a nei a. Tichuan, kum 1907 chuan George Wilcken Romney chu a rawn piang ta a ni.

Kum 1912 a rawn inher chhuah meuh chuan vanduai thlak takin Mexican Revolution avangin Mexico an tlan chhuah san a lo tul ta a. El Paso, Texas lam panin an Mormon pui te nen an raltlan ta a ni. An pu Miles Romney an US a chhuahsan hnu kum 27 ah an rawn let leh a. An rawn let leh hian awm hlen tuma rawn let an ni lova. Mexico ram buai a zawh hunah kir leh tum rilru pua rawn let an ni.

Gaskell Romney chu a chhungte nen Los Angeles lamah an pem a, Idoha state lamah te an pem a, a tawpah Mormon hmunpui Salt Lake City, Utah ah bawk chuan a lut leh a. Chutah chuan bul intan leh in, an rawn hmuingil chho leh ta a. Mi hausa tak chhungkua an lo ni leh a. Mahse, The Great Depression an tih chu a rawn thleng a, ram pumpui a buai ta a. Economic zawng zawng a chhia a. Chu mi avang chuan Gaskell Romney pawh chuan a sum leh pai hausakna zawng zawng chu a hlauh leh ta vek a ni.

Mahse, kum 1938 a rawn inher chhuah chuan an chhungkua tan vanneihna a rawn inher chhuak leh a. Chu chu Mexico rama an in leh lo zawng zawng kha a man engmah tel lovin an um chhuah avangin an tlansan a. Kha mi case kha Gaskell Romney v. United States of Mexico tih a ni. Salt Lake City court ah chuan an finalize ta a. Gaskell Romney chuan Mexico sorkar hnenah chuan $26,753 a dil a. Mahse, $9,163 pek a ni.

George W Romney chu George Washington University-a lehkha a zir laiin U.S. Senator David Walsh-a hnuaiah typist hna tha tak a hmu a, graduate hman lovin a chawlhsan ta a. He senator a hmelhriatna atang hian Aluminum Company of America hnuaiah saleman hna a hmu leh a. Chutianga hun a hman chhoh lai mek chuan nula hmeltha tak, Lenore chu a tawng ta a. Lenore-i hi Hollywood actress a ni a, film thenkhatah a part velah a chang ve zar zar thin a. George Romney chuan a duh hle a, a atchilh ta tlut tlut mai a ni. A tawp a tawpah chuan a rim thlu ta nge nge a. Kum 1931 chuan an innei ta a. Detroit lamah Automobile Manufacturers Association a head ni turin Detroit lamah an pem ta a. Vanneihna leh malsawmna tam tak dawngin chhungkua a din a.

Tichuan, American Motors Corporation chuan vice president ni turin an hired a. Rei lo te ah an company CEO chu a boral a. Tichuan, George Romney chu an company CEO a ni ta a ni. Fa pathum lai an nei tawh a. Mahse, la neih belh leh an duh a. Nu ber hriselna a that tawh loh avangin doctor chuan neih tawh loh a that thu a rawn a. Chuvangin, fa lak tur te chu zawngin, Switzerland rama mi chu adopt(fa lak) an tum a. Fa neih leh duh bawk si, hlau bawk si vela an awm lai chuan, Lenore-i chuan a ruak lo a ni tih a in hria ta a. Doctor lah chuan nau a ken leh chuan a nunna atan a hlauhawm thu a hrilh bawk si a. Hlauthawng tak leh phur bawk si chuan damdawi in lamah chuan in check-up turin an kal a. Nau chu a lo keng ngei a. Engpawh nise, neih an tum thu doctor an hrilh a.

Tichuan, Pathian zarah engmah ti lo chuan nau chu a pai chho ta a. March 12, 1947 zing dar 10 a rawn rik chuan America president ni mai thei Willard Mitt Romney (Mitt Romney) chu a rawn piang ta a ni. An upat lam fa leh fa tlum ber a nih avangin an lawm nasa hle a. A nu phei chuan “miracle baby” tiin a sawi hial a ni. A tukah chuan a pa chuan lawm tak leh inchhuang tak chungin, a hnathawhpui te hnenah chuan Mitt Romney-a piang thu chu an company Letterhead ngat hmangin lehkha a thawn vek a ni.

Kum 1962 chuan George Romney chuan Michigan state mipui te chu tih changkanga hmasawnna nasa tak lama hruai a duh a. Chutiang tih hlawhtlin nana tha bera a hriat chu governor seat chuh a ni a. Tichuan, governor ni tur chuan Republican Party mi angin a in candidate ve ta a. Taima takin campaign an bei a, election an han nei a, vanneih thlak takin Michigan Governor 43-na ni turin a tling ta nawlh mai a. Governor hna chu term hnih lai a chelh a. Kum 1968 chuan US president nih tumin a inpuahchah ta a. Republican presidential nomination chu Richard Nixon nen chuan an in chuh a. Mahse, Richard Nixon chuan presidential nomination a chang ta zawk a. Tichuan Nixon chu president a tling ta nghe nghe a ni. Nixon hian George Romney hi a cabinet atan a sawm a, Secretary of Housing and Urban Development hna a chelh tir a ni.

An sawi danin George Romney hian a nupui Lenore hi a hmangaih zia entir nan tuk tin Rose par a pe thin e, an ti a. July 26, 1995 tuk zing chuan Lenore-i chu a han harha rose par hmuh tur chu a lo awm ta lo va, Lenore-i chuan thil awmzia a hrethiam nghal ta mai a. George Romney chu a exercise laknaah kum 88 mi niin heart attack in a thi ta a ni.

Mitt Romney chu a rawn tleirawl chhuah tan tirh atangin a puitlingin a in vawng fel em em a. A pa avangin politic lamah a tui em em bawk a ni. A pa hi a ngaisang hle a, “ka pa thu sawi reng reng hi ngaihnawm ka ti a, ka ring bawk a ni” a ti a ni. A pa hian a unau dang zawng te aiin a duat bik a, a chhuang hle bawk a ni. A pa chuan hetiang hian thu a hrilh thin a: “Search diligently, pray always and be believing, and all things shall work togather for your good”, “Dream and dream big, and if you’ll dream big and if you’ll work hard and if you pray always, your dreams will come true” tiin.

A pa te leh a pute ho zawng zawng lo tih dan thin angin France ramah missionary a kal turin an Mormon rorelna atang chuan thu a rawn chhuak ta a. A kal hreh hle a, a kal hrehna chhan pawh thil dang ni lovin, a bial nu duk tak Ann Davis chu a chan palh ang tih a hlau a ni. Mahse, a bial nu chuan i kal ngei tur a ni, ka lo nghak ang che, tiin a tiam ve a. Tichuan, phur vak lo chuan July 1966 chuan Mormon missionary turin France ram lam pan chuan a chhuak ve ta a ni. France rama a awm lai hian French tawng a zir nasa hle a, thiam pawh a thiam phah hman hle a ni. Hrehawm a tiin a lung a leng thei hle a, Mormon ho hian missionary hna thawka an awm lai hian an bial nu/bial pa te hi kum khatah vawi hnih chiah biak an phal a ni.

Mitt Romney chu an mission president pui turin an ti a, an driver a ni nghal bawk a. June 18, 1968 ni chuan Mitt Romney chuan an mission president Anderson leh a nupui Leola chu hmun pakhata kal turin a drive a. Kawnga an kal lai mek chuan motor pakhat hian an hnung lam atangin na lutuk tak mai hian a rawn su ta chawrh mai a. An pathum chuan an hliam nasa hle a. Nikhua pawh hre lovin an awm a ni. An president nupui Leola-i chu emergency hospital ah dar kar hnih a liam hnu chuan a thi ta a ni.

Chutiang bawkin Romney pawh chu engmah hre lovin a awm a. An accident-na hmuna va thleng hmasa police pakhat phei chuan “a thi” tiin a lo record hman hial a ni. In lamah a chhungte chu an lo thlabar hle mai a. Chanchin an hriat ve leh tawngtai hona nei turin a nu leh pa te chuan an kohhran mite chu an sawm a, an monu hual Ann Davis pawh an sawm tel ve a ni. Tichuan, zawi zawiin a rawn dam khaw chhuak leh ta a. Tichuan, U.S ah chuan a rawn hawng ta a. France rama a missionary thawh chhung hian mi 20 vel chu Mormon a hruai lut thei a ni.

A bial nu Ann pawh chu rinawm takin a lo awm ve a. Mormon ah a lo in let (convert) tawh bawk a. Thil chu a kal tluang ta hle a. March 21, 1969 chuan nu leh pa te rem tihna thlapin an innei ta a ni. High School an kal lai atang tawhin an in ngaizawng tawh a, childhood sweet-heart tiin an sawi fo thin reng a ni. Salt Lake City lamah an insuan phei a, mi basement an luah a, pa ber chu Brigham Young University ah English honor a la bawk a. Buai taka an awm lai chuan an fapa hmasa ber, Taggart, chu 1970 chuan an nei a ni. Tunah hian fapa hlir panga an nei a ni. An fapa pahnihna Matthew chu 1971 ah a piang a, Joshua chu 1975, Bennamin chu 1978, Craig chu 1981 ah a piang a ni. Nu ber chu thil dang ti hman lovin chhungpui nu nih hna a thawk a.

Chuvangin, Romney hian an nu hi CFO (Chief Family Officer) tiin a sawi thin a ni (a ni hi an company ah CEO a ni). An in chhungah hian dan (Law) khauh tak pakhat an nei a, chu chu “an nu ber chu tumahin a chhia lam reng renga sawi phal a ni lo”. He dan hi an chhungkuain strict takin an zawm a ni. An sawi danin Romney leh Ann hi vawi khat chiah an in hnial an ti. Chu pawh chu awki san lo in. Vawi khat chu Ann-i chuan pa ber car BMW nalh tak mai chu a sunroof (car chunglam kawngka) a lo khar theihnghilh a, chu mi zan chuan ruah nasa takin a sur a. A car chu a tuk zingah a lo chiau pur mai a. Romney chuan thinrima la lovin “I know who prepares my meals” a ti e, tiin a thian hnaivai John Wright chuan a sawi a ni.

(A sei ta lutuk… next lamah — Senate seat Ted Kennedy nen an inchuh chungchang te, Salt Lake City 2002 Olympic games hlawhtling taka a kaihhruai chungchang te, Governor a nih chungchang te, leh 2008 presidential nomination John McCain nen an inchuh chungchang te, a remchang hunah kan chhunzawm leh dawn nia…)