2012 Huivalenthiam Debate, Sawitu (I)-na

Zofate inpumkhatna turah hian thiamna leh literature hian tih tur an nei lo a. Thil inkungkaih pawh a ni hek lo. Ni lawm ni “Pu Chairman?”

 

Pu Malsawma Colney chu May thla (2012) khan Maryland ah a rawn kal a. A ni hi Zo Unification-a UNO representative a ni a. Kar hnih lai mai New York – UNO meeting ah a va tel ve a. Pu Malsawma chuan a chanchin a sawi naah he tiang hian a sawi a. Laldenga te leh Zoramthanga te chuan India nena inbiak rem chu an duh a. Mahse, kei ni chuan kan duh ve lova. Tichuan, ram hnuaiah kan la awm a. Kan sipai V Battalion ho chu ka hnenah an rawn kal a. Ka pu i hovin Independence chu kan sual tho tho a. “Min ho la, capital (Aizawl) pawh kan va la ang e” an rawn ti a.

Mahse, hetiang hian ka lo chhang a, “capital chu in va la thei ngei ang, mahse, in va beih tura te hi mi dang an ni lo va, kan thiante an ni a. Chuvangin, va kal ta ula, inremna thu chu va siam ve mai zawk rawh u. Kei chu khaw chhungah ka hawng ang a, ka va thi ta mai ang e” ka ti a. (ka va thi ta mai tih hi engmah ti tawh lovin ka va awm ve tawh mai ang a tihna a ni). Pu Laldenga te, Pu Zoramthanga te, Pu Tawnluia te ho kha chu tih hun lai tak chuan an ralte an nita zawk a nih chu!.

A sawi zel dan chuan V Battalion ho chu MNF sipai tha ber te an ni a, an va beih chuan an that tura te chu Laldenga te leh Zoramthanga te ho an ni a. Chuvangin, mahni thian te beih ai chuan ka inhnukdawk ta zawk a ni, a ti a ni. Mahse, kan ram milem be kuta (vai kutah) a awm chu kan rilru a na khawp mai, tiin. A mah hi kum 82 lai a ni tawh a, a la hriselin a la fingfel khawp mai. Tun thleng hian Zoramthanga te leh Tawnluia te ho nen chuan an in chu kha ta lo a ni. Buaina chhawng hnih a thlen loh nan leh inpumkhatna a chhiat dawn ai chuan tiin a inpumpek (sacrifice) ta zawk a ni. Kha tih hun lai khan Pu Malsawma khan khi tiang thil khi thlen tir ta lo se chuan, an buai chhunzawm zel dawn tihna a ni a. Mizoram history pawh a dang hawk dawn tihna a ni. A result tur erawh a hriat loh… Chuvangin, hruaitute chu an pawimawh hle a ni.

History dang han thlir leh ila: USA constitution tur chu an han draft a. An han zawh fel meuh chuan an hruaitu lawk zinga paruk te chuan hming an han sign duh lo pang mai a. Chuti chuan buaina dang an nei cho leh ta nghal a. An duh loh chhan chu Federal Government hian thu neihna a nei sang lutuk a, chuvaing, president chu rei lo te ah dictator a ni mai dawn a ni, State sorkar thu neihna hi hei ai hian tih san ni rawh se tiin, an bei let ve a. Tin, tax chungchang an buai bawk a ni. Constitution chu danah an siam hlei thei ta lova. A bikin Virginia ah an buai nasa leh zual a. Zan khat phei chu constitution duh lo ho chu an inhawrkhawma Patrick Henry (Governor) hnenah chuan an rawn kal a, indona puang mai turin an rawn nawr a.

Mahse, thil tha ber nia a hriat loh a vangin a lo hawng tir leh vek a. Constitution chungchangah vawi tam tak public debate te leh meeting te an nei a. An chingfel hlei thei lova. Buaina lian tak a chhuak mai dawn niin an hria a. Chutah an hruaitu deuh ber Patrick Henry chuan “Kan Union a vang chauh hian kan inhnukdawk mai ang e” a tita a. Chu tih hun lai chuan, James Madison leh James Monroe inthian tha em em, mahse, constitution chungchangah hmuh dan a in ang loh avangin an inbei nasa mai a. (An ni pahnih hi a hnuah president an ni ve ve). A tawp a tawpah chuan Constitution chu danah an siam thei ta hram a ni. (USA Constitution hi khawvela constitution tawi ber a ni a. kum 200 chuan a liam tawh hnu pawh hian 28 chiah an la siam tha (amend) a ni. India constitution ve thung chu khawvela constitution sei ber a ni a. kum 50 pawh a tlin thathum hma in vawi 50 chuang an siam tha (amend) tawh a ni).   

Aw le, khing kan han tar lante atang khian inpumkhatna chungchangah leh na tur chungchangah hruaitute an pawimawh leh mawh loh chu kan hre thei mai awm e.

 

 Hetiang hian entirna han siam leh ila. Nula leh tlangval innei tur (pumkhata insiam tur) hian engdang an mamawh lova, an mamawh leh thil pawimawh ber te chu, “Palai leh Pastor” pumkhat an nita e, tia puangtu tur a ni an mamawh ni, dah mai a!

 

Chuvangin, inpumkhat kan duh chuan emaw, pumkhata insiam kan duh chuan, a pawimawh ber chu kan thinlung a ni a. Kan thinlung theuha inpumkhat kan duh chuan kan inpumkhat a ni der mai a lawm. “Piat ta naa” a awm lo reng reng a ni. Chuvang chuan inpumkhat nan thil pawimawh ber chu kan thinlung (rilru) a ni a. In ngaitlawm leh rilru zau taka kan inpawm tawn thiam a pawimawh a. Kan tlin lohna te leh kan chak lohna te kan inhriat thiam sak tawn a tul a, ngaihdam ngai an awm chuan inngaihdam tawn a tul a ni.

 

Tin, inpumkhat kan duh tak tak chuan in tih “bikna” hi kan dah bo theuh tur a ni. Chubakah “a nih loh chuan” tih pawh hi kan dah bo tur a ni. Chumi a nih loh chuan, kha mi a nih loh chuan…etc. Chuvangin, kan inpumkhatna tur kawngah hian dah bo ngaite leh chan ngaite kan dah bo ngamin kan chan ngam tur a ni.

 

Movement a awm reng reng chuan a move tu a awm tihna a ni mai a. Chu thil move tu chu hruaitute tiin kan ko thin. Party pahnih or group hnih an in be dawn emaw, pumkhata an insiam dawn emaw a nih chuan an hruaitute an inbe hmasa thin a, hruaitute an inbiak dan a that chuan inpumkhatna tha tak a awm thin a ni.

 

Hruaitute pawh inpumkhat duhna tak tak thinlung nen, inngaihtlawmna thinlung nen, dah bo tul te dah bo huam a, chan tul te chan ngamna thinlung nen an indawr a tul a ni. Chu tiang chauh chuan inpumkhatna tluantling kan nei thei ang.

 

Chuvangin, hruaitute chu zofate inpumkhatna atan hian an pawimawh ta em em mai a ni. Sap in “very important” an tih ai pawh hian an pawimawh zawk a ni. Motor driver ang deuh hi an ni a. Motor pawh hi a khalhtu a awm loh chuan engtikah mah a tlan thei lo a ni. Mi tam tak pawh ni leng pawhin chuang se, a driver a awm loh chuan a tlan thei lo a ni. Chutiang deuh chuan, inpumkhatna kawngah pawh hian hruaituten tha taka hma an lak loh chuan inpumkhatna a awm thei lova.  Chuvangin, thil dang zawng aiin hruaitute chu an pawimawh ber a ni. “Hruaitu arsi” an tih thin kha…